Honorary Master of Music Degree Mizo Zaithiam PC Vanlalhriati hlan

Aizawl | January 11, 2020: Youth Icon 2012 top 5 Nula Pc Vanlalhriati (Tenu-i) Saitual khua, tuna Aizawl Laipuitlang a khawsa mek chu vawiin khan Union Biblical Seminary Yangoon (UBS) leh University dang pahnih IHOP University Kansas nena tangkawp chuan Master of Music Degree Honourary an hlan.

Hriati hi Zoram dung leh vanga Pathian faka zaia rawngbawlna nei zinga chhuak nasa pawl tak a ni a. PATHIAN in a hmang em em a, a hla sak te pawh Pathian in a hmang nasa hle atih theih awm e, “Khita hming an lam hun chuan ka awm ang” tih hla asak phei kha chu vawiin tlenga mite ngaihthlak nasat niin, he hla hi mite hriat larna pawh a tih theih hial awm e. 2012 Youth Icon a tel hnuin  hla a tichhuak ve nual tawh a, ngaihthlak pawh a hlawh hlawm hle.

Harsat mangan lai ber leh bawrhsawm lai ber pawha a zui tlat țhin Pathian chuan a rawng bawlna kawng zawh chu  zauh sak zelin Zoram pawn thlenga hriat hlawh a lo ni chho a, Tahan, Yangoon, Manipur leh Tripura lamah te leh Mizoram hmun hrang hrang ah rawngbawlna a nei țhin a ni. 

Hriati hi Bible society of india Auxiliary Aizawl ah hian Soloist niin, BSI rawngbawlna hmun hrang hrang ah sawm țhin a ni a, Salvation army rawngbawlna lamah pawh zai a rawngbawltu a ni mek.

Synod Revival Speaker te pawh zui țhinin, zai a sawm tu a neihna a piang ah Pathian fakin a zai mai țhin a ni.

'Mi chawimawi la keiin ka chawisang ang che,' a tih ang ngeiin a chawimawi țhin leh a chawimawi mek Pathian chuan chawi sang zelin he chawimawi na ropui tak Master of Music Degree Honourary hi hlan a lo ni ta hial a ni. Pathian neitu leh vuan tlat tu te hi Pathian hian  a ensan ngailo a, he lei ah pawh Lalpan a chawimawi let țhin ani tih Tenu-i atang hian kan hre thei awm e.

Tenu-i chuan, "Ka bul țanna ka ngaihtuahin hetiang degree la thei tur hian ka in beisei ngailo a, chu pawh ramdang daih ah leh nghal, a bik takin ka zaithiam pui te ah pawh kei aia la awm ngawih ngawih vek an ni a.Vawiin ni ah he chawimawina ka la ta mai hi mak ka ti a, Pathian remruat ani tih pawh achiang hle in ka hria, Zaia rawngbawlna a ke ka pen dawn hian ka zam ve em em a, harsa tak kan ni a,nu leh pa leh nau pa 1 ka nei a. Theih ang ang in ka zai chho ve ta zel a, ka pa hi kum 2013 khan a hna ațanga a chawlh tak avang khan ka chhung te pawh heng zai a rawngbawlna ațang hian ka en kawl chho ve a Pathian hi kan chhungkaw tan a rinawm em em a,vawiin ni thleng hian chaw kan la nghei ngai lova,Pathian hausakna tem pha tu, Pathian intum chawpna Jehova Jireh hi ka chakna a ni fo thin a ni." a ti a.

Sawi chhunzawmin, "Tin, he degree ka laktheihna ni bera ka hriat chu zai a rawngbawlna ah hian anuam hmun vek kan kal ngailova, tam zawk hi chu thingtlang kilkhawr tak tak hmun ah te kan kal țhin a, ke a kan kal chang lah atam ve bawk a ni. Nimahse rawngbawlna tur a nih phawt chuan hmun nuam leh nuamlo lam hi ka thlir ngai lem lova sum leh pai te pawh min pe dawn lo tih hre lawk țhin mah ila mahni inseng so te pawha ka kal chang  atam bawk a, mahse chu hmunah chuan Lalpan ka tan min țanpuitu alo dah zawk țhin a ni. Pathian tana thuawih tak leh lawm tak a ka kal mai țhinna rah kha a ni," a ti.

Tenu-i hian Pathian rawngbawltu kan nih hian tlawm taka awm phawt mai hi ațha ber niin a sawi a, rawngbawlna hi hmuhfiah a pawimawh em em a, a nuam chin ringawt thliar lova rawngbawlna hmun hrehawm ber ni a kan ngaih na ah pawh hian hlimna thuruk, lawmna thuruk,kan chhar zawk fo thin a. Pathian tana kan inpekna,kan rah chin a san poh leh malsawmna kan beisei aia nasa zawkin min vur țhin a, Pathian tana kan thil tih tê ber pawh hi Lalpan min chhinchhiahsak tlat a, a tana rinawm taka rawngbawltu te chu a hun takah a chawisang țhin a ni tiin Mizo Zaithiamte Chanchin a hrilh.

Tenu-i hi Pathian fakhla sa țhin ho pawl pakhat "Gospel United Mizoram" ah hian member niin Executive Commitee member a ni mek a.

A Bible chang in nghahna chu Joba 8:7 thu “I bul lamah te mahla i tawp lamah i lian ang” tih a ni.

He chawimawina Master of Music Degree Honourary hi Hlaphuah thiam leh zaithiam ni bawk C Lalzarmawia (Lunglei) pawhin vawiin vek khan a dawng a, kan chhuang takzet a ni.

~ Vanlalruata Pautu

Mizo Zaithiamte Chanchin