KAWNPUI CENTENARY MEI DET A NI; KHAWTLANG MIPUIIN AN HLUT HLE

Aizawl | January 11, 2020: Kawnpui khua kum 100 tlin lawmna, Centenary Mei det chu nizan khan Kawnpui khuaa tlang pahnih, Helipad tlang leh Vangmawi tlangah te a ruala neih a ni a. Mei detnaa kal mipui an thahnem hle.

 Kawnpui khua hi Kolasib District a awm niin, Aizawl aṭanga kalin Kolasib district headuarter Kolasib khua thlen hmaah awmin, SDO ṭhuthmun a ni.

Mei mit lova Kawnpui luah a nih kum 100 na, Centenary hi kumin chhung hian kumtluanin activity hrang hrang hmanga lawm chhoh zel tum a ni a. Kum tawp lamah a khaw nawtin ruai nen ropui taka hun hman tum a ni bawk.

Helipad tlanga Centenary Mei detna chu Pu R. Zonunsanga, Programme Committee Chairman-in a kaihruai a. Pu H. Lalfakzuala VCP, Org. Vice Chairman chuan Centenary hawnna thuchah chhiar chhuakin, Pu R. Thangchuailova, Senior Citizen chuan Centenary hawnna mei a det a. Vangmawi tlangah chuan Tv Nicky Lalthlamuana, Programme Committee-in kaihruaiin Pu K. Laldawngliana VCP, Org. Vice Chairman chuan hawnna thuchah a chhiar chhuak a, Pu RL. Zasanga, Ex-VCP Kawnpui chuan Centenary Mei a det bawk.

Helipad tlanga mei dettu Pu R. Thangchuailova chuan, 'Kawnpui khuain kum 100 a tlin kum, kumin hi Kawnpui mipuiten inngeih kum, inlungrual kum, inhmangaih kum leh tawngtai kumah i hmang ang u,' a ti a. Vangmawi tlang lama mei dettu Pu RL. Zasanga pawhin, Kawnpui khua-in kum 100 tlin a lawm thei mai chu lawmawm a tih thu leh a lunglen thu te a sawi a, he hun hmang theia a la dam chu nihlawh a intih thu sawiin, he hun hmang theia la dam, Kawnpui mipui zawng zawngte pawh an nihlawh hle a ni a ti.

Centenary Mei det a nih hnu hian Centenary meithal lawn a ni a, Halmawi chi hrang hrang halin Centenary hawnna hun hi hman a ni. Centenary mei det hi khawtlang mipuiin an hlut hle a, mei detna hmun pahnih tlang zawl khat tlata mipui an punkhawm bâkah, a hmun thleng ve theilote pawhin, halmawi chi hrang hrang an hal te chu khawchhung hmun hrang hrang atanga lo thlirin an lo lawm bawk a ni.

Reported by LT Varte

CENTENARY HAWNNA THUCHAH

Mizoram khaw tam tak zingah, kum 100 (Centenary) lawm thei hi khaw tam an la awm kher lo maithei. Keini hovin Kawnpui Centenary kan thleng thei hi malsawm bîkna liau liau a ni a, (kan) Pathian hnenah pawh lawmthu kan sawi a ni.

▪ Kawnpui Centenary kan tih hian; Mei mit lova Kawnpui luah a nih ațanga chhût a ni a. Kum 1920 hma lam daih tawh, 1880 velah te pawh khan Kawnpuiah hian mihring an lo cheng tawh țhin a. Amaherawhchu, rauhsan leh chângte a awm țhin avangin, mei mit lova Kawnpui luah leh țan a nih, kum 1920 ațanga chhûtin, kumin 2020 hi Kawnpui kum 100 tlinna, Centenary atan pawmin ropui taka lawm tura inbuatsaih chhoh mek zel a ni ta a ni.

▪ Zanin mei det zan ațang hian Kawnpui Centenary lawmna programme chu a ințan ta a, thla leh maiah khian Centenary pualin Football-a inelna, YMA branch hrang hrang tan buatsaih lehnghal a ni dawn a. Tichuan, thla tin programme hrang hrang nei chhovin, naupang ber ațanga upa ber thleng pawha hlim taka kan hman țheuh theih nan, kan Centenary hi kumtluana lawm tum a ni a. Kum tawp lamah a khaw nawtin ruai nen ropui taka hun hman tum a ni bawk a ni.

▪ Mi tam tak, he hun thleng phalo an awm laia, zanin, Kawnpui Centenary hawn zan, mei det zan kan thleng bik hi lawm nachang hria ila, zanin hi hlim takin i hmang ang u.

▪ Centenary hlawhtling tak kan hman ngei theih nan, mi tin leh chhungtin ten kan tih theih tâwkah țhahnem ngai țheuh ila, Kawnpui Centenary atan hian i insengso hreh lovang u. Tun bak hi chu kan lawm leh har viau tawh dawn a nia.

Rilru hmunkhat pu-a, khaw inlungrual leh pumkhat kan lo nih zel theih nan leh, hlim leh tluang taka Kawnpui Centenary hi kan hman theih nan; He 'Kawnpui Kum 100' (Centenary) hi lawm takin ka hawng e.