MLA Lalduhoma'n Thenzawl tlawh; Task Force hmalakna lawmawm a ti

Thenzawl | March 27, 2020: Serchhip Bialtu MLA, ZPM Legislature Party Leader Pu Lalduhoma'n vawiin khan Serchhip leh Thenzawl a tlawh a, Serchhip District Task Force Committee leh Thenzawl Town Task Force Committee hruaitute hnenah a ṭul anga hman turin Kutkawr, Hmaituamna leh Kutsilna tur a hlan.

Thenzawl Town Task Force Committee hruaitute chuan Bialtu MLA hi Thenzawl Venghlun Branch YMA Duty post ah lo dawngsawngin, Pu Lalduhoma chuan, Mizoram hmun ṭhenkhata inkharkhip lutuk a, an khuaa lirthei kal pawh phal lo an awm nia sawi chu ṭhalo a tih thu leh Thenzawl a Task Force Committee ten ṭul leh pawimawha lirthei tlantlang an phal leh, kuthnathawktute, an lo leh huana feh theihna hun felfai taka ruahmanna siama an kalpui lawmawm a tih thu te, a ṭul anga harsatna leh puih an ngaihnate inhrilhhriat a, in puih zel a inhuam thu a sawi a. Bialtu MLA chuan, Serchhip a kuthnathawktu Zikhlum thar te tharchhuah hralhna tur buaipui fel a ni te lawmawm a tih thu a sawi bawk.

Serchhip Bialtu MLA Pu Lalduhoma hian tunhnai khan a bialchhunga  Serchhip, Thenzawl, Buangpui leh Neihloh khuaa Task Force ten a ṭul anga an hman turin ṭanpuina pawisa fai a lo hlan tawh bawk a ni.

Thenzawlah hian YMA Branch hrang hrangah YMA member leh Police te ngawrh takin an duty mek a. Ṭul leh pawimawh tawp tih loh a mipui pawnchhuak an awm lova. Chhuanchham mai tur chhungkaw engemawzat  ṭanpuina pek an ni tawh a, Thenzawl CHC leh Ayush Hospital ah quarantine mi 2 an awm mek a, chhungkuaa home quarantine 15 an awm mek a, JNV School chu Isolated Lock Down a dah a ni a, mimal  fimkhur zual tur leh pawn chhuak lo tura tih ṭhahnem tak an awm mek tih loh chu Harsatna lian tham lutuk thleng a la awm lo niin Thenzawl Town Task Force Committee Chairman Pu R. Lalramnghaka chuan  Vantawng  zawhna8 chhangin a sawi.

Tukin zingkar aṭangin Veng hrang hrangah YMA leh Police an duty a. Harsatna lian tham tawk an awm lo. Thenzawl Venghluna Duty te chuan, hmundanga kalchhuah an remtih loh, an duty na hmun hel a, duty post danga mite buma chhuak lui an mante chu Thenzawl Police ah an hlan. Eichawp dap, huan leh Lo nei, loh theih loha fehchhuah ngaite hun siamsak an nih laiin, feh tur anga insawi a, duty te hnena phalna la a ram kal an awm nual niin a lang a. Duty ten strict lehzual an tum.

• Vawiin khan Supply Department ten Buarpui lam tan Buhfai Load an pechhuak.
• 
  
• Vawiinah Grace Indane ten Gas Cosumer No. 1851-2170 chin tan Gas an sem.
• 
  
• PHED ten Veng hrang hrangah Tui an sem kual mek. Khawtlang mipui tana thawktute an fakawm tak meuh.
• 
  
• UPCI ten vawiin 5chhun dar 12:00 khan khawvel puma COVID-19 hrileng a reh theih nan khawvel pumah ṭawngṭairualna hun an hmang a. Thenzawla UPCI Kohhran member te pawhin mahni in ṭheuhah an hmang.
• 
  
• Vawk leh Bawng talh tur nei ten In lamah fimkhur takin an talh a. Vawk talhtu ṭhenkhat chuan, mihring tan pawh duh anga eitur a hnianghnar loh laiin, ran/ chaw a hautak vanga talh an nih thu an sawi.
• 
  
• Vawiin chawhma khan Thenzawl Police Station ah Serchhip Addl. SP Pu PC. Lalṭanpuia hovin infuihtharna leh Pathian hnena inhlanna an hmang a. PCI Field Veng Pastor Rev. R. Lalremruatan a hmanpui.
• 
  
•  Nitin mamawh bungrua leh thildang phur Lirthei rawn lut a tlem sawt hle a. Mipui ten harsatna lian tham lutuk la tawk lo mahse, nitin mamawh a luhbelh zel loh chuan, dawrkai ten stock an  ngah tawh lo hlawm a. Hmalam hun tur sawilawk thiam a har.
• 
  
• Thenzawl Town Task Force Committee chuan dawr neitute a theih chen cheng mipui nitin mamawh eitur lak tum turin an ngen.
• 
  
• Task Force Committee ten a tul anga miharsa leh ṭanpui ngaite ṭanpui nana an hman turin Pawl, Kohhran leh mimal, mi inphal leh ṭhahnemngai engemawzat ten Pawisa an hlan a. Hetianga midang tana mi inphal ten Task Force Committee hnena pawisa an pek tlingkhawm hi Cheng nuai hnih chuang fe a ni tawh a. Naktuah ṭapuina petute hi rawn tarlan tum a ni ang.

- Liantluanga Renthlei

Editor, Vantawng Newspaper

Youtube Channel: https://youtu.be/Kl46pyemcz4