WHILE MY GUITAR GENTLY WEEPS

========================

- Dustin Lalkulhpuia 

(November thla thlah na'n, November ni 22, 1968-a The Beatles hla an tihchhuah 'While My Guitar Gently Weeps' hi tlem ka rawn sawi zau teh ang.)

Kum 1968 khan Liverpool tlangval rualte din, The Beatles, band chuan sakhuana lam thu zirchiang turin India an pan a. Hei hi a chhawr bertu chu an tingtang perhtu (lead guitarist), George Harrison a ni ngei ang le...

Bhuddism zirtirna leh chhuahlam ramte philosophy chuan George Harrison chu a hneh ngei mai.

The Beatles kan sawi apiangin mi pahnih hming langsar bik a awm ziah thin. Anni chu John Lennon leh Sir Paul McCartney te an ni. A chanchin kan sawi mek, he an tingtangpu George Harrison-a hi chu an zingah chuan bung kung bula khiang kung pakhat ding ve ang chauh a ni. Mahse, India ram atanga a rawn kir hnuah erawh khawvela hla ropui berte zinga mi ni fo tawh tur 'While My Guitar Gently Weeps' tih chu a ziak ta chat mai! A hming hi khawvel awm chhung chu a dai tawh ngai lo vang.

India atanga a kir leh hnuah George Harrison chuan a nu leh pate chenna hmun Warrington, Cheshire a pan nghal a. Ni khat chu Chinese lehkhabu 'I Ching' (The Book of Changes) tih chu a chhiar a. Amah Harrison-a ngeiin thil thlen chhunzawm dan chu hetiang hian a sawi:

"Kha lehkhabu kha chhuahlam ram mite ngaihdana (Eastern concept) innghat niin, anni chuan keini, khawthlang mite ang lo takin, thil thleng engkim mai hi chhan neia thleng vek a ni a, a zavaiin a inzawm vek a ni. Chhiatna emaw vanneihna thlen chhan a awm thin tihna a nih chu.

He philosophy, 'Idea of Relativism' [an tih mai] behchhan hian Harrison chuan a bul hnaia awm lehkhabu chu a han la a, a keu phel phawk a, a thu hmuh hmasak ber chu, 'Gently Weeps' tih a ni. He thu hmang hian hla chu a ziak ta!

Chu hla chu a band-mate-te hnenah a la a, vawi tam an han rem chhin a, a duhthu a sam thei lo. A tawpah chuan, a thian, Eric Clapton-a a len chilh ta rawih mai a... Chu hlaa guitar part chu perh turin a sawm a, ani chuan a perhsak ta a... Tun thlenga guitar ri mawi chungchuang berte zingah a tel ta hial!

Hei hi a tlar hmasa ber chu a ni:

"I look at you all see the love there that's sleeping."

Kan khawvel hi Harrison-a chuan a han thlir a, khawih danglam tawh minungte chenna ram a ni tih chiang takin a hmu. Khawvel mihring zawng zawngte nun dan chu a han mitthla a, mihring nihnaa bet tlat 'hmangaihna leh midangte tana thil tha tih duhna' te chu hmuh tur a awm ta lo va, thawm nei lovin a muhilin bawrh bawrh tawh tih a hmu chiang hle a ni.

He tlar hian khawvel mihringte mai ni lo, anmahni band, The Beatles ten larna leh ropuina an chan hnua an inkara hmangaihna theihnghilh a nih takziate pawh a tarlang chiang hle a ni. Chu thil, mihringte neih hlu ber, mangnghilh ni ta, hmangaihna chu neih let leh tumin theihtawp a chhuah a: a tingtang kuahin a han zut vel a, mahse chu tingtang chu a lungngai a, a rum a, a aw rawl chuan mawina reng a nei ta lo:

"while my guitar gently weeps."

Khawvel hial a kephah hnuaia daha a lo awp theih tawhna hmarua, a tingtang, 'Lucy' tia a hming a vuah pawh chu hmangaihna ngaiin a rum a, a ri mawia mipui lam hut hutte chuan a aw rawla hmangaihna thuchah inphum ru ai chuan nawmchenna leh hawhawna chauh chu an hrethiam ta zawk a ni.

"I look at the floor and I see it needs sweeping"

Chang hnihnaah heti hian a han kai leh a: chhuat chu ka han thlir a, bal leh hnawk tinrengte ka hmu a. Chu chu khawvel chu a ni a, phiah fai ngai, thenfai ngai chu a ni. Hmangaihna chuan kan leika rawn kaiin kan tap-lumte hi rawn pan leh mawlh teh se, tia duhthu samin a tingtang nen chuan an tap dun ta rawih rawih mai a ni.

"I don't know how nobody told you

How to unfold your love

I don't know how someone controlled you 

They bought and sold you."

Ni, kei leh nang hi chu khawvela bo mekte chu kan ni e. Capitalism khawvel chuan kei leh nang chu bungrua ang maia hralh leh lei theihah min siam ta a... Tlawmngai tak tak mi ni tur chuan office kal loh, sum sen, tha sen leh hrehawm tawrh a ngai tih pawh kan hrethiam ta lo. Engkim chu pawisa hmanga chhut a ni zo ta a, kan thil tih engkim chu sum-paia hlawkna hmanga chhut a ni zel ta! Hmangaihna chu nek sawr a ni a, mahni tisa puarna kan zawn suau suai laiin kawtthlerah Hmangaihna chu a lo tlu thal der mai.

Ni e, hmangaihna thu chu chhung tin in chhungah sawi tam a ni ta lo. Mi mawl nih duh lovin mahni hamthatna tur kan dap zo ta a, thenawmpa nihlawhna emaw ngaihtuah chu mi mawl nihna a ni zo ta!

"With every mistake we must surely be learning

Still my guitar gently weeps."

Eastern philosophy chuan thil thleng engkim chu chhan neia thleng a ni, an ti kan tih tawh kha maw... Ni e, he chhiatna rapthlak tak: mihring ropuina thuruk hupbeh leh phum bova a awm ta mai hi, kei leh nang thiam loh a ni e. Nang leh kei hian college tlai emaw office thulha thenawmpa dam lo tlawh atanga kan tan a ngai a ni. Attendence a chhiat i hlau va, Private-a thawk i nih si avangin hlawh cut i hlau a ni mai thei... Mahse, chhungrila hmangaihna muthlu mek kaih thawh chu he khawvel tan hian a tangkai hle si a...

Tingtang chu a tap a, a rum a; a mittui hial a hnam tak hi. Chu tingtang chuan kan hnenah hian khawvel rohlu 'Hmangaihna' thehdarh tumin rimawi a chhuah thin a, keini chuan hlimhlawp na'n leh nawmsip bawl na'n a rimawi chu kan lo hmang hlauh si! A awrawl chu ngun takin ngaithla la, haw la, i thenawmte va hmangaih zawk ta che!