Thenzawl-ah Covid-19 veiin a chuanpui hria; JNV Thenzawl tlawhpawh theih loh - Vantawng

Thenzawl-ah Covid 19 veiin a chuanpui hriat a ni a,  Thenzawl a Covid 19 vanga hmalakna leh thil thleng hrang hrangte Vantawng Newspaper report kan rawn dah e.

1.  March 22 a Prime Minister in Coronavirus/COVID-19 vanga Janata Curfew a puan leh Mizoram Sorkarin Lock Down a puan vangin Thenzawlah a ni thum nan inkharkhip a ni. Mipuiin an zawm ṭha hle.

2.     Zing aṭangin Veng hrang hrangah Task Force, Branch YMA leh Thenzawl P/S leh PTS staff te an duty.

3.       Zing dar 7:30 ah SDO Civil Conference Hall ah Serchhip District Sub-Deputy Commissioner Pu Samuel Zodinsanga leh SDO(C) Pu Kulothungan A, IAS hovin Task Force Committee ten nimina Thenzawla mipui chhuakkhawm Video, Social Media lama darh chiam chungchang leh Coronavirus chungchang thu pawimawh ngaihtuahin meeting an nei.

4.    Chhun lamah boruak a pangngai a, ṭul tawpah lo chuan Duty paltlang tum an awm lo. Khawdang aṭanga rawn haw an la awm nual a, zirlai rawn haw leh rawn haw tur pawh an la awm.

5.    Venghlun YMA Duty ten DC order angin Thenzawla lut leh chhuak lirthei an chhinchhiah.

6. Chawhnu lamah, Tukina Mizorama COVID-19 hri vei hmuhchhuahin Thlawhnaa Lengpui a rawn pannaah, JNV Thenzawl a an PT Sir leh Madame te an chuang tel ve tih hriat a ni.

6.        Task Force, Health Department leh Police ten theihtawp chhuahin an ngaihven nghal.

7.      JNV Thenzawl chu tuma tlawh pawh theih loh leh a chhunga awm te chhuak lo tura lock down a ni. An PT teacher te ah hian he natna an vei ni awma ngaih theih, rinhlelhna tur an la awm lo niin sawi a ni.

8.    JNV teacher ten March 16 a Thenzawl Sumo tlai dar 4 chhuak a an rawn hawpui  mi 12 te chu an chhungkuaa home quarantine tura hrilh an ni. (Sumo ah hian mi 12 an chuang niin hriat a ni)

9.     JNV a thawk staff tualchhunga mite chu anmahni leh an chhungte Home Quarantine tura hriattir an ni.

10.    JNV zirlai, PT  zirtirtu te nena awmho hman te chu fimkhur tura tih an ni.

11.     Mizorama he he hri vei an hmuhchhuahin Thlawhnaa a chuanpui ve  tho nia sawi Bualpui V nu pakhat chu, Coronavirus natna a na anga a6 sympton a lang ni te in sawi a ni a. Hei vang hian, vawiin tlai khan Falkawn Hospital panpui a ni ta niin thu kan dawng. Thenzawl Venghlun check point chu dar 6 rik hma deuh khan an kaltlang* (Hei hi ZMC ah Doctor ten an en hnuin, a sympton awm ang vei an hmulo nia sawi a nih thu kan dawng)

12.      Thenzawl Vengthar Task Force te vawiin tlaiah ṭhukhawmin, an Veng inkharkhip an puang a. Thing hmangin, rinawm takin Gate an siam. Ṭul leh pawimawh tak tak lo chu an Veng tlawhpawh an remti tawh lo. An venga zu zuar, hralh an awm chuan, an veng aṭanga hnawhchhuah tur an ti niin thu kan dawng.

13.    Hetiang thawm hian Thenzawl a chiah mek a. Mipui kan fimkhur lehzual sawt hle.

14.    Zanin Dar 7:00 hian Task Force Committee ten Jt. YMA Runah Emergency Meeting an nei dawn.

@    Thenzawlah chhuanchham, ṭanpui ngai, harsa zual chhungkaw 5 vel hnenah Task Force leh YMA, VC ten Buhfai, chawhmeh an pe tawh.

@    Mi inphal leh ṭhahnemngai ten mi harsa ṭanpui nan Task Force ten a ṭul anga an hman turin ṭanpuina pawisa fai ṭhahnem tak an pe tawh. Mi tam takin Task Force, YMA duty te ei leh ina hman atan pawisa an pe tawh a. Duty na bula In neitu leh midang a remchang ten duty te thingpui lum sakin, a ṭul angin eitur te an siamsak a. Duty te an lawm hle.

KAN KHAWTLANG KAN FIMKHUR LEH ZUAL A ṬUL. MANGANG A, CHIAI BUAI MAI LOVIN, FIMKHUR TAKIN, PATHIAN AU ANG U.

  -Tluanga Renthlei

Editor,

Vantawng newspaper.

Date: March 25, 2020 | Nilaini

(He report hi Thenzawl a chanchinbu chhuak Vantawng Newspaper editor Liantluanga Renthlei report leh ziah, ama phalna ngeia dah a ni.)