KEI CHU MIZO KA NI TLAT!

- Kenny Muankima

India ram hmun hran hranah NE mi te thinhrikna leh diriamna a hluar a, mahni ramchhungah ngaihngama kan awm avangin kan thlir liam mai a.

Tunah chuan ramchhan tuma an nunna thap, an hnampui ngei ngei, medical team te pawhin India ram hmun hrang hrangah dodalna an tawk chho ta a. "Vaiho âtzia hi" tiin an dinhmun leh an vela cheng kan unaute kan ngaihtuah thleng leh chuang lo. Chu ai chuan kan zial leh kuhva tlakchham thu te a ni kan aupui tam zawk ni!



A nihna takah chuan vai te hi an â a ni ngawt bik lovang, ti â tu a awm a ni ngei ang. Social Media ah thuthang dik lo a tam a, virus an hlauhnain a zem ṭan a, an hlauh tawh vek vek chu hlau uchuak ṭhin an ni a, an area an lockdown avangin ei leh in an hnianghnar tawk lo a, an thlaphanna leh manganna inbelhbawm chuan mental health a khawih pawi a. Chu chuan rilru fim a put tir hlei thei tawh lo te pawh a ni ang. An dinhmunah ding ila, an tawn ang tawng ni ila, anni ai aia â tur pawh kan tam zawk hial mai thei bawk.

Ka ngaihtuah a, kan Mizo ṭhalai tam tak vai ram (ti ila a fiahin a fun kim mai) lama la tangkhang an awm a. Ṭhenkhat rilruah chuan, "Rawn haw rawn haw a ngai lo, virus an rawn hawn tel palh ang.." tih bak hi an chungchang ngaihtuahna nei lem lo te kan ni hlawm a. Chung mi te ngei ngei pawh chu an hnampui, Mizo nia inchhal te tho kan ni!

Dik tak chuan kan quarantine facility en hian rawn haw loh theih hram an duh vek ang. Mahse, nakin lawkah rawn haw lo thei lo dinhmunah an la ding ang a, haw tura sum an neih loh hun pawh a la thleng hial ang.

Mizoram pawna Mizo awm te hi mi hausa fa an ni vek lova, an duh vanga tangkhang lah an nih a rinawm loh. A tam zawk hi zirlai leh hnathawka zuk awm an ni a, hnathawka la awm tam zawkah hi Zoram lama an chhungte chawmtu zawk, an harsat luat vang chauha hreh ngawih ngawih chunga loh theih lohna vanga an hna hmuh theihna awmchhun lam pan te pawh an ni ang.

Mahse, lockdown a nih vangin rampumah eng sumdawnna pawh khar a ni a, eng Company pawh an inkhar. Chuvangin an hnathawhna te hi hlawh la lova leave la turin an ti deuh vek a, chu chu boruak a muan leh huna an hna an chelhzui duh chuan an tih theih awmchhun a ni. Chutih laiin Muslim ho congregation vawngin rampumah Covid-19 a darh chuai chuai a, ni khat thil thuah pawh an detect ṭawk ṭawk mai a nih hi. Tam tak an chin hriat loha bo te hian nasa takin midang an la kai darh thei cheu bawk a. Heng hi thlir chuan India ram hi nunphung pangngaiah kan let maiin a rinawm loh.

Chuti a nih chuan vairama kan unau tangkhang laklawh te dinhmun hi engtin nge ni ta zel ang?

Zirna vanga tangkhang te pawh an chhungten hna an thawh theih miau loh avangin pawisa thawn tur an neih loh hun pawh a la thleng thei a. Chutiang chiahin hnathawka Zoram pawna awm te pawh hian hlawh lovin in luah man leh ei leh in tur man an nei reng dawn lo. Khawpui apiangah nun man a hautak miau avangin an inkhawl ve chhun chhun pawh an hmang zo thuai ang. A khawi ve ve pawh hian sum lo la nei ṭin ṭen ve ve pawh ni ta se an tan pawn chhuah a him lo tulh tulh dawn a, sum neihin awmzia a awm loh hun pawh la thleng hial thei a ni.

Hen zawng zawng ngaihtuah hi chuan a haw duh zawng zawng hruai haw hna hi Sorkar hian a buaipui chu a ngai a ni. State sorkar meuhin kawng a dap a nih chuan kawng a awm em em ang.

An tam tham dawn avangin kan quarantine facily te pawh hian a dawlzo dawn lo a. Chuvangin him zawk leh huang zauh zawka quarantine facility lam ready hmasak erawh a ngai ang. Chuti lo chu kan in ekchhe beng leh vak ang a, he virus darh theihna chance hi a tisang zual ting thei bawk.

Chuvangin, "Engnge a hunlaia an rawn haw loh?" ti ngawt lo deuha an chungchang hi kan ngaihtuah chu a ngai a ni. Kan unaute himna atan leh keimahni he ram chhunga awm te himna atan reng pawh..

A tlai hnua phili buai vek chunga ruahmanna siam leh tho tho ai chuan, tuna rilru fim tak hmanga ruahmanna siam hi a fintlak zawk fein a rinawm a, a hautak lo zawk fe bawk ang.

Chung avang tak te chuan Mizoram chhunga lungmuanga kan awm avang te, an thil tawn leh hun hman mek dan kan hriatpui ve loh vang maia an thinlung kan tih nat theih dan ngaihtuah lek lova kan ngaihdan lo phuhchhuah phawng phawng te hi keini lam pawhin simin, lu chhum ban chhum huama ṭhian chhan ṭhin Mizo kan nih hre rengin, an thlavang kan hauh theihna tur zawk ngaihtuahin i ṭawngṭaipui zawk ang che u.

A tawp berah chuan, ram pawn lama unau duhtak te u, midang zawngin in hmabak ngaihtuahpui lo che u pawh ni se, in tan ka ṭawngṭai zel ang bawkin in thlavang hauhin ka au zel ang tih hi lo hre mawlh rawh u. Kei chu, Mizo ka ni tlat!

Post a Comment

0 Comments