COVID-19 LEH IPC SEC 188

(Dân zawm hi hremna pumpelhna mai bâkah kan himna tur zâwk a ni.)

- K.Remruatfela


Tunlai hrilêng laka ata khua leh tui te humhimna atana India Sawrkar in dân a hman, The Epidemic Diseases Act, 1897  hi nihna tlângpui hi chu kan hriat vek a rinawm a. Chumi avang chuan a act sawizauna lam erawh hi chu tun tumah chuan kan rawn târlang hrih lo ang. He dân hi British in India ram a awpbeh laia khua leh tuite hrilêng laka  an him theihna atana an siam a ni a. He dân hi a hnu zêlah pawh hun tawn mila siamrem (Ammend) zêl niin tun hnaiah pawh hemi Corona Virus (Covid - 19) hrilêng laka khua leh tuite an him theihna tura dân lekkawhna atana State leh Union Territory zawng zawngten an hman thar leh theih tur thu chu ni 11 March, 2020 (Wed) khan Cabinet Secretary of India chuan a puang a ni.

He dân chhunga Section 2 hian hri lêng vanga khua leh tuite an him theihna turin thuneitu tura ruat, dân lekkawhtute, thuneihna sâng tak a pe a. Khua leh tuite pawhin an thu zawm hi kan tih mâkmawh (legal obligation) a ni. Sec 3 of the Epedemic Diseases Act, 1897 chuan he dân ina thuneihna a pêk ten * Thupek (Order) an siam bawhchhetute chu dân anga hrem theih an nih thu a chuang a. Chu hremna dân chu Sec 188 of Indian Penal Code, 1860 in hremna dân chipchiar a sawi ang hi a ni.

Section 188 of IPC, 1860 ah chuan dân in thuneihna a pêk thuneituten Thupêk (Order) an siam bawhchhetute chu  thla 1 thleng tân tir emaw Rs.200/- thleng chawi tîr emaw, a pahnihna hrem kawp emaw bâkah dân an bawhchhiat dân azirin thla 6 tân tir emaw, Rs.1000/- thleng chawi tir emaw, an pahniha hrem kawp thlengin emaw dân bawhchhetute lakah hremna pêk theih an ni thu a chuang a ni. Tin, hemi baka mitinten kan hriat atana pawimawh êm êm chu, he hremna dân hi bail zung zung theihna (Bailable) case ni mah se, 'Cognizable Offence', Magistrate atanga man phalna (Warrant) la hmasa kher lova, Police ten dân bawhchhetute an man nghal zung zung theihna case a ni a. Ho tê-a case awrh theihna a ni.


Heta kan hriat tur pawimawh êm êm chu dân in thuneihna a pêk ten dân anga Thupêk (Order) an chhuah chu mipui hriat theih tura felfai leh mumal taka tlângzarh tawh a nih chuan _'chutiang an dân siam âwm ka hre ve lo reng reng'_ tih kha chhuanlam a tling tawh lo hrim hrim a. Mipui tih râlkhel emaw tihbuai emaw kan tum chuang hleinem ti pawh ni mah ila, kan dân bawhchhiatna khan vântlâng (society) a tibuai emaw, a tihbuai tawh sa hrim hrim emaw avang khan he IPC section in a sawi anga hremna pêk theih tho tho kan ni. Tin, kan dân bawhchhiatna khân mi nunna ti derthawng zâwng emaw, midangte buaina zakhua zâwk emaw a va thlen a nih phei chuan IPC Section 188 in hremna na zâwk a târlan ang khi kan chungah lekkawh theih hial a ni a. Ngaihdamna rêng a awm lo. Thuâwih taka thuneitute thu zawm mai kha kan himna a nih bâkah hremna kan pumpelhna tur zâwk a ni a. Khua leh tui tha kan nihna anga kan mawhphurhna liau liau pawh a ni zâwk e.



Chumi a nih avang chuan dân zawm kawngah khua leh tuite kan harh thar a pawimawh êm êm a. Ho te-a kan ngaih thilah hian mualpho taka hrem theih reng kan ni a. Thubuai nei leh convict kan nih phei chuan kan hmalam hun kalzêlah nghawng thalo a nei thei a ni tih chu sawi nawn leh ngai tawh lovin kan hriat vek kha! Chu lovah chuan, dân rêng rêng hi kan that tlânna tura siam a nih thin avangin thuâwi tak dân zawm hi nakîna kan him zêl zâwkna tur a ni a. Kan thuâwih loh avanga he natna tihbawiawm tak, Covid-19 hian kan ram a lo luhchilh a nih vaih zawngin a nghawng pawi tur zia leh rapthlak tûr zia hi sawifiah sèn rual a ni dâwn si lova. Chuvangin,  hawh u, khua leh tui tha kan nihna tur leh kan himna turin Dân leh Thupek zâwmin mahni pindan chhungrilah thuâwih takin i inkhung hrih phawt mai teh ang u aw.

Post a Comment

0 Comments