Aizawl | January 10, 2020: Mizoram Tourism Department leh Tripura Zo Kutpui Organizing Committee tangkawpin an buatsaih ni thum awh tur Nimin atanga tan tawh, Zo Kutpui Vanghmun khua, Tripura a neih chu vawiin khan Chief Minister Zoramthanga chuan Kut Pa niin a hmanpui.
He hunah hian Food and Civil Supplies & Corporate Affairs Minister K Lalrinliana chu Kut Uaptu niin, Tourism Minister Robert Romawia Royte chu Kut Thlengtu a ni a.
Kut Pa Chief Minister Zoramthanga chuan Zofate inpumkhatna pawimawh thu leh hmasawnna atan remna a tul thu a sawi a. Jampui tlangdung a Zofa chengte chu an mamawh hrang hrangte tihlawhtlin sak theih dan tur ngaihtuahsak a theihtawp chhuah a nih tur thu a sawi bawk. Chief Minister chuan Zoram hi Pathianin malsawmna tam tak a pek a, chu malsawmna ruai chu mi tin, mi hausa leh mi rethei ten an kil phak theih tura chawihniam chu kan hmabak a ni tiin, sawrkar bakah pawl leh mimal tin te hma kan lak tlan a pawimawh a ni, a ti a.
Chief Minister chuan hnam inpumkhatna tura hmun tin a Zofate thawh leh beihna te chu a nep loh thu a sawi a. Mizoram chu remna sual chhuak tawh state niin, remna in hmasawnna a thlen dan pawh hriat a ni a. Mizoram chhehvel state leh thenawm ram ten remna an siamna turah Mizoram an lo rawn thin tawh thu a sawi a. He remna hi tu mimal emaw pawl pakhat avang chauh ni lovin Pathian kaihhruaina vang vek a nih thu Pu Zoramthanga chuan a sawi a ni.
Zo Kutpui hi nimin khan Inpumkhatna Seminar nei a hman tan a ni a. Vawiin hian vantlang inkhawm leh cultural programme a hun hman niin, naktukah vantlang inkhawm buatsaih lehin kut hi khar a ni ang. Vawiin Zo Kutpui chawhma vantlang Inkhawm hi Organising Committee Chairman J Lalthangmawia'n a kaihruai.
Kut chhim tur hian Mizoram leh Tripura atangin Zohnahthlak thahnem tak an kalkhawm a ni.
Chief Minister hian kut a hmanpui bakah nimin leh vawiin khan Zampui tlangdung a khaw hrang hrang tlawhin, mipuite nen inkawmna hun a hmanpui bakah vantlang mamawh an thlente chu tihlawhtling tura theihtawp a chhuah tur thu a sawi a ni.
Post a Comment
He post chungchanga i ngaihdan lo sawi ve rawh: