CARRY YOUR CANDLE!

- Kenny Muankima

Mizoram pumah a vawi khatna atan Kohhran leh pawl thliar lovin, Frederick a leh a team te kaltlangin Pathianin Home Crusade mi a buatsaih a. He crusade a an thupui pakhat chu 'thuawihna' niin Kaisara thil te chu Kaisara hnena hlan turin Bible a inziak ang ngeiin mi an zirtir a. Chanchinṭha avanga kan hlimna chu dan kan bawhchhiatna atana sadai ṭhiattu a nih an phal lo.

Crusade kan nei zo deuh chiah a, India ram Prime Minister Modiji chuan kan beisei loh deuhin nimin zing dar 9:00 khan video message hmangin thu a rawn sawi a. Dt. 5th April, 2020 zan dar 9 ah mahni light te off a bathlarah eng chhi turin mipui te min ngen a. Kan dawnsawn dan pawh a in ang lo hle mai..

Mizo Kristian tam zawkin kan helh a, a hun thleng se, eng tih thim loh leh bati chhit loh ngei kan châk tawh a ni zaw mah a. Sakhaw indonaah hial kan ngai niin a lang..

Kei lah ka dawnsawn dan hi a dang khawp a, mental health pawimawhzia hriaa kan rilru hriselna a chhiat hlaua ka ṭan em vang emaw ni zawk tehreng ni helh tur reng reng ka hmu lo!

Diya chauh chhi tura min beisei chu ni se diya hi Hindu, Sikh, Jain leh Zoroastrian te sakhaw thil khawnvar/bati a nih avangin kei pawhin ka hal lo chiang ngawt ang. A neih pawh kan nei hek lo..

Mahse mombati te, bati dang hrim hrim te, eng light mai pawh mobile flashlight thlengin kan remchan ang ang chhi turin a ni min ngen.

Bati hi Kristian leh Kristian kher lo pawhin 'beiseina' emaw 'Chanchinṭha' entirna atan kan hmang tlangpui ṭhin a. Kristian zingah candle light service hmang ṭhin pawh kan tam reng lah tak a. Kathy Troccoli hla:

There is a candle in every soul

Some brightly burning, some dark and cold

There is a Spirit who brings fire

Ignites a candle and makes His home

Carry your candle, run to the darkness

Seek out the hopeless, confused and torn

Hold out your candle for all to see it

Take your candle, and go light your world

Take your candle, and go light your world

tih ngei pawh kha bati chhi chunga candle-light service hmanga mittui tla zawih zawiha lo sa ve tawh te pawh kan kat nukin ka ring...

Tunah hian hun harsa tak kan tawng mek a. Ram chhungah hripui a leng a, ṭhenkhat chu kan mangangin kan ipik tawh a, damchhung khawsak thlirin kan bei a dawng ṭan mek a, kal ngaihna leh nun ngaihna pawh kan hre tawh lo. Chutih mek laiin sakhaw pakhat zuitu te awm ṭhat duh lohna avang leh Media personal ten an chhemalhzui nasat luatah ramchhung inlungrualna a chhe mek bawk. Muslim sakhaw hotu ṭhenkhat te pawh an sakhaw mi leh sa te nun dan chu demin thupha an chawi hial a, mi ṭhenkhat awmṭhat duh loh vang maia Muslim sakhua ni lova, he virus zawk hi do turin India ram mipui te pawh mi an ngen hial!

He hrik leh a natna ken hi inkai a sam em avangin lungrualna nen lo chuan do rem chi a ni lo a, midang zawng zawng fimkhur mahse pakhat lo inthlahdah zeuh vangin a hnam ang leh a ram anga buaina tur thlen phah theih tirtu a ni a. A nihna takah chuan tunah Markaz Nizamuddin aṭanga India rama he virus darh ta hluai ngei pawh hi Tablighi Jamaat hotupa, tun thlenga bibo zui ta Maulana Saad Kandhalvi hian lo ṭhulhpui ni se heti luai luai hian kan buai lo deuh tur a ni a. Mahse, mi pakhat vanga kan buai dan en hian he virus dorem tura mi pakhat pawimawhna a tilang chiang hle lawi a.

Chuvangin pu Modi hian he natna do tura lungrualna (soliditary/unity) pawimawhna a hmu chiang hle ah ka ngai a. Kathy Trocolli hla thu khian a hneh ve viau a nih loh vek pawhin khi hla phuahtu nen khian tun dinhmunah chuan an rilru sukthlek a in ang rih viau ni pawhin a lang..

Light tih thim hian kan hun tawn harsa tak hi a entir niin ka hria a, eng kan chhit ṭheuh khan mimal tinin beiseina kan neih leh chakna te a lan chhuah tir thungah ka ngai. Chuvangin sakhua inthliarna awm miah lova he beiseina meichher chhithona hi kan buatsaih thei a nih chuan tuna mainland a inhuatna thlipui tleh mek pawh hi a ti ziaawm thei hial mai thei a sin..

Keimahnia eng ṭheuh hi chhi eng zel ila,

He hun harsa tak hi paltlang turin.

A ṭhen kan lo eng zual bik laiin,

A ṭhen chu de che che leh mit hial tawh te pawh kan ni ang.

Mahse kan eng te hi midang hmuh tura kan ken chhuah a,

He khawvel hi kan en zel a nih zawngin

He virus ngei pawh hi kan la hneh ang a,

He hun thim paltlang hian

Engah kan zain kan la lut leh ang.

tih zawk hi Modiji chang thlan hi a nih hmel ka ti a. Lo ni ta lo tehreng pawh ni se, kei chuan chuti zawnga he hun hi ṭawngṭaina nena ka hman dawn miau avangin kan sakhua a kalhna a awm lo a. Kan ram tana rampum huap activity a awm lai ngeia ka ṭawngṭai ve theih lai a nih dawn avangin ka chhungte pawh he ka rilru puthmang ang hi put tir turin ka zirtir ngei ang. Chu chu a Pathian thu zawk em em si a..

Duhthusam ah phei chuan Aizawl khawpui zawng zawng hian an eng ti thimin a chhungkua kuain an bathlarah ṭheuh bati han chi thluai thluai mai se la, CARRY YOUR CANDLE hla khi play ruai ruai mai bawk se la, chu chu a lan tam theihna lai ber aṭangin emaw drone in emaw lo cover ni ta se, India ram motivate tuah hial kan ṭan theih a nia ka rin ni...

A tawp kharna atan he kan hun harsa tak tawn lai mek min thlen tirtu Corona hi ka hla kaihlek hmang hian kan au el ve reng reng teh ang!

Corona, ooh na-na (ay)

Hurts of my heart is in Corona, ooh-na-na (ay, ay)

It took me get the real dilemma, ma-ma-ma

Oh, but my heart is brightly flame (ay)

There's somethin' 'bout my moral (uh huh)

Corona, ooh na-na (uh)