COVID 19 VEI LO NI TA ILA!

COVID 19 hrileng hlauhawm tak chuan Khawvel a tuam mek a, ram changkang leh ram hausate tawrh tur chauh emaw kan lo tih kha Mizote kan lo changkan tawh leh kan vah zau tawh vang ni hmiang kan kawtkai-ah ngei min runin vei an awm ta reng mai.

  

A inkai darh dan a awlsam em avang leh a inkaichhawn chak em avang hian Italy an tlawm a, Khawvel ram ropui USA pawh an buai tan ta. Ni e, Kumpinu Lalram Lal chhungkua meuh pawh he natna hian a run ta der mai.

He hrileng, mahni induh tawk leh thlei bik nei lo ve tak hian mi hausa leh rethei, nu nau leh tar thlengin han duhsak bik leh duhsak loh bik pawh nei lovin a hrut hmiah hmiah zel mai si a. Kan kawtkai ngei Aizawl khawpui-ah a vei hmuchhuah a nih tak si-ah chuan nang leh kei ngei pawh hi kan hriat lovin kan taksa-ah bu khuarin kulh a lo din reng tawh lovang tih sawi theih a ni ta lo.

Sakhi thingler-ah lawntir ila!
Ni e, Sakhi thingler-ah lawntir ila, hetia hri darh chak leh inkaichhawn awlsam tak maiin kan kawtkai a lo thlen tak si-ah chuan khawi lo ka kalna-ah lo kai palhin COVID 19 vei ni ta ila. Mi dang kaichhawngtu tha tak ka lo va ni ve thei dawn lua em!

 

Bristish Lal chhungkua pawh duhsak bik lotu hian Journalist e list love, Task Force member e member love a thliar dawn si lova, ni e, Sakhaw rawngbawltu pawh a hmaih lo a, a hrileng laka mipuite venga tidam theitu doctor pawh a tihhlum theih chuan nang leh kei tehlul chu min va han dim lo nasa dawn em!

Khai mah aw....
March 25 chawhma khan Health minister Dr R Lalthangliana'n thuthar thehdarhtute kawmin Mizoram-ah Covid 19 vei a awm ngei thu a sawi chiang ta a. Chutah chuan, kei ngei pawhin kalin a thusawi ngaithlatu zingah ka tel ve.

Ka haw a Central YMA buatsaih-a Tuikual South YMA in thisen an pek chu tlawhin a remchan avangin thisen ka pe ve nghal a. An fimkhur khawp mai a, luh dawnah kut silna nen an inchhawp a, kut te chu ka sil a. Ka ban ni lovin! Kan roreltute awmna-ah pawh ban em chu kan insiltir loh kha maw!

Chutah chuan, kei hi Covid 19 vei, ni 14 a la tlin loh vanga lang chhuak lo mai chauh lo ni ta ila. Khawiah mah, Mizoram pawnah ka zin lova, Mizoram pawn atanga rawn hawte nen kan inchibai hek lo, mahse, lo kai palh ta ila.. (Sakhi thingler-ah kan lawn tir dawn ka tih tawh kha.)

Thisen pe tur chuan HB test a ngai a, inbuk a  ngai bawk a, ka inbuk a, Ka kutah khawihin, ka kutzung a vit a, HB chu a test a, ka tling ngei a. Lehkha min pein chhan turte a hmuna pen an chhawp hmang chuan ka chhang ta a.

A hnu-ah Aizawl Civil Hospital Blood Bank a Dr Hmingtei chuan ka BP min check sak leh a, ka lehkha pek ah chuan dik leh dik lo laite a enfel thu chuan BP chu a kut ngeia ka kut leh bante khawihin, Ft 2 pawh tling lova inhnaih-ah chuan kan han test ta a, a tha a ni check ang chu Blood bag dahna lamah min tir ta a.

BP check lai

Chuti chuan, Blood bag leh record awmna lamah chuan Sawmtea Chhangte hi a lo awm a, chutah chuan ka lehkha ken, ka kut ngeia ka ken leh ka kut ngeia thil ka ziahna kha, (mita ziah theih ni hek lo) ka pe ta a, a ni pawh chuan a lo dawng a, a kutin blood bag min pe leh ta.

Chuan le, Thisen pek laia mutna tur an siam puan phah-ah chuan ka mu a, ka mutna kha puan a nih miau vangin han senitize nghal ngawt theih  a ni lo. Nurse chhelo deuh mai Remliani chuan min han buaipui a, ka kut leh bante khawihin min han chiu a, an hriau hman a lo thang nge ni a na zek mai. Chuti chuan ka pe zo ta a. Nurse tiin ka sawi mai pawh a, Laboratory Technician a ni a, Mipui hriatthiam awlsam nan ka han ti nurse mai a ni.

chhan ngai an chhang lai leh thisen leh a buaipuitu

Ka hmaa thisen lo petu atanga ka kai theih dan tur leh ka thisen dawngtuin a  kai ve thei ang em tih lam chu lo dahtha ta ila. Tichuan le, ka luh khan ka kut ka sil a, ka ban ka sil lo, Ban bul thlenga sil ngawt thu awm suh. HB test-naah khan ka kaichhawng thei nghal a, doctor ka BP test tu hnenah ka kaichhawng leh thei a, Blood bag min petu leh record vawngtu-ah kaichhawng leh theiin, chuan, Nurse min buaipuitu leh ka thisen lak nana hriau lian zeta min chiutu kha ka kaichhawng leh thei. A tawp ber-ah chuan, ka mutna khum mawlh mai kha, tihfai nghal theih a ni tawh si lo.


Heng ho zawng zawng hian anmahniin invenna an inbel vek avangin anmahni chuan an kai lo mai thei, mahse, ka hnua thisen pe ve zawng zawng-ah thahnem ngai takin an lo pu darh dawn ta tihna a  ni. Chu mai a la ni hleinem, ka kut leh ban atang khan lo kai lo pawh nise, ka mut tawhna khuma mu-te tal kha chuan hlawhtling takin an chhungkua-ah an hawn ta ve ang!

Chuti ang a nih tak avang chuan, Thisen mamawh phuhruk nana Blood Donation Camp buatsaih hi mipui tan a him tawk tawh lo niin a lang a, medical staff te tan ngei pawh a him lo thei ta niin a lang. Medical staff te hian an kai loh vek pawhin a sem darhna lamah, an hna hi Meter hnih danah te thawh theih a nih ngawt loh chuan Bawnghnute sem nen an thawhhlawk dan a inchen hle dawn niin a lang. Mi nun chhan kan tumna lamah, mi nun chhan nana thisen pe si hian hrileng semdarhna kawngah kan lo thawhhlawk viau ve thei.

Engtin nge ni ta ang?
Ni e, he zawhna hi a awm ngei dawn. Thisen kan mamawh si a, engtin nge ni ang? Thisen pangngai hi ni 30 te nung anga ngaih a ni a, tuna Thisen mamawh nia sawi thivar emaw thisen var emaw kan tih mai hi kan thisen an lak atanga lakhran a siam leh a nih avangin heng ho reng reng hi kar khat a dam tling lo an ti, mithiam ten.

Chuti a lo nih tak nuaih si-ah chuan, Thisen mamawh dan ngaihtuah leh inberawn chungin Blood bank-a thuneitute leh CYMA hruaitute tang hovin, tuna thawktuten an kalchilh a, kan buai hut hut ang ni lo hian, kan chhungte mamawh an awm a, a petute nen mi pahnih thum vel Blood Bank-ah kan kal a kan va pe leuh leuh ang hian, YMA Branch hrang hrangah mamawh phuhru tur tawk mil zelin a pe thei tur mi 10 emaw 20 emaw thlangin fimkhur leh felfai takin Aizawl Civil Hospital Blood Bank-ah ngei tih a ngai tawh a ni.

Hetiang a fimkhur tur hian Blood bank-ah chuan thawktute'n ruahmanna an lo siam thiam turah ngai ila, an khum thleng pawhin thelhret a siam a nih vangin tihfai/sanitize theih a ni ang a, hmanraw kim-na zawk-ah chuan thil hi him zawk leh fimkhur zawkin a tih theih dan a awm theih a rinawm. A tul a nih chuan thisen hlu tak dawn nan chuan Damdawiin motor in dam lo ni lovin mi hrisel tha ver vawr chu lam ve tawh mai ila!


Kan kaldan tlema kan her danglam loh chuan, Mizoram mipui pum pui hrek a, pahmei leh chhungkaw harsa-te harsatna belhchhah zawnga kan inhrek mek lai hian kan lo kai dual ve thei tlat a ni.

Sawrkar zem zen tan chuan ni 21 lockdown tur hi a thlawna hlawh lakna a lo ni palh a nih pawhin, Thingtlangpa ni khat khua a chen pawh a, "a sur rei chuan ka faten engnge an ei ang?" tia inngaihtuah buai thinte tan chuan fate riltama en hlumna hun a ni ber dawn. Sawrkarin Buhfai a thlawnin a sem dawn a a buaithlak loh i lo ti a nih pawhin sawrkar hian sahbawn, chi, chini, Hmarcha leh mamawh dang a sem tel hleinem! Ni tin inhlawh a pawisa thawkchhuak thin tan chuan chhungkaw mamawh leh mimal mamawh phuhru tur hian khawia tangka mah an nei awm si lo.  Ni e, Mizoram hmun kilkhawr Dildar cheng 5 man pawh cheng 6 a an zawrh thinna hmunah chuan an chil pawh an ui thum tawh lovang tih tunge sawi thei.


Chuvang chuan, heti khawpa kan inhrek a, inkhawm leh pawn chhuah kan khap a, mahni kawtlai phiat mai mai pawh vantlang aurinna-a kan inpuan khum lai hian a fimkhur theihna lamah kan lo fimkhur zel si loh a inhrek leh tuar chung a  kan lo veia kan lo kai darh leh si chuan, Zirlai Kum tluana hostel strict mangkheng-a awm a, mahni ina a tui tha tha ei pha lova a nawmsakna tur zawng zawng chan chung si a kum tawp result a FAILED tih inziak ang chauh kan ni dawn a ni.


- H Zate
Founder
EXPLORE MIZORAM
www.exploremizoram.com
email: admin@exploremizoram.com

(A hnuaia fakna hi i lo hmet ve dawn nia.)

Post a Comment

0 Comments