COVID 19 | Mizoram sawrkarin zirna in hrang hrang bakah puipunna te khar lailawk dawn

Aizawl | March 16, 2020: Mizoram Health Minister Dr R Lalthangliana hova Health & Family Welfare Board meeting chuan The Epidemic Diseases Act, 1897 (Act No. 3 of 1897) tlawh chhanin leh Chief Minister Pu Zoramthanga be rawnin Mizoram a zirna in hrang hrang te khar a puipunna te pawh khar turin thutlukna a siam.

 He thuthlukna hian naktuk atanga March 31 thleng University, College, School, Anganwadi leh Pre-school zawng zawng khar ni se tiin, Exam nei laklawh lai te erawh chu a ngaiin kal se tih rel a ni a. Thil awmdan a zirin heng zirna in hrang hrangte hawn hun rel leh ni se, tih pawm a ni.

Mi hrang hrang kalkhawmna hmun - Gym, Picnic Spot, Cinema Hall leh Swimming Pool te pawh Ni 17.3.2020 - Ni 31.3.2020 chhunga khar tura rel a ni a. Sawrkar District Hospital hrang hrang leh private leh kohhran enkawl hospital zawng zawngah mipui punkhawm khap mek chu chhunzawm zel ni se tih rel a nih bakah puipunna hnaivaia awmlo turin leh puipunna a kal lo tura mipuite ngenna siam ni se tih a rel a. Residential Institution leh Home hrang hrang te pawh pawn lam atanga tlawh phalloh ni se, tih rel a ni bawk a ni. Hengah te hian Admission mamawh an awm a nih chuan medical screening uluk taka neih hnu ah chauh admit thin tur an ni.

Meeting hian Kohhran hrang hrangah COVID - 19 chungchanga hriattur pawimawh leh mithiam ten invenna atana pawimawh tihtur leh tih loh tur an duan chhuah inhrilh hriatna neiturin Mizoram Kohhran Hruaitu Committee (MKHC) kaltlangin Sande sikul (sunday school) ah hmalak ni se tih remtih a ni a. A ni tan Ni 22. 3. 2020 rel a ni.

Vawiina COVID - 19  chungchang ngaihtuahna ah hian meeting ah hian Health and Family Welfare Board Vice Chairman Dr. ZR Thiamsanga, Chief Secretary Pu Lalnunmawia Chuaungo leh H&FW Secretary Pu H.Lalengmawia te bakah Home Department, Finance Department, Health & Family Welfare Department, Higher & Technical Department, School Education Department, Disaster Management and Rehabilitation Department, Women & Child Development Department aiawh leh midangte an tel a ni.

Post a Comment

0 Comments