Aizawl Magistrate in Bazar nan Curfew thlahdul; Doctor rualin mipui pawn chhuak lo turin ngen

Aizawl | March 28, 2020: Aizawl District Magistrate chu nimin khan vawiina Aizawl Municipal huam chhunga mipuite chakkhai lamna hun atan tiin Curfew puan mek chu darkar 14 a thlah dul.

Mizoram Government Doctors Association (MGDA) chuan he thil hi pawi an ti a, Mipuite chu pawn chhuak lo turin an ngen.

MGDA thuchhuah social media-a darh-ah chuan, "Aizawl DC thuchhuah, naktukah bazar hun Hawn chungchang kha MGDA chuan pawi a ti a. Covid19 darh lohna tura kan la inkhung vek rih a pawimawh zual lai taka inkaidarhna remchang siam thut mai hi tha kan ti lo a. Mipuite kan tan rual em em lai leh, kan la mangan lutuk loh lai leh, Local Task Force ten tlawmngaia an veng chhung theuhte an la vil hneh em em lai hian hetianga inthlahdul hi a la ngai loin kan hre bawk." tiin a tarlang a.

"Hotu liante biak pawhna hun a awm tawh si lo a. Aizawl khawpui chhunga dawrkaite chu dawr inhawng lo turin kan ngen a. Mipuite pawh pawn chhuak lo turin kan ngen bawk e." tiin mipuite chu pawn chhuak lo turin an ngen.

An thuchhuah ah chuan, "Hei hi kan ram leh hnam him nan a pawimawh rih a ni. I hrethiam hram ang u." tiin mipui hriatthiamna an ngen bawk a ni.

Aizawl bawrhsap hian Vawiin March 28 zing dar 7 aṭanga tlai dar 5 thleng mipui chakkhai lakkhawlna atan AMC huamchhungah Curfew a thlahdul ta a ni.
He thil hi veng hrang hrang a Local Task force on Covid 19 pawhin an thlawp loh thu leh mipui pawn chhuak lo tura ngenna an tichhuak tawh.

Hetiang a nih mek lai hian Serchhip aṭangin motor eng emaw zat hmangin thlai thar tam tak thawnin kawng lakah an la thang mek niin thu kan dawng.

Curfew thlahdulna thupek chu mipui him zawkna atan a veng hrang hrang task force ten mipui him zawkna ngaihtuaha bazar loh an rawt fur tak avang leh ngenna zarah Aizawl DC chuan a thu sut leh a, bazar theih a ni dawn lo a ni.