HSA General Assembly vawi 57-na Saiphai-ah nei; Hruaitu thar tur thlang

Aizawl | November 29, 2019: Hmar Students' Association (HSA) general assembly vawi 57-na chu nizan aṭang khan HK Dohnuna Hall, Saiphai-ah neih ṭan a ni a, Vawiin khan rorelin kum 2019 - 2023 chhunga hruaitu thar tur an thlang nghal a, he term thupui atan hian 'Zirna thiltihtheihna' (power of education) chu lungrual takin an pawm.

Rorel-ah hian rorel palai Mizoram bakah Assam, Manipur, Meghalaya leh hmun dang aṭangin 120 an tel a. Inkhawmpui palai pawh an tam hle.

Rorel palaite chuan HSA general headquarters Office Bearers ni laite chu Assistant General Secretary tih loh chu lungrual takin chuhtu awm lovin an thlang nawn a, AGS pawh chuhtu awm lo thova thlan a ni.

President atan Pu L Rothanglien Khawbung, Aizawl thlangin, vice president atan Simon L Infimate, Shillong, General Secretary atan

Josef V Tuolor, Muolhoi, Asst. G. Secretary-

Lalruolkhum Hmar, leh

Finance Secretary atan Nula L Margereth Infimate, Churachandpur te an thlang.

Heng bakah hian rorel palai kalkhawnte hian Assembly secretariat tur an thlang nghal a, Speaker atan Lalringum Sanate, Deputy Speaker atan Rothangkhum Sungte,  Assembly Secretary atan Lalringum Riengsete leh Dy Assembly Secretary atan John L Puruolte te an thlang bawk.

HSA Assembly hi naktuk leh naktip hian chhunzawm a ni ang a, naktip zanah a ṭiak ang. Naktuk hian Power minister R Lalzirliana chuan khuallian niin hun a hmanpui ang a, Pathianni hian Speaker atan Lalnghinglova Hmar hmangin Pathian Biak Inkhawm an nei dawn bawk a ni.