JNU Zirlai leh Alumni ten lungawi lohna lantir; JNU a zir mekte tan chauh ni lovin nakina zirlai la ni turte tan pawh a ni - Jonellie

 

Aizawl | January 10, 2020: Jawahar Lal Nehru University (JNU) New Delhi Campus a zirlai leh zirtirtute chunga rawng taka kut thlakna leh rikrapna thleng chungchanga duh lohna leh lungawi lohna lantirin vawiin khan Vanapa Hall Kawt, Aizawl-ah JNU Zirla leh Alumni-te an pungkhawm.

Pungkhawmte hian JNU Campus a Zirlaite leh Zirtirtute thlabar taka siam a, January 5, 2020 zana thil thleng chu an dem tak zet thu leh thuneitute chu henga inhnamhnawihte chunga dan anga rorel ngei tura an duh thute an tarlang.

  

Hetia JNU buaina intanna hi Zirlaiten Fee sang thut an duh lohna an lantirna atanga intan a ni a. JNU a buaina chhuah laia a hmuna awm, JNU School of International Studies hnuaia Ph.D kum hnihna bei mektu Jonellie Rinpuii chuan, "hostel fee thla tin 2400 atanga 3000 te kan chawi thin laiin, fee tharah chuan room rent leh electric bill pe tel turin min ti a, Cheng sangruk atanga sang sarih vel kan chawi a ngai tawh dawn a, he thil hi duh lovin Zirlaite chuan kan dodal ta a ni," a ti a. "Tuna kan beih hi JNU a zai mekte tan chauh ni lovin nakina zirlai la ni turte tan pawh a ni," a ti bawk.

 

"JNU ah hian Mizoram atanga Zirlai 17 an awm thu leh hliam tuar erawh an awm lo," niin Jonellie Rinpuii chuan a sawi.

  

Mizo Zirlaite chu Delhi Mizoram Liason Officer tanpuinain Delhi a Mizoram Police ten hmun himah hruaichhuakin Mizoram House ah an awm a ni.

 

January 5, 2020 tlai dar nga vela ABVP leh misual rualin JNU Campus an beih  lai hian Delhi Police a hmunah thleng mahse, engmah hma an la lova. Zirlaite leh Zirturte pawh beiin kut an thlak a, hmeichhe pawh an zuah lo a ni. He thil vang hian mi engemaw zatin hliam an tuar a. Heng pawikhawihtute hi mi 200 rual vel an ni a, Iron Rod, Tuboh leh thing leh hmanraw dang kengin an hmai an tuam a, tunge an nih erawh hriat theih an ni lo niin kan thu dawnna chuan a sawi.