KS KAN NI VE SI LO

#THUHMA:::: A hmasa in chibai u le, tun ṭum chu in ngaihtuahna ka hruai kawi dawn🤭te ti vel ila. PIALRALAH TAL AW kha a lo tawp takah chuan, hei ka rawn ziak leh dawn e aw. In chhiar duh zawng a nih ngei ka beisei, khawngaihin min lo chhiar chhuah sak leh hram dawn a nia, ka lawm e.

KS KAN NI VE SI LO

CHAPTER--1

BY:- Rs Thangluah✍🏼

         081917

®LALREMSANGA®

Zan hmasa lama kan inhauh avang chuan zing lam boruak pawh a nuam lo khawp mai. Mahse, hmeichhe ṭha tak leh fel ngang a ni a, engkim theihnghilh in ṭha takin min rawn be leh a;

"Morning, nizan i muṭha em? Kei chu ka muṭha lutuk a, mumang pawh ka nei lo🤭."

"Immm morning le, muṭha a ni mai e."

Ka mood a la fuh chiah loh vang chuan ka chhang ṭha peih vak lova.

"Vawiin chu i hman ang tiraw?"

"Imm hman ang."

"I la thinrim reng a ni maw?"

"Thinrim tawh love, ka ṭha lawm."

"Min chhang hmuk hmuk a nihkha."

"Engmah ni lo, ka insiam mek a. Ka insiam zawhah ka kal ang aw."

"Chaw i ei hman maw? Ka van tibuai ṭhin tak che êm!."

"Imm ei hman e, a ho lutuk kan tih theih ve tawk a nih hi. Kal hma a ngai si a, i thawh hma khan chaw ka ei fel vek tawh a lawm."

"Imm nihchuan a lawmawm lutuk e, kei pawh rawng te ka bawl ang a, kan in buatsaih ve ṭan ang e aw."

"Awle ka kal a ni deuh mai aw."

"Awle."

Ka insiam zawh chuan hmanhmawh phelengin Kulikawn Damdawiina kal turin ka chhuak nghal a. Chhuah rual rualin ruah a la rawn sur zui a, pawi ka ti lo khawp mai. Taxi Stand ka thlen hma chu ka do chho ngat ngat a, 2 Wheeler Taxi Stand ka thlen chhoh chuan a hân ve leh mai bawk a. 2 Wheeler Taxi ding tumah an lo awm lova, ka nghak det a, rei vak lo hnuah Bike 1 chu a rawn ding a,"Ka pu, i hman theih em?"

"Khawiah nge?"

"Kulikawn Damdawiinah."

"Ê, ka hman tawh lo ang a, midang lo nghak mai ta che aw."

"E aw awle, a pawi love."

Sana ka bih chhen tawh mai, dar 8:30am a ri dawn tak ngial. Dar 9:00am ah OPD Card lakna an hawng a, chumi hma chuan ka thlen phei a ngai a ni. Rei vak lo hnuah Scooty 1 a rawn ding leh hlauh mai,"A hman theih em le?"

"Aw khawi lamah nge ni ang?"

"Kulikawn Damdawiinah a nia."

"Awle lo kal la."

Hmeichhia a la ni zui a, a fel phian leh nghal a. Ruah chu a rawn hmi leh seng seng a; mahse, a tla tam lem lo. Taxi khalhtu nu chuan,"Ruah a tla ni maw? Ka Rain coat khan lo in khuh ve mai rawh aw,"a rawn ti a. A rain coat chu ka en a, a lian hle tak mai a,"Aih a ngai lo, a sur tam hleinem,"ka lo ti vat a.

Ruah a tlak chep che reng avangin Kulikawn Damdawiin thlen hma kawng zau laiah chuan min drop a,"Hetah hian ka drop mai ang che aw. Kawng a nal si a, khulai kawng chhuk khu ka tlan ngam chiah lo. Min hrethiam mai dawn nia aw,"a inthlahrun hmel ang reng khawp mai. Mahse, kei pawn tun ang nalah chuan tu phurh ah mah ka chuang ngam bik teuh lo,"Aw a pawi lo, heta ṭang chuan a hnai tawh tho a lawm. Engzat tur nge le?"

"₹ 50 a ni mai, i in entir dawn em ni?"

"Aw kan in entir ang e, ₹ 50 maw?,"a fare chu a tlem ka tih êm vangin mak ka ti hle mai. A nui hawk hawk a,"Aw ni e, dam deuhin i lo haw dawn nia aw."

"Awle tehreng mai, ka lawm lutuk e aw,"ka Wallet aṭang chuan ₹ 50 chu ka phawrh a, ka pe nghal a. Ani pawh chuan lawmthu min hrilh mawlh mawlh chungin min tlansan leh nghal a.

Kulikawn Damdawiin chu ka thleng thla ta. Kulikawn Damdawiin tak hi ka kal ngai loh vangin engmah chin chang ka la hre lova. Tun ṭum ka kal pawh hi ka bo map map khawp mai, Damdawiin ka thlen chuan dar 9:05am vel a ni tawh a. OPD Card lakna pawh ka hre miah lo, Main Building-ah chuan ka lut phei pawp a. Nurse duty leh staff ṭhenkhat ho an lo awm nual a, ka hmuh hmasak ber bulah chuan,"OPD Card a lak theih em?,"ka ti thawr mai a. Chunu chuan ṭha takin OPD Card lakna a nih loh thu leh OPD Card lakna chu a chhakah a nih thu te, an la hawn loh thu te min hrilh a. Zak tak chungin ka chhuak leh a, chhak lamah chuan ka chho a. Midang pawh ka hmu nual mai; mahse, tumah ka be hran lo. Ṭhutna âwlah chhan ka ṭhu ve tawp a, ka tih tur hre lo chuan Phone ka khal ka khal a. Zorempuii chu ka text leh ringawt a;

"Ka thleng phei chiah aw, OPD an lo la hawng lova. Kan la nghak mek, hmanhmawh lutuk duh suh aw."

A la buai a ni ngei ang, chhanna ka dawng thei lo. Midang awm ve ho chuan Card lakna chu dar 10:00am velah daih an hawn ṭhin thu an sawi ka hria a. Ka van ngei tak, zing dar 7:30am velah ka chhuak a, hmanhmawh phelengin ka kal kha a ni a. Mahse, tlai aichuan nghaktu nih hi a ṭha zawk ngai e.

Dar 10:00am velah chuan OPD Card lak pawh chu an rawn hawng ve ta a. Nghaktu kan tam vak lo bawk a, in line pawh a ngai lem lo. Zorempuii card tur chu ka la chhuak a, a in entirna tur hmunah chuan ka theh lut nghal a. Ka theh luh fel vek hnuah chuan ka call nghal a;

"Aw ka hman ṭep aw."

"Imm hmanhmawh lutuk duh suh. Doctor pawh a la rawn kal lo, i card chu ka theh lut tawh aw."

"Awi ka van lawm ṭhin tak êm! Ka lo chhuak dawn chiah e aw."

"Awle hei ruah a tla chep chep reng a, rawn inthuam lum ṭha la, nihliap kha rawn ken theihnghilh lo bawk la aw."

"Yes boss theihnghilh lo ang, nih ka dah phawt ang aw."

"Awle i rawn thlen dawnah min lo hrilh leh la aw."

"Awle bye phawt."

"Bye le."

Ka bulah chuan hmeichhe tleirawl la naupan hmel deuh hi a ṭhu ve a. Min nêl reuh phian leh nghal a, eng eng emaw sawiin kan ti ti siam siam a. 

"I eng nge i entir dawn a?"

"Keimah tak chu ka in entir dawn lova. Ka ṭhiannu ka kalpui a, card ka lo lak sak a, amah phei chu a lo thleng lo. Nang zawk i eng nge i entir dawn a?"

"Ka hapui hi a na ṭhin a, tunah pawh hei a vûng. En lawk teh a vûng lian viau em?"

"Aih lian lutuk love, ha nâ hi chu a hrehawm êm a ni. Kei pawh hmanah ka hapui hi a na tawh a, kar 1 chhung chaw ei thei lovin chhangthawp chawhkawi ka ring tawp tawh."

A nui har har a, a ṭawng duhin a fel reuh phian leh nghal a. Kan ti ti dun malh malh lai chuan, Zorempuii message a lo thleng a;

"Ka lo thleng ṭep aw."

"Awle ka lo nghak che."

A out leh nghal daih a, a lo thleng hnai tawh a nih ka ring a. Main gate lam pan chuan ka va ngai chang deuh a, rei vak lo hnuah chuan a rawn lang ve mai bawk a. A rawn nui nghal sen sen a,"Ka rei em? Ka hman hmawh lutuk a, inchei pawh ka inchei uluk hman lo,"a lo ti nghal mawlh mawlh a. A bag chu ka lo khai sak vat a,"Rei love, nang chu inchei loh pawn i chhe lo tho a lawm,"ka ti chiah chu min melh rum teh a sin aw.

In entir tur ho chu an tam lo bawk a, Rempuii pawh an lo ko lut nghal vat a. Rei ngial a thang hnu chuan a rawn chhuak ve ta hram a,"Damdawi min leipui lawk la,"a rawn nui leh sen sen a. Damdawi lei tur chuan Damdawi Canteen lamah chuan kan chhukthla hnak hnak a. Damdawi kan lei zawh chuan kan haw chho nghal a, Kulikawn kawn thleng Taxi-in kan kal a, thil lei duh a neih vangin Dawr a hmuh apiangah chuan min luhpui a. Thil te hi a duh tui thei si.

Kalna tur dang ka neih vangin Rempuii chu ka thlah a, ka kalna turah chuan ka kal tlang nghal a. Ke ngat ngata kal ka ni bawk a, ka ke zungṭang te chu an na tawh takzet a ni. Mahse, motor-a chuan hi ka peih loh êm vangin ke ngat ngatin ka kalna tur lam pan chuan ka kal hnak hnak a. 

®ZOREMPUII®

In ka thleng chu ka chau takzet a ni. Remsanga chu ka text nghal zat a;

"I thleng tawh em? Ka buai nghal char char dawn a. Ka hman veleh ka lo call ang che aw,"tiin message ka hnut chhiah a. 

Ka nu chuan ka in entirna lehkha vel chu min en sak a, chanchin min zawh pahin in enkawl ṭha turin min hrilh mawlh mawlh bawk a. Ka pa chuan,"Nula i ni ve tawh a, i taksa hriselna tal hi chu uluk ve teh. I dam loh pawn in entir tura tirh ṭawng ṭawng i ngai ṭhin hi chu a buaithlak a ni,"a lo ti ve bawk a. Nia, zep lo chuan Damdawiin kal vel hi ka peih lo ve êm a ni.

Ka inthlak zung zung a, ka nu eirawng bawl chu ka pui nghal a. Eng eng emaw ka ngaihtuah kual a, zan hmasa lama Remsanga nen kan inhauh dan te kha ka ngaihtuah kual a. Khati khawp khan ka lakah a thinrim a; mahse, zingah erawh engmah a sawi chhunzawm tawh lem lo. A mood a la fuh chiah lo tih kha chu ka hria; mahse, zingah pawh ṭha deuhin ka tan engkim a ti leh vek tho. Hepa hi chu aw mi pakhat chu a ni ve chiang a lawm.

Bai ka siam lai chuan Remsanga Phone call a rawn thleng a, ka chhang rang kher mai. Mahse, ka pa in min lo melh rum hle a ni;

"Aw Hello."

"I buai em?"

"Ei rawng ka bawl a."

"E nihchuan ka tibuai lutuk palh ang che a. I pa a awm em?"

"Immm."

"A melh rum leh viau tawh lo che maw?"

"Imm chutiang vel chu a ni. I la haw lo nge?"

"Aw haw lo deuh, tlaiah law law ka haw ang. Ka ke a na lutuk a."

"Bus-ah te hian chuang ve mai ṭhin la. I inren lutuk hi chu a buaithlak a ni."

"Chutiang pawh a ni lo, a hranpa in exer ka la peih si lova. Chhuah chang chuan ke a kal hi ka duh ṭhin a."

"Hmm a nih tak chu a, ka dah phawt dawn aw. Ka hman hunah ka lo bia ang che."

"I pa in a melh rum che a ni maw? Imm a nih bye."

"Awle bye."

Ka pa chuan Chanchin phek chhiar pahin,"Ei rawng bawl lai chuan Phone khawih loh tur a nia,"a la rawn ti zui a. Ngawi rengin ka Phone chu ka ak a, ka bai siam lai chu ka chawk ka chawk ringawt a.

Hmeichhe nih hi a chang chuan ka ning thut ṭhin. Tih tur tam si, a awm âwl ve mai mai theih bawk si loh. Duh duh naah len ve theih bawk si loh, huiham. Class kal hunah class kan kal tawp a, ban hunah nise khawiah mah ka leng kual ven ngam ṭhin bawk si lo. 

Ka pa hi Kohhran Upa a ni a, kawng engkimah a khirh em em ti ila ka sawi sual lo ang. Zanah pawh inkhawm leh hla zir vel a nih loh chuan chhuah a phal ngai meuh lo. Unau 3 kan ni a, keimah chiah hmeichhia ka nih bakah naupang ber ka ni bawk si a. Min duat viau rualin a ham strick thei lutuk hi chu ka ning ve lek lek ṭhin. Mahse, ka ṭhatna tur duh tu a ni miau si a, a thu chu ka zawm lo ngai lo.

Class kal turin ka insiam malh malh a, Mami lah hi a rawn tlai leh dawn a ni ngei ngei ang. Nitin nghah ziah a ngai mai, ninawm thei lutuk. 

"Bawih, min lo nghak rei tawh em?,"a rawn tlai lo ve teh khiah a.

"Rei love, i piangthar nge i sana a dik lo zawk?,"ka lo ti let thung a, a lungawi lo teh a sin.

"Over em mai a, in pa chu min la hmuh tir ve duh miah lova,"a ner nghal nung nung a.

"Eee lungngai suh, hnê hluiin i la hmu dawn a lawm,"ka nui zui hawk hawk a.

"Hmmm min hmuh tir loh vaih aw, i chak lo ang maw le."

"Yes hmuh tir dawn chiang lutuk che, vawiinah kan inhmu dawn a lawm."

"Yes a hmelṭha em?,"ti leh nghal vat tawh, henu em em hi chu aw.

"Immm Angel hawlthlak a ni mai. Mahse, min chuhpui tum lo la aw."

"A chhiat loh viau chuan ka chuhpui tho ang che,"a la ti ham ham zui a.

"Zak teh zak teh, i phû lo. Awiii kal tawh ang, kan tlai hma in."

"Nia, kal ang in pa chu aw,"a la ti hram a. 

Garage aṭangin Scooty ka la chhuak a, ka ti nung vut vut a. Mami chuan nui uar uar chungin,"Awiii Zorempui, vawiin i Scooty tlan ni a ni lo,"a rawn ti mai chu ka van ngei tak. Hmanhmawh tawh nen chuan a van in mil lo ṭhin tak êm!