mipuiin ei leh bar kan tlakchham lohna turin April thla quota ration sem tur hi March thla tawpah sem a ni ang - Supply minister K Lalrinliana

Aizawl | March 25, 2020: Food Civil Supplies and Consumer Affairs Minister Pu K.Lalrinliana chuan vawiin khan COVID-19 kaihhnawiha mipui nitin mamawh essential commodities khaihlak lova kan hmuh theihna turin sawrkarin tan a la mek, tih a sawi a. Mahni mamawh aia tam lei khawl chiama midang tana harsatna siam lo tur leh man pangngai aia toa thil hralh lo turin mipuite leh sumdawngte a ngen.



Supply changtu Minister Pu K.Lalrinliana chuan mipuiin ei leh bar kan tlakchham lohna turin April thla quota ration sem tur hi March thla tawpah sem a ni ang, a ti a, AAY leh Priority Household card (ration card eng leh pawl) neihote tan chuan ration a thlawna sem a ni ang, a ti. Ration card var (APL) nei zingah pawh harsa tak tak an awm tih sawrkarin a hria a, heng mi rethei zual Ration card var neite chungchang pawh sawrkarin a ngaihtuah dawn, tih a sawi bawk. Labour, Employment, Skill Development and Entrepreneurship Department hnuaiah Labour Cess-a sum hmangin heng ration buhfai te hi a thlawna sem a ni dawn tih Supply Minister chuan a sawi a, heng mi rethei zual an awm em tih endik hi Local Task Force kutah dah a ni dawn, a ti.

Buhfai leh mipui nitin mamawh dangte hun eng emawchen atana Mizoram mipui mamawh daih a awm tih leh essential commodities phurtu motor te chu India ram pum kharkhip (lock down) a nih hnuah pawh veivah phal sak an nih thu Pu K.Lalrinliana hian a sawi a. Kan hma hun sawi theih a nih loh avangin mitinte inremchem nachang hre tura ngenin he hun harsa kan tawh chhung hian sawrkar leh mipui kan tan tlan chuan thlaphanna tur a awm lo a ni, a ti.

- DIPR

Post a Comment

0 Comments