COVID 19 | CORONAVIRUS (COVID-19) CHUNGCHANGA HRIATTUR PAWIMAWHTE

Coronovirus leh COVID-19 chu enge ni?
Coronovirus chu natna hrik chikhat, virus an tih zinga mi a ni a. Coronovirus hi chi hrang hrang awmin natna hrang hrang mihringah leh ranah a thlen thei a, natna a thlen kan hriat larte chu Middle East Respiratory  Syndrome (MERS), Severe Acute Respiratory Syndrome (SARS) leh tuna COVID-19 kan tih te hi an ni. COVID-19 chu coronavirus zinga hmuhchhuah thar ber niin, December 2019 a Wuhun, China ah hmuh hmasak ber a ni.

COVID-19 veite engtinnge an insawisel (symptoms)?
COVID-19 veite insawiselna ber chu khawsik, chauh leh khuh ro a ni. Thenkhat chuan taksa na them thum,  hnar ping, hnap tui, hrawk thip, kawthalo an nei bawk. Hengte hi a nasa lo tlangpui. Kai tam takin insawiselna an nei lo. A kai zinga 80% lai chu tha takin an dam leh mai a, a kai 6 zela 1 erawh chu an na zual (serious) bik a, thaw-hah an nei thin. La na deuh bik an awm a, chungte chu – kum upa lamte, natna dang veisa e.g, BP sang, zunthlum, lung-na vei sa te. Khawsik, khuh leh thaw-hah nei kawp chuan rang takin damdawi in an pan  tur a ni.


COVID-19 hi engtianga inkaichhawn nge a nih?

COVID-19 hi a inkaichhawnna chu mihring dang a veite atangin a ni. A natna veite’n an khuh/hahchhiau/thawk chhuahin tuihu hlawm te reuhte (droplet) hnar chhung leh ka chhung atangin a chhuak a, chutah  chuan a natna hrik a lo tel a, chu chu mihringah emaw bungrua/bang/chhuat/kawngkhar etc ah a tla a, hetah  hian darkar 2 atanga ni 2/3 a dam thei a ni. Chung chu kan kutin kan khawih hnuah kan hmai, hnar, ka (mouth), leh mit vel kan khawih leh a, kan kai ta thin a ni. Chuvangin kuta thil khawih mai loh te, inchibai loh  te, hmai vel kuta khawih lohte a pawimawh. Hei bakah khuh leh hahchhiau a tuihu leng chhuak kha kan lo hip luh chuan kan kai thei bawk a; hemi avang hian damlo atanga 3 feet tala hlaa awm a pawimawh (social distancing). Boruakah 3 ft (1 metre) aia thui chu a thlawk darh chum chum lem lo a nih chu. COVID-19 hi insawiselna nei lo, a hrik lo pai ru reng si (COVID-19 kai insawisel lo) atangin kaichhawn chu a har deuh nain  khuh an neih chuan an khuh atangin a kai ve theih tho a ni.

COVID-19 kai loh nan/ inkaichhawn loh nan engte nge ka tih ve theih? -
1. Kut sil ngun - Sahbawn nen fai taka kutsil thin (Kutsil dan dik a awm a, chu chu internet ah awlsamte a hmuh theihin a awm. Hei hi nasa takin inzirtirna nei thei ila). Kutsil remchan lohnaah Hand sanitiser bur tê pai a a khat tawk a kut tihfai thin pawh a tha. Sawi tawh angin kutin mi khawihhnu kan khawih nasa em em  a, kan hmai vel kan khawih leh a, hei hi a inkaina bulpui ber pakhat a ni.
2. Hmai - mit, hnar, ka, beng chhung kut lawnga khawih loh. Khawih ngei a ngaih chuan, rawmawlin emaw 
thawmhnaw fai lai, thil dek vak lo lai hmanga deh/hiah thin.
3. Khuh/hritlang vei bulhnaiah awm lo ila, kan inkarah 3 feet (1 metre) tal a awm tur a ni (Social distancing).
4. Kan zavaiin, khuh vei leh vei lote pawhin ‘Khuh dan tha/ Khuh dan dik (Cough etiquette)‘ kan zawm that a ngai. Chu chu kan khuh/hahchhiau reng rengin a lawngin emaw kutbawra ka hupin emaw kan khuh tur a ni lova; rawmawlin emaw tissue paper in emaw kan ka kan hup tur a ni, chutiang kan keng lo a nih pawhin kan ban kual thlep lai, kiu chhunglamin ka hupin kan khuh/hahchhiau tur a ni. Duhthusam chuan tissue paper pai nual ila, kan khuh/hahchhiau zawh veleh hman nawn theih lohvin bawlhhlawh bawmah paih nghal zel ila.
5. Hritlang leh khing insawiselna kan neih chuan leng chhuak lovin in lamah tawm ila, mi zingah midang kaidarh thei turin awm suh.
6. Kuta Inchibai hi tih rih lo mai a tha.
7. 14th February 2020 hnua Foreign ram, coronavirus vei hmuhchhuah tawha zinte chu, engmah insawiselna nei lo pawh, an rawn hawin ni 14 mahni inah an inkhung hrang tur a ni (14 days self quarantine). Chhungte pawh kai lo turin fimkhur tur a ni.


Inringhlel ta ila, engtia tih tur nge?
Mizoram Health Department Helpline – 102: Coronavirus / COVID-19 vei nia kan inrinhlelh chuan direct a doctor or hospital pan hmasa lovin a hnuaia Mizoram Health Department in phone number a dahah hian phone hmasak tur a ni. Tin, COVID-19 kaihhnawih reng reng hrechiang duh te pawhin he number ‘102’ ah hian mahni sum seng lovin a zawh theih a ni.

COVID-19 chungchangah hriat duh nei ta ila, tunge ka zawh ang?
Coronavirus chungchangah thubelhchian dawl lo internet leh social media ah a tam thin em em a; heng hian mite a ti chiai a, harsatna tam tak a siam thei. Hetianga thil diklo thehdarh hi dan anga hrem theih an ni. Thil I hrechiang duh a nih chuan Health Department thuchhuah atangte, Helpline 102 atangte, internet WHO website www.who.int atangte in a hriat chian theih ang.


Mask (Hmaikawr) vuah kher hi a ngai em?
Mask chungchang hi sawi a tam hle a, WHO in a sawi dan chuan hengte hian mask an vuah tur a ni-
1. Damlo enkawltute – chhung leh khat leh damdawi lama thawkte.
2. Damlo te – COVID-19 veite, hritlang veite, TB veite’n midang an kai loh nan.
3. Damlo buaipuitu dangte.
Khawvelah miten mask vuah an intih hmuh nasat lutuk avangin a mamawh tak tak tan pawh a vang zo vek  tawh a, a pawi hle.
Mask hman chuan a hman dan tur dik taka hman loh chuan awmzia a nei lo thin. Mask kan vuah a nih chuan kutlawnga khawih loh te, vuah leh khawih dawna fai taka kutsil thin te, mask leh kan hmai inkarah boruak luh theih loh te, mask phelh dawna hnunglama a suihna atang chauha phelh thin te, disposable mask chu a paihna tur dik taka paih nghal te a pawimawh hle.


Hriat tur dangte:
• COVID-19 avangin chiai lo ila, fimkhur erawh chu I fimkhur ang u.
• Ngaihdan atthlak te, puithuna atthlak te kalsanin thil chinchang uluk takin zir zel ila.
• Foreign ram atanga zin haw khunghran (quarantine) te hi natna vei an ni lova, fimkhur thilthu ah ni 14 vel (natna lan chhuah theih hun chhung) khung hran mai an ni.
• Hetia ni 14 dahhran/awmhran tir an nihna chhan chu hemi chhung hian insawiselna nei lovin a hrik hi an lo pai ru reng thei a, hre lovin mite an kaidarh thei a ni. Chuvangin dahhrante chuan an zawm ngei tur a ni.
• Khawtlang, Health department, police leh department hrang hrangte, NGO te, kan zavaia kan tanho a ngai hle.
• COVID-19 hluar chin tur hi a hriat rih lo va, hemi hun chhung chuan hengte hi a pawimawh : Kutsil ngun, hmai khawih loh, puipunna huaihawt loh, zin rih loh (a bikin COVID-19 kai tawh awmna state ah leh ramdangah), puipunna a tel tlem, mitinin khuh leh hahchhiau dan dik zawm.

COVID-19 chungchanga ngaihdan dik lote: Hengte hi a dik lo-
1. Thosi seh atangin a kai theih.
2. Tuisa deuha inbualin a ven theih.
3. Zu in hian a veng thei.
4. Chlorine emaw alcohol emaw a taksa inphuhtirin a natna hrik a that thei.


(Issued in public interest by Health & Family Welfare Department, Mizoram. 14th March 2020)

Post a Comment

3 Comments

  1. I agree with a lot of the points you made in this article. If you are looking for the 3M N2 Surgical Mask, then visit Plasmid Factory GMBH. I appreciate the work you have put into this and hope you continue writing on this subject.

    ReplyDelete
  2. The post is written in very a good manner and it contains many useful information for me thnku soo mchh..

    washable mask

    ReplyDelete
  3. Hi to every single one, it’s truly a good for me to visit this web page, I love your content, they are very nice and it includes helpful Information. Check out our website ffp3 dust mask for more Dongguan olayer Technology Co.ltd. related info! I am truly pleased to read this website posts which carries lots of helpful data, thanks for providing these kinds of statistics.

    ReplyDelete

He post chungchanga i ngaihdan lo sawi ve rawh: