Mizoram-ah Covid 19 case hmuh a ni

Aizawl | March 25, 2020: Covid 19 darh mekah Mizoram-ah Covid 19 vei nizan khan hriatchhuah a ni.

He thu hi Health minister Dr R Lalthangliana chuan tukin khan Thuthar thehdarhtute kawmin a sawi.

Covid 19 positive hi Aizawl a awm, Mipa kum 50 mi niin, Pastor a ni a, Zirna chhunzawmna vanga Amsterdam -ah a awm a. Doha kaltlangin Delhi ah lo hawin, March 16 khan Guwahati a lo thleng a, Guwahati ah chawl hlekin hemi ni vek hian Aizawl  ah GO Air flight number G8X/G8298 in a lo chuang.


March 18 aṭangin khawsik a nei a, March 20 ah Health Deptt a bia a, March 22 khan a inah kalin Doctor in a endik a, sample lain, GMCH ah thawn a ni a, Nizan, March 24 khan a result positive tih hmuhchhuah a ni ta a ni.

Dam lo hi mi pangngai tak, Pastor leh Lehkha thiam a ni a, a rawn thlen hma aṭang tawhin Quarantine dan hi hrilhhriat a ni a, chumi zulzui chuan dan a zawm a. Nupui neiin fa pahnih a nei tawh bawk.

Nizan la la khan ZMC Isolation ward -ah Motor hranin dah niin, an nupui leh a fate pawh Isolation ah dah an ni.


ZMC ah pawh hian isolation ward hi Mi dang tan pawha hlauhawm lo thei ang berah, a chhawng chungah dah an ni a. Covid 19 guideline te zawm chungin enkawl a ni.

Tunah hian, Amah pawh a hma aiin hma a sawn tawh a, a zia tawh a, ngaihtuahawm a ni lo.

• Isolation hi damdawiina a hranga dahna hi a ni a, Quarantine erawh inah emaw hmun dangah inven thila dah hranna a ni.

---
• Thlawhnaa a rawn chuanpui te zawng zawng pawh sawrkarin a chhui mek a ni.


• Hmun danga Mizoram mi tangkhang mekte an tluk luhna turin Mizoram sawrkarin Mizoram House ah ruahmanna a siam a, Mizoram house hrang hranga hotute biain an niin an lo pui dawn.


• Local Task Force in Lo-a Feh pawh phal loh chungchangah, punkhawm khap chhan hi inkaidarh a chak theih dawn vangin a hlauhawm tih vang a ni a, "lo neitute lo ah an feh duh a nih chuan a pawi lo a ni," tiin chief secretary Lalnunmawia Chuaungo chuan a sawi.

Post a Comment

0 Comments