Aizawl | March 9, 2020: Tunlai khawvela natna leng mek ngaihven hlawh tak Novel Corona Virus in a thlen Covid-19 chungchang a lo invenlawkna leh chak zawka hmalak dan tur relin vawiin khan Zokhawtharah meeting neiin ramri kaltlanga inkalpawhna Zokhawthar leh hmun dang dangte chu natna leng mek vanga khar lailawk tura thuneitu sang zawka thlen nise, Zokhawthar chu International Border Town, insumdawntawnna leh inkalpawhtawnna pawimawh tak anih avangin Medical Facilities tha zawk dah theih nise, natna leng hluar hunchhung chuan ramri kaltlangin tumah zin veivak lo tura ngen leh ram dang atanga lo lutte Medical Screening bakah rinhlelhte Quarantine neih nise tih bakah puipunna lam chi reng reng siam loh leh sum mamawh angte dawn thuai anih theihna tura hmalak nise tih te rel a ni.
Meeting hi Dr. ZR Thiamsanga, Champhai North MLA leh Vice Chairman, Health and Family Welfare Board kaihhruaiah hian Champhai District Bawrhsap Pu SL Naveen, SP Pu Rex Zarzoliana, Sawrkar Official dangte, Assam Rifles, Custom Superintendent, NGO aiawh Chanchinbumite leh khawtlang hruaitute an tel a ni.
Dr. ZR Thiamsanga chuan Zokhawthar hmun tlawha hmalaknate leh mamawhte enfiahna chu State Level Meeting bawhzuina kalzel a ni, a ti a. India ram pumah he natna vei hmuhchhuah chu 39 lai anih tawh thu leh Mizoram Chief Minister pawhin a tul ang zela hma la tura a hriattir tawh thu a sawi a. Champhai District chu International boundary anih angin fimkhur angai a, district kaltlanga he natna hi a darh chuan kan mulapho hle dawn a ni, a ti a. Covid-19 chu natna kai awlsam tak anih thu sawiin, Mizote chu inkalpawha inlenpawh thin kan nih avangin natna kai a awlsam phah thei dawn a ni, a ti a. Venhim hna thawktu leh hriselna lama thawktute an indaih sen bik loh avangin kan zavaia tanruala ngaihtuahna kan sen ho angai a ni, a ti bawk.
Champhai District Bawrhsap Pu SL Naveen chuan kalkhawmte lawmna thu sawiin, Vice Chairman, Health & Family Welfare Board in district hmakhua ngaihtuaha inrawnkhawmna leh hmunhma enfiahna hun a tha a siam chu lawmawm a ti a. Covid-19 chu natna kaidarh awlsam tak anih vangin fimkhur angai a, ram changkang leh ropuite pawhin an buaipui hle thu leh ramri kaltlanga inkalpawhna leh insumdawntawnna chu tun atan chuan chawlhsan rih maite pawh angaih thu a sawi a. Natna leng darh tur ven kawngah khawtlang mipuite leh official te inkarah thawhhona tha tak a awm a ngai takzet ani a ti bawk. Ramri khar lailawk thu hlaah thuneitu sang zawk thutlukna ngaihchan mek a ni, a ti bawk.
Dr. R.Lianmawia, SMO hnen tangin Health & Family Welfare Department hmalak dan tlangpui ngaihthlak a ni a. February, 2020 thla tir atangin Cross border vaccination booth ah Medical Screening tan anih thu a sawi bawk. February thla chhungin Medical Screening 302, March thla vawiin ni thlengin 155 tih tawh a ni a, rinhlelh hmuh a la awm lo a ni. District Hospitalah khum 5 awmna Isolation Ward siam ani tawh a. Ramri depa awm Medical Officer ten awareness campaign an neihpui tawh thu leh mipuite zirtirna zau zawk angaih thu tarlan a ni bawk.
He hunah hian Sub-Hqtrs YMA Champhai, MJA Champhai District leh khawtlang hruaitute hnen atangin hmalak ngaihna leh thawhho theih dan hrang hrangte ngaihthlak a ni a. Champhai Bawrhsap thuchhuah, ram danga hnathawka awm emaw khualzinte reng reng an awmna khua/veng ten an chanchin kimchang DC hnenah hriattir nise tih chu chak taka bawhzui nise tih a ni a. Natna leng darh tur ven kawngah intawiawma lungrual taka thawhho nise tih a ni bawk.
(A hnuaia fakna hi i lo hmet ve dawn nia.)
Post a Comment
He post chungchanga i ngaihdan lo sawi ve rawh: