Ngaihsan zawng nei turin mihring nih a tawk



Hmanni deuh ah Basketball player Kobe Bryant thih hlimchhawnah khan amah uina leh chumi kaihhnawihah social media tapchhakah tualchhung thu leng vak hmuh tur a awm nual a....Amah ngaisangtu leh uitute thu post leh chumi post kaihhnawiha lo deusawhna rawngkai hmuh tur a awm nual.

Mi ngaihsan zawng nei tur hian seniority list an siam emaw, an chanchin an hriat thuk zawng leh hriatna rei zawng eligibility/qualification an siam awm ka hre lova. Tu pawhin mi ngaihsan emaw ui a neih chuan a chhan leh vang chu eng ang a tlem pawh ni se a nun ah engemaw kawng zawng talin a tha zawng a nghawng a neih ve ek ek a, mihring a nih phawt chuan a tawk ah kei chuan ka ngai mai...

Kei lah pek hi Basketball nen a inkungkaihna ka neih chhun hi a beitham khawp a. Naupan deuh laiin ka secondhand kawr pakhat hmaah 'Chicago Bulls' a inziah ve ngial kha a ni titih mai awm e. ka ngaihtuah ngial a, hmanni deuh ah Babutlangah futsal khelh tum a kan kal a an lo phalloh kha basketball nen a kan inkungkaihna hnaivai deuh chu a ni leh deuh thawr.

Kiltin kiltang ka dap a, chu aia basketball nen inkungkaihna thuk kan neih chu ka thianpa pakhat basketball atchilh em em mai ( a a bawk a a chilh tak tak bawk) Lalhruai Tluanga ( Vikings) hi a ni leh deuh tawp.

Tuikuk laklet chungchang te, CAB sawi lai te a rem leh rem lova Basketball lo sawi ve ziah hian kum 5 vel kalta khan (kum 14 lai a lo tuipui ve tawh hnuah) a nu in 'Kobe jersey ang' a leisak hi a rawn intihtheih pui chiam tawh a...Kobe pawh hre lemlo khan a hlut dan tur ka hrethiam lemlo a, Basketball a atchilh em avangin naupan laiin thianten superstar an neih laia Bruce Lee pheikhawk ang 'kungfu shoe' ka neih thar tirh a ka lawmna ai khan a nep bik loh erawh ka ring ve tawp.

He pa vek hi "Kan veng tleirawl inkhawm ah hun ka chang a, min rawn tawiawm ve ta che" a tih tum a ka va ngaihthlaksak ve pawhin 'Basketball' chanchin tho a lo sawi!

Amah vek hian tum khat chu a meitha sakawr( tawng zet mai) a min phurh tum hian tlangval pakhat kawng sir a lo kal phei hnak hnak hi kan tawk a.A han be lumlam nual a, kan kal leh hnu chuan a mi biak chu basketball tui tak, cancer natna in a tihbuai...basketball khel a a natna inhehtir duh miahlo a nih thu te, airport atanga a lo thlen hlim ah pawh basketball khel tura a insiam nghal thu te min hrilh nual a.

Heti hian ka ngaihtuah zui ta.Thil thenkhat hi chu kan hriat phakloh leh kan hmuhpui loh tamtak hi a lo awm a ni. Khelmuala 'ball ben sawh' a thirbial a thehluh piahlam hi a lo awm a ni. Hringnun khelmual a hringnun ball bensawh a, hringnun thirkual a thehluh nen hian a lo insuihfin chial a nih dawn hi...Chu chu mi thenkhat hi chuan an lo nunpui a lo ni.

Amah fam ta Kobe Bryant te ngei pawh kha...Khatiang dinhmun a thlenna ah khan khatiang dinhmun ai mahin khatiang dinhmun a thlenna tur a a kawng zawhna kha mi tamtak tan hringnun zirlai pawimawh, chona leh fuihna hmanraw pawimawh tak a lo tling si a.

Kobe Bryant an a sawi fo thin, chhungkua a ngaihpawimawhna te, pa a nihna ang a hun harsa ah pawh tlanchhe lo leh chhuanlam siam lova huaisen taka hmachhawn a a fate tan entawn tur a a awm thin thu a sawi te kha ' Kristian chhungkaw campaign' nei thin te hian kan entawn atan a va tha tehlul. Chhungkua hi zirna in hmasa ber, sande sikul hmasa ber leh damdawiin hmasa ber a nihna hriat phah nan tal hmang thei ila a va duhawm tak em.

Degree 102 a sang khawsik nei chung a inkhelh te, a nupui fanau te damlo a enkawl a ngaih avanga mu lova a inkhelh te, an inkhelh tum a a ke na chung a khelh luih te kha a harsatna paltlang tamtak zing a keiin ka lo hriat ve chhun te chu an ni mai chauh zawk a...

Mi thenkhat hi chu an danglam bik a, sum leh pai emaw lei ropuina lallukhum an khum chhah vang ni lovin midang nun ah a tha zawng a nghawng an neihna hi a ropui lai tak chu niin ka hria...

Ngaihsan zawng nei tur hian mihring i nih a, i nun ah a tha zawng a nghawng an neih a tawk.

- Ruata Royte


(A hnuaia fakna awm hi i lo hmet ve kauh dawn nia.)

Post a Comment

0 Comments