CM Relief Fund atangin Local Task Force tanpui dawn; Tanpuina nuaih 100 chuang sem dawn

Aizawl | April 3, 2020: Mizoram Chief secretary Lalnunmawia Chuaungo chairman-na hnuaia Committee on Utilization of Chief Minister’s Relief Fund for COVID-19 in vawiin-a a rel angin CM Relief fund chu a thawh khatna atan thuang thumah semin Task force, Chhungkua leh Home hrang hrangte hnenah tanpuian cheng nuai 118.55 semchhuah a ni dawn.

Sawrkar thuchhuahin a tarlan danin, CM Relief fund chu thuang thuma sem tur niin, Task force, Chhungkua leh Home hrang hrangte-ah tanpuina sem a ni dawn a, Mizoram khua leh veng tina din Village leh Local Level Task Force 889  te tan sum fai cheng nuai 88.9 semchhuah a ni dawn a. Chhungkaw mal Lawipu, Rangvamual leh Edenthara Basic Services to Urban Poor (BSUP) Complex a cheng chhungkaw 600 te chhawmdawl nan Local Level Task Force te kaltlangin cheng nuai 6 sem a ni ang a. Home, rehabilitation centre, orphanage leh centre hrang hrang 67 te tan cheng nuai 23.65 pek chhuah a ni dawn bawk a ni.

Chief Minister’s Relief Fund hman dan tur ngaihtuahtu atana din Committee on Utilization of Chief Minister’s Relief Fund for COVID-19 chu an Chairman Pu Lalnunmawia Chuaungo, Chief Secretary hovin Chief Secretary’s Conference Hall, MINECO-ah vawiin khan an thukhawm a. A thawhkhatna atana CM Relief fund semchhuah dan tur an rel.


Heti hian CM Relief Fund on COVID-19 semchhuah hmasak ber tur chu a zavaiin cheng nuai 118.55 a ni. Committee on Utilization of Chief Minister’s Relief Fund for COVID-19 rawtna ang hian a rang thei ang berin sem chhuah a ni ang.

Post a Comment

0 Comments