Wildlife Videographer & Photographer Zakhuma

# Nature in Focus- Film Show at Bangalore 2017, 
# Balipara Foundation Award on Conservation 2018
# camera ropui leh tha tak a hmang lova, Canon SX60 (Bridge Camera) a hmang


Mizo zinga Wildlife Videographer & Photographer hriathlawh Zakhuma kan belchiang.

Wildlife Videographer & Photographer Zakhuma hi West Phaileng khua , Mamit district a awm niin,  Tluangkipa (L) leh Lianthangpuii te fapa niin Jan 11, 1981 khan a lo piang a. Unau paruk niin, Mipa pali leh Hmeichhia pahnih an ni.

Zirna lamah pawl 10 zovin, April 13, 2008 tuna a hna Dampa Tiger Reserve hnuaia Tiger Protection Force hi a zawm a, a zawm ni atanga he thu ziah a nih lai thleng hian Contract basisi in kum tina tihnun thar ngaiin a la thawk ta a ni.

Tiger protection force hi hna awlai lo tak, an ven tur ber pawhin a tihnat leh beih hlauhawm a ni a, Sa hlauhawm leh tihbaiawm tak mai venhimna chu mahni nun thap tak meuh meuhin hlawh tlemte, kumtin deuh thawa tihnun thar reng ngaiin contract basis in an thawk tihna a nih chu.

Zakhuma hian Tiger Protection Force ah hian ramngaw humhalh leh venhim bakah hian ramsa leh Dampa Tiger Reserve chhunga nungcha leh thing leh mau awmte thlalaka document atana dahthat bakah Researcher leh expert te leh helai hmun tlawhtute kaihhruai chu a hna ber a ni. 

He hna hi a tan chuan hna a ni satliah lova mawhphurhna a ni a, tuina a ni tel a, a nun khaw tinuamtu pakhat  a ni tel.

 

Zakhuma hian 2014-15 chhung khan thla 13 chhung Green Hub- Video Documentation Centre, Tezpur ah Wildlife film siam dan a zir a ni.

A hnathawh that vang hian chawimawin a dawng tawh a, mahse, heng chawimawina a dawn te hi a inpekna leh a thawhrimna nen tehkhin chuan a ne pawh a ek pha lo a ni. Chung chawimawina a dawnte chu; Nature in Focus- Film Show at Bangalore 2017, Balipara Foundation Award on Conservation 2018 bakah PCCF in Indian Forest Service (IFS) rual a chawimawi rualin Outstanding Worker chawimawina a hlan ve a ni.

Mizoram tana Wildlife document tha tak tak hnutchhiah tawh leh hnutchhiah mektu hian camera ropui leh tha tak a hmang lova, Canon SX60 (Bridge Camera) a hmang a, a man pawh hi cheng 28,000 atanga cheng 30,000 man vel chauh a ni. Khawl tha zawk, tuihnuai lak theihna camera, Drone camera leh tunlai khawvel mila khawl changkang leh tha zawk hi department lam hian ngaihtuah thei phei se chuan Forest Department mai bakah Mizoram tan leh khawvel tan hian Wildlife document a va hnutchhiah hnem dawn lua em!

 

Wildlife film a siam chhung hian Mihring anga chutin khatin in-pose rawh u tih theih an ni si lova, karkhat chhung teh meuh thla lak tur hmu lova a hlawhchham chang a tam thu sawiin, chetsual leh thing atanga tlak te, suar leh hmun chheng chhe tak taka kal changa mahni nunna tan pawha hlauhawmna hmuna chet fo a tul thu a sawi a.

Ramsate hi beih kan tum hmasak loh emaw kan tih hmasak loh emaw chuan min beih mai mai hi an tum lem lo niin a sawi bawk.

Zakhuma hian thla/Video a lak tawh-ah March 19, 2009 a kelral video a lak chu a ngaihhlut ber thu a sawi.

A thawhna hmun, Dampa Tiger Reserve chu zirna atana hmang duhte tan Wildlife Warden atanga phalna lakin a hman reng theih thu a sawi a.

Dampa Tiger Reserve chhung zirbing nei tawh leh tlawh tawh zingah Mizo aiin hnam dangin tih tak takna an nei a, an sehhelin an tumah an chiang a, an hlawhtling zawk fo bawk niin a sawi a. Mizo chu a kaihruaitu/guide nih a chakawm loh thu sawiin, an chhel tawk lova, sawisel tur an ngahin ei leh in an duhtui fo niin a sawi bawk.

Hnam dangte chuan a tul chuan dangpuithu pawh an ei bawrh bawrh a, chhun leh zan-ah pawh an duhna hmunah chuan an kal tauh tauh a, zing an tho hmain an tuarchhel zawk thu a sawi.

 

Zirbing beitute zingah hnam dang chuan a takin Dampa Tiger Reserve an fang a, an zirchiang a, an beih fan fan laiin Mizo kal vete chu rest house atanga mi dang ruai chhawnga zirbing bei an awm leh thin nia sawiin, pawi a tih thu a sawi.

hetiang chingte  hian zirlaite hnenah engnge an zirtir ang? tih hi hriatthiam a har a, dawtin degree an la ang a, dawt hmang bawkin hna an hmu ang a, dawt bawk an zirtir dawn tihna a ni.

Zakhuma chuan Wildlife lam hi Mizo zingah tui an tam tawk lo nia a hriat thu sawiin,  Dampa Tiger Reserve pawh Mizo aiin hnam dangin inzirnan leh thil dangah an chhawr zawk a, Mizo zingah hetiang lam tuipui an la tam lo nia a hriat thu a sawi.

Wildlife Film a siam dan chungchangah shoot turin topic emaw scene base a kal a theih loh thu sawiin, kan la tawp tawp a, a hnuah kan remkhawm leh mai a ti a. Mihring film siam ang a, khati zawng khan lo awm teh u tih theih a ni lova, ramsa chu an awm dan ang anga keimahni insiamrem leh khami mila story kan siam zawk a ngai a ni a ti.

Tin, Hetianga Wildlife Videography leh Photography lama tui tur chuan mihring taksa fit a tul a, kham chhengchhe tak tak leh hmun awih tak taka chet chang a tam a, chung atan chuan infit lo tan chuan chet ngaihna a awm lo niin a sawi.

  

Dampa Tiger Reserve chhunga hian zirtur a tam thu leh mithiam zawkte tan mahni ram chhungah mahni tawng ngeia kaihruaitu awm chungin awlsam taka Ph.D neih theihna a nih thu sawiin, zirmite chu hetiang lama tan la turin a ngen tak meuh meuh a. Thawktuten Mizo zirlai an rin ngam loh fo thin thu sawiin, Mizo zirlaite an chhel tawk lova, kan ring tawk lo fo thin, he kan ngaihdan thiattu tur hi kan mamawh a  ni  ati.

Mizoram School of Photography in chawimawina an hlan

Tunhnai mai khan Mizoram School of Photography, Aizawl chuan Zakhuma pualin hun an buatsaih a, he hunah hian Nature Conservation Award an hlan bawk a ni.


(Explore Mizoram Logo chuanna tih loh thlalak dang zawng hi chu Mizoram School of Photography ta vek a ni.)

- H Zate

founder

Explore Mizoram

(A hnuaia fakna hi lo hmet ve kauh rawh le.)

2021:

Aizawl | August 10, 2021: August 11,.2021 chhun dar 11:00 khan Video Conference kaltlangin Environment Forests & Climate Change Department minister Pu TJ Lalnuntluanga chuan Dampa Tiger Reserve-ah sakei a awm tih a puang.

Wildlife Institute of India Camera trap-in May 16, 2021 khan sakei thla hi a la fuh a. He camera trap hi Dampa Tiger Reserve-a Wildlife Guard Pu Zakhuma kam a ni.

Dampa Tiger Reserve-ah sakei a awm ngei tih puangin Pu TJ Lalnuntluanga chuan hun rei tak chhung sakei hnuhma hmuh a nih tawh loh hnuah Mizo pa, Pu Zakhuma'n sakei thla a la fuh chu chhuanawm a tih thu a sawi a. Dampa Tiger Reserve chu nungcha humhalhna hmun danglam bik a ni tiin Department-a thawktute leh a chhehvela chengte chu nungcha humhalhna kawngah thawhhona tha tak nei chhunzawm zel turin a sawm a ni. Minister chuan EF&CC Department-a thawktute, Fied Director leh Pu Zakhuma, Wildlife Guard, Dampa Tiger Reserve te bakah Wildlife Institute of India te hnenah lawmthu a sawi bawk.

Video Conference kaltlanga meeting hi Pu Liandawla, Principal Secretary & PCCF chuan a kaihhruai a. Pu Liankima Lailung, Chief Wildlife Warden chuan sakei thla lak a nih dan a report a. Dr Lallianpuii Kawlni, Scientist C, Wildlife Institute of India chuan Dampa Tiger Reserve-a zirchianna kalpui mek a nih dan sawiin Dampa Tiger Reserve-a sakei thlalak chu Wildlife Institute of India chuan finfiahin a nemnghehpui tawh thu a sawi a ni.

He video conference-ah hian Mizoram-a Environment humhalhna kawnga NGO-te leh mi thahnemngai ten nungcha humhalhna kawnga hmalak dan tur hrang hrangte an sawiho zui nghal a ni.

- DIPR