Cancer leh HIV/AIDS vei tam kawnga India rama pakhatna nih hi kristianna nen a inhmeh lo - Dr Thangtea

Aizawl | Feb 19, 2020: Health & Family Welfare Minister Dr R Lalthangliana chuan, “Cancer leh HIV/AIDS vei tam kawnga India rama pakhatna nih hi kristianna nen a inhmeh lo a ni” a ti.



He thu hi Dr Malsawma Hriselna Hla Music Video tlangzarh Inkhawm, Synod Conference Hall-a vawiin a neih ah sawiin Health Minister chuan, a chhe zawnga kan ramin dinhmun sang a luah mekna pahnih - HIV/AIDS leh Cancer natna chu Health department changtu Minister a nihna ang pawha veiawm a tih thu leh he chona hlen chhuak tur pawha theihtawp a chhuah thu a sawi a. Minister chuan hnam pum huapin mahni hriselna kan ngaih pawimawh lehzual a tul thu leh hetih mek laia Dr.Malsawma’n hriselna inzirtirna hla tha tak tak mai phuah a music video hial a siam thei hian mite thinlungah rah tha chhuah se a duh thu a sawi a ni.

Dr. Malsawma Hla Music Video Release takte hi hla 4 niin TB Doral Lian, Sikserh Ralpui, Cancer Thlentu leh Sim Rawh Awt tih hlate an ni a. YMA Ramhlun South Branch Zaipawl ten thiam leh mawi taka sa in Music Video hi buatsaih a ni.

He Music Video tlangzarhna inkhawm hi Dr.Eric Zomawia, Mission Director, NHM in kaihruaiin Pi Zopari, Ramhlun South in hunserh a hmang a. Pu Darchuailova Renthlei, Member General Council, Sahitya Akademi in Music Video Thlirlawkna hun a hman hnuah YMA Ramhlun South Branch Zaipawl ten zaiin mipui an awi a. Dr. Samuel Lalhruaizela, Assistant Professor ZMC in lawmthu sawiin hun hnung a khar a ni.

- DIPR

Post a Comment

0 Comments