Mizoram Bawm Zirlaiten inkhawmpui nei; President atan Lianhmingthanga Leihang

Hmunlai | Feb 28, 2020: Mizoram Bawm Students' Association (MBSA) chuan nimin piah zan aṭang khan Hmunlai, Lawngtlai district ah inkhawmpui vawi 4-na hmangin vawiin khan ro an rel a, Bawm hnam hmasawnna tur relin hruaitu thar an thlang a, president thar atan Lianhmingthanga Leihang an thlang.


MBSA chuan MBSA General conference chu kum khat danah neih a, inkhawmpui loh kumah rorel inkhawm neih a rawt a, Bawm hnam lam leh hnam thuam chawisan kawnga hma lak an rel a, Bawm hlabu a tam thei ang ber chhut an rel bawk.

Palai kalkhawmte hian MBSA  Kum 2020 - 2022 chhunga hruaitu tur thlangin president atan Lianhmingthanga Leihang, vice president atan V Lalṭanzuala, general secretary atan Johan Vanlalhmangaiha, assistant general secretary atan Isak Lalhmahruaizova, treasurer atan Lalkros-enga, leh finance secretary atan Vanlalzuia te an thlang.

MBSA inkhawmpui hi nilaini zan khan ṭanin, nimin chhun khan infiamna hrang hrangah inelin an intihlim a, nizan khan vantlang inkhawmah Mizoram  IGP  (Law & Order) LH Shanliana IPS chuan khuallian niin hun a hmanpui a, Lai Autonomous District Council (LADC) Member of District Council (MDC) Andrew B Laltlanzara chu khualzahawm a ni.

MBSA chuan Jeho Himnakulhpuingheta chu Bawm Personality of the Year Award an hlan bawk.

Vawiin chawhnu khan Vantlang inkhawm neiin, LADC Chief executive member (CEM) T Zakunga chuan khuallian niin hun a hmanpui.

Khuallian chuan Zirna uar a pawimawh thu sawiin, LADC pawhin zirna atan hma lain central service a ṭhalaite an luh theih nan hma a lak thu a sawi a. MBSA memberte chu ṭan la turin a chah.

Hnam anga dinchhuah nana zirna pawimawh zia leh Zofate hi inlungrual taka lengza tur kan nih thu a sawi bawk.

He huna thusawitu MZP General Headquarters general secretary Lalnunmawia Pautu chuan, Zofate inpumkhat a pawimawh zia sawiin, MZP chuan hei hi tlangaupui reng thu sawiin, Hnam hmasawnna atana zirlaite chu an zirnaah theihtawp chhuaha ṭan la a, nu leh pate zah tak chung ṭang sauh sauh turin a chah a. Mahni tan chauh ni lova, Ram leh hnam hmangaih chunga ram leh hnam tana zir tel turin a chah bawk.

Lalnunmawia Pautu chuan,  Zofate hi Inthen hrang tham kan awm lova, inpumkhat zawk tur kan ni a. Thisena unau zofate hi Mahni hnam tawng theuh humhalh a pawimawh a, kan hnam ṭawng ṭheuh hmang a, humhalh a chawi vul chung hian Zofate hian inpumkhatna kawng kan zawh a ṭul a ni a ti a. Zirlaite chu chhawr tlak ni tura zir turin a chah bawk.


He huna thusawitu MBSA president  nilai Vanlaltirhkoha chuan, "Lehkhathiam chu hman tlak a ni tur a ni. Eng hna pawh thawk se, lehkhathiam chu chhawrtlak leh hman tlak a ni ngei tur a ni," a ti a. "Ṭhalaiten kan thiam zawng leh tuina, eizawnna tlak leh hman tlak ngei tura theihtawp chhuah rawh u," tiin zirlai kal khawmte a chah.

MBSA president chuan sawi chhunzawmin, "Hlawhtling tur hi theih loh a awm lova, Retheihna hi hlawhtlinna kawng daltu atana chhuanlam a tling lo," a ti bawk.

He inkhawmpui hi Mizo Zirlai Pawl (MZP) general Headquarters aṭangin general secretary Lalnunmawia Pautu leh hruaitu dangte'n an hmanpui a, Lai Students' Association general headquarters aṭangin vice president MC Vanlalrova leh associate general secretary Salai C Vanramdinmawi  ten an hmanpui bawk.

Post a Comment

2 Comments

He post chungchanga i ngaihdan lo sawi ve rawh: