Remsiami'n a chawrchhuahna a theihnghilh lo; Naupang Hockey a zirtir thin

Aizawl | December 16, 2019: India fanu chhuanawm, Mizoram fanu rangkachak leh EXPLOREMIZORAM.COM Ambassador Lalremsiami Hmar India hmeichhe hockey player chuan tlawmte aṭanga ropui tak ni tura a chawr chhuahna a theihnghilh lova, a hrereng.

A hre reng mai a ni lo, a chawrchhuahna tan hlan let neih ve tumin a bei mek.

Tunlai hian Lalremsiami Hmar chu chawlh hmangin a lo haw a. A chawlh hahdamna hun hlu tak chu hahdamna satliah nan a hmang lo.

Zing khaw var rualin a thova, Kolasib College veng fanu chhuanawm hian an veng naupang Hockey a tui leh zir duhte zirtir nan zing leh tlaiah a hun a hmang ṭhin.

  

Football khelhmualah Hockey tui naupang rual chu a zirtir ṭhin a. An thawkrim bawk a, hma an sawn phah hle niin kan thu dawnna chuan a sawi.

Naupang te te chuan a changin an in kawtah a thawh hun an nghak a, an kaitho bawk a. Hockey thiam tumin an rilru leh thinlung an pe a. Lalremsiami hnuaia thiam ngei tumin an bei bawk.

Lalremsiami pawhin an tumna leh tuina te a hmuhin, 'hahdam turin lo haw a lawm ka nih,' tia chawlhsan mai lovin zing takah a thova, Naupang rilru thianghlim tak takte chu a theihtawp chhuahin Hockey khelh a zirtir thin.

 

An inzirtir leh inkhelh chungchang chu, "Football ground-ah pawhtui tak leh nuam ti takin kan khel hi a, Hockey ground ah ngei han nise a va'n nuam leh zual dawn em," tiin Lalremsiami chuan a sawi.

Lalremsiami hi India Hockey Player chhuanvawr ni chho mekin, Mizoram mai bakah Mizo hming a timawi em em a. Retheihna leh harsatna hmachhawnin a hnehban a, hlawhtlinna tlang chhip a lawn a ni.

  

Lalremsiami 2000 March 30 khan Lalthansanga (L) leh Lalzarmawii te fanu ni turin a lo piang a. SAI hnuaiah Hockey khelh zirin India Hockey Player chhuanvawr  a lo ni ta a ni.

 

Lalremsiami hian chawimawina hrang hrang chi 8 chuang dawng tawhin chung zingah chuan Women's world cup , London 2018 (Women of the match in Quarterfinals),  Senior Women's Asian champion trophy, Korea  2018 (Raising star of the tournament),  Asian hockey federation (Raising Star of the year 2018),  Inter Railway  tournament , Punjab 2018 ( Women of the match), Usam Award 2018 - Best young female player leh Best sports women te chu a langsar zual te an ni a. Tunah hian Explore Mizoram ( www.exploremizoram.com ),  leh Mizoram University ambassador a ni mek.

Lalremsiami Kawmna hetah a awm.

Lalremsiami chanchin English Version

 _________________

TT Arts, Chanmari Aizawl-ah T Shirt print hrang hrang an ti thei a, Explore Mizoram T Shirt pawh cheng 450 in lei tur a awm bawk e.

Call/ WhatsApp +919615332721