DETECTIVE JANE - 2

CHAPTER--2

BY:- Rs Thangluah

®LALRUATSANGA(RSA)®

Ṭhianpa Roy a ngaihawm khawp mai. Tunah chuan a tel lovin hna kan thawh a ngai tawh dawn si a. Sitting room lamah chuan Amy leh Jane pawh an buai khawp mai. Jane chu ka lam panin a rawn kal a,"Pu Ruata te In lamah lo va kal la, keini 2 Police Station lamah kan lo va kal ang e aw,"tih pah chuan min rawn nuih seih a. He hmeichhe duhawm zia hi chu aw,"Awle,"ka lo ti vat a, a biangah chuan ka fawp zauh a. Amy chuan,"Het ka awm lai chuan insum ve deuh u la,"lungawi lo tih hriat zet hian a rawn ner nghal nung nung a. Jane chuan nui chungin,"Kan hmu lo che a,"tih pahin ka biangah chuan min rawn fawp ve leh zauh a. Amy chu kan inkarah a rawn ding nghal auh mai,"Hna thawh a hun e, in chhai hun a ni lo. Pu Ruata te Inah va kal nghal rawh,"tih pahin ka Helmet leh Bike chahbi chu min rawn pe nghal vat a. Nui var var chungin Pu Ruata te Ina kal tur chuan ka chhuak nghal a.

Pu Ruata te hi chhungkaw khawsa thei tak an ni a. Tuna an fanu kidnap tu pawh hi an chhungkaw khawsak phung leh chhungkaw nei nung tak an ni tih hre chiangtu a ni ngeiin ka ring a ni. Police ho chuan rinhlelh thu hlaah mi 4 chu an hreng tawh ngei a. Mahse, heng an mi hren te zingah hian kidnapper chu a tel ve em tih erawh kan la chiang thei lo a ni.

Pu Ruata'n ka hmel a hmuh chuan ka lam panin a rawn kal nghal vat a,"Hei thu thar kan dawng leh tawh a. Kan fanu rubo tu chuan a awmna hmun pawh a rawn sawi tawh e,"tiin a Phone chu min rawn pe nghal a, SMS an dawn chu ka chhiar nghal mual mual a;

"Vawiin hi ni 25 a ni twh a, in fanu nunna hi in hlut tk2 a nhchuan tun thla ral ni 30 ah hian 20 lakhs nen Tuirialah lo kal ag che. Mhs, police nen in rwn kal a nihcuan i fanu hi a ruag hlwm tur pwh i hmu lo ang. Ni 30 zan dar 11:00pm-ah Tuirial Airfield-ah aw, rwn tlai suh ag ce."

A message lah chu type uluk lo em em mai leh nghal a. Police Station lam ka be nghal vat a, an mi hren te chu kidnapper an nih loh thu ka hrilh nghal bawk a. 

"In fanu hian ngaihzawng emaw ṭhian kawmfal bik emaw a neih âwm in hria em?,"tiin ka zawt leh chawt mai a. Pu Ruata chuan,"Ngaihzawng tak chu a neih âwm ka hre miah lova. Mahse, mipa 1 ṭhian kawmfal bik hi chu a nei,"mak tih hmel zet chuan min en a. Ka lo nui mai a,"In fanu ṭhianpa chu a address kim chang min hrilh theih chuan a lawmawm viau ang,"ka ti nghal zat a.

"Ka van hre mai love aw, a hming erawh chu ka la hria. Max a nia, an in classmate a."

"Khawi School-ah nge in fanu hi a kal le?"

"St. Pauls HSS ah a kal a."

"Awle, a ṭhianpa hming chu Max maw?"

"Aw ni e."

"Ka lawm e, eng emaw thleng a awm chuan hei ka number-ah hian min lo call mai dawn nia aw,"tiin ka number ka pe a, ka chhuak leh nghal a.

St. Pauls HSS lam pan chuan ka ving phei ta a, Melody ṭhianpa Max chu ka va zawng nghal a. Mahse, an Brother 1 chuan Melody bo aṭangin School-ah a rawn kal ngai tawh loh thu min lo hrilh ta si. Max address te chu ka zawt nghal a, ṭha deuhin min hrilh a. Max chu ka zawng nghal chuk chuk a, a tawp a tawpah chuan an chenna Inah ngei ka hmu thei ta. A nu nen chauha khawsa an lo ni a, a nu chuan Melody bo aṭangin a mut mumal loh thu te, thil a ei duh loh thu te a lo sawi luam a. Max chu ka en a, mutmu tuah ṭha lo tih hriat takin a lo meng sen râm a. A lainat awm ve hle mai, zawhna ka neih ang ang te chu ka zawt nghal mawlh mawlh a.

"Melody bo ni khan in inhmu em?,"tiin bul ka ṭan nghal a.

"Aw hmu e, School ban ah pawh Bus Stand thleng ka thlah.

"Chubak chu i hmu zui tawh lova?"

"Aw zanah khan ka text char char a, min reply thei si lova. Vawi 10 vel ka call hnuah pawh ka call tlang thei lo, ka lakah thinrimna a nei a nih ka ring a biak chhunzawm ka tum ta lova. Class-ah ngaihdam ka dil mai ang tiin ka rilru ka siam a; mahse, ka thu hriat khan min ṭhawng ve khawp mai,"a rilru a nat ve hmel khawp mai. A chal a dawm vang vang a,"Ani kha ka ṭhian ṭha ber a ni a sin,"a rawn ti zawi sap a. 

"A chhungte number hriat i nei miah lo em ni?

"Aih nei lo, zep lo chuan a chhungte nen hian kan in close vak lova. An Inah pawh ka leng khat lutuk, aman min sawm a nih loh chuan ka leng ngai lo."

"A nih tak chu, a bo thu i hriat tirh khan engtinnge i awm?,"ti a ka zawhna chu mittui tling pamin min chhang a.

"Chanchinbu-ah khan ka hmu a, ka hmuh tirh chuan ka awmdan pawh ka hre lo. Ka mit deuh sulhin ka hria, amah bak ka rilruah a awm thei lo. A hlauh dan tur leh a mangan tur zia te ka ngaihtuah a, ka lainat a ka rilru a na bawk a ni. Ka hriat tirh chuan kan 2 a kan kalna ṭhin hmunah te ka zawng kual a. Mahse, a hmel hmuh tur a awm si lo,"a kun ngawih ngawih a, a insut ri hraih a ka khawngaih reuh khawp mai.

"Engmah zep leh thup ṭhen nei lovin ka zawhna te min chhan zel ka beisei a nia aw."

"Awle tehreng mai, ka ṭhian ṭha ber nunna chhanna tur a nih dawn phawt chuan eng pawh ka huam a lawm."

"Melody hian haw tu emaw bialpa emaw a nei em?"

"Aih chutiang a neih âwm ka hre lo. Bialpa phei chu a ngaihsak lem lo, kan 2 hian kan inkawm tawk em am a ni mai."

"A bo hma emaw vel khan amahah danglamna eng emaw awmin i hria em?"

"Chutiang a awm pawh in ka hre lo, engtik lai mai pawh hian a hlim thei em em reng ṭhin."

"A nih tak chu, an Ina i len chang chuan a chhungte chuan an lo be ṭha ve tho che em?"

"Be ṭha lo chu ka ti lo; mahse, kan dinhmun a in thlauh êm vang hian an Ina lawi lut tam lo tur erawh chuan min duh tih ka hai lo. Chuvang chuan a nia, amah hian min sawm loh chuan an Inah hian ka len luh ngai loh."

"Nihchuan, amah hi in Inah a rawn leng ve ṭhin em?"

"Aw kan Inah chuan a rawn leng lut ngun lutuk. Anu pawh hi Anu tiin a ko ve mai a, kan In hi chu a In pakhat ang a ni mai."

"Nangmah lo hi biak leh kawm a nei em?"

"Aw nei ve tho a; mahse, keimah anga pawh taka kawm erawh a neih ka hre lo. Mahse, kan class-a kan senior 1 hian a ngaizawng ve deuh tih erawh ka hria. Mahse, Melody zawk hian a be ṭha ngai lem lo."

"Chupa chu an veng i hria em?"

"Dawrpui Vengtharah a awm."

"E ti daih ila, thla 1 liam ta a in School kalpui tho, thluak cancer vanga boral ta kha i hria em?"

"Lalrinpuia kha maw? Hria e, Section 1 ah kan awm ṭhin a lawm."

"A Phone number i nei em?"

"Aih nei miah lo kan in pawh em em lova, class vela kan inbiak bak hi chu pawn lamah chuan kan inbe lem lo."

"Chuan, Melody ngaizawng ve tu chu a hming min hrilh thei ang em?"

"Aw hrilh thei e, Liansangpuia a nia."

"Awle, ka zawhna te ṭha takin min chhang a ka lawm lutuk a nia. Eng pawh nise, in ti chak la School pawh ṭha takin kal leh la. Chaw ei ṭha la, mu ṭha bawk la aw, i ṭhiannu chu dam takin kan hmu leh em em ang tih ka tiam a che,"tiin ka chhuahsan leh nghal a.

St. Pauls HSS lamah bawk chuan ka in khalh phei leh a, School an ban hma ngei a ka mi zawn chu hmuh ka duh a ni. Zawn hmuh a harsa lo e, an zirtirtu te phalna thlain ka ko hrang a. Hun erawh min pek tam loh vangin zawhna tam pawh ka zawt thei dawn lo;

"Melody bo chungchangah zawhna tlem zawh che ka duh a, khawngaihin engmah zep nei lovin min chhang dawn nia aw."

"Awle."

"Melody nen hian eng inzawmna nge in neih le?"

A nui suk a,"In zawmna tih ah, in zawmna thuk tak chu a ni lo. Kan inbe ve satliah a ni mai."

"In ngaihzawn chu in ingaizawng lova?."

"Aih ngaizawng lo, biak mai mai ang kha ni mai."

"Chuan, i ngaizawng a?"

Za vak lo hian a nui a,"Aaa aw a dik a lawm; mahse, amah hian ngaihzawng biakin min be ngai lo."

"A bo thu i hriat khan a ṭhawng viau che em?"

"Aw min ṭhawng ve khawp mai, mak ka ti a ka rilru a nâ a ka thin a rim bawk."

"A number hi a bo hnuah i call leh chhin tawh hrim hrim em?"

"Aw call ṭhin e, nitin ka call ṭhin. Mahse, ka call tlang thei ngai lo."

"Nihchuan, zawhna 1 leh chiah thla 1 liam ta a. In class-a mipa 1 boral ta Lalrinpuia kha i hre ngai em?"

"Aw hria e, kan junior ni mah se, kan inkawm nasa a. A felin kawm a nuam si a, ani kha chu ka ngai ṭhin ngawt mai."

"Chuan, a number vel pawh ila nei ngei ang a?"

"A boral aṭanga kar 1 na velah khan ka delete daih tawh."

"A nihtak chu, ka lawm lutuk e aw. Ka kal phawt ang e,"tiin ka kalsan leh rih a.

Mak deuh mai chu Melody chhungte khan an fanu a bo ni khan, engvanginnge an fanu chu an call mai loh le? Amah call lovin a ṭhiante leh an chhungkhat laina te an call daih chhan hi eng nge ni ta ang le? Melody te In lamah bawk chuan ka in khalh thla leh a.

Pu Ruata te nupa leh an fapa te ber chu an lo awm a. Pu Ruata chuan file eng eng emaw hi a lo chhawp hnawk nuai mai a,"Kha i va buai awm ve a? Zawhna eng emaw zawh leh lawk che ka duh a,"ka ti nghal tawl a. Pu Ruata chuan,"Nia hei kan fanu tlan chhuahna tur sum kan buaipui a nih hi. I duh duh min zawt thei reng a nia,"a lo ti nghal vat a.

"In fanu a bo ni khan engvanginnge amah kha call lovin a ṭhiante leh in chhungte in call daih le?,"ti a ka zawt chu mak ti takin min en hâ mai a.

"Kan fanu hian Phone a nei hleinem,"tiin min chhang ta si, a van mak leh zel êm! A ṭhiante ho lahin vawi tam an call thu an sawi bawk si. Lu a van hai ṭan ve,"Mahse, a ṭhiante hian Phone a neih loh thu an sawi si lova,"ka ti chu mak tiin a meng kawk kawk mai. An fanu in Phone a nei tih an hria chu mak an tih hmel hlawm ngei mai. Pu Ruata chuan,"Bawihi hian Phone a nei maw? I chiang maw?,"a ti hû hû mai a. Max leh Liansangpuia nen kan inbiak dan tlangpui chu ka hrilh a. Melody nuṭa pa  pawh chuan mak ti takin min lo en hâ mai a, nu ber pawh a bang chuang lo. An fanu in Phone a neih thu an hriat chuan mak an ti em em a, a ngaihna pawh an hre hlawm lo a ni ber mai.

"Eng pawh nise, in fanu chuan a rukin Phone a lo kawl reng tihna a ni dawn a. A number hi a ṭhiante hnen aṭang khan a lak theih mai ang a, in fanu chu kan hmu let leh em em ang."

"Kan fanu rubo tu ₹20lakhs teh meuh kan fanu tlanchhuah nan hian a phût si a. Engtin nge maw kan tih dawn le? Tunah hian ₹10lakhs chu kan nei mai thei ang a; mahse, ₹10laks dang leh chu neih a har tawh ang. Kan fapa thil zirnaah kan inseng hnem ve tawh bawk si a, lu a van hai tak êm!,"a ti ve vawng vawng mai a.

"Hun a la awm a lawm, lungngai lo phawt u la. Police te nen kan ṭang rual ang a, in fanu chu dam takin kan hmu let leh em em ang. Eng pawh nise, ka kalsan phawt ang che u,"tiin In lamah ka haw san rih a.

Max hnen aṭang chuan Melody Phone number pawh kan nei thei ta. Vawi tam kan dial hnuah pawh a tlang thei lo, Jane chuan,"Melody hian engvanga Phone hi a ruka nei nge a nih le? Chhan ṭha tak chu a awm ngei ang le?,"a ti ve nuah nuah a. Amy chuan,"Aw a la naupang si a, a chhungte'n Phone neih an la phal lo ang a. Phone neih ve a duh si ang a, a rukin a nei a ni mai lo maw?,"a rawn ti ve bawk a.

"Nia, Amy rin dan kha ka rin dan chu a ni ve tho. Mahse, a chhungte hian chutiang engmah sawi an nei leh bawk si lo hi a mak leh na chu a ni. Mahse, an fanu in Phone a nei tih an hriat kha chuan an meng bial kak kak hlawm mai a lawm,"ka lo ti ve bawk a. Jane chuan,"Thil tih hmaih lian lutuk kan nei,"a rawn ti hluai a. Amy nen chuan,"Eng chu?,"kan lo ti rual ṭhat a. Jane chuan,"Kulikawn Bus Stand bula Dawr ṭhenkhat saw chuan Melody hi chu an hre ngeiin ka ring. Amy, a thlalak hi keng la, Kulikawn Bus stand bul hnaih a Dawr zawng zawng va zawt kual la. A bo ni khan Bus Stand-ah tu nen nge an awm tih leh, khawi lam panin nge a kal tih thlengin lo hriat tum ang che,"tiin Amy chu Melody thlalak a pe a, Amy pawh chu thu awih takin Kulikawn lam pan chuan a chhuak phei ve nghal a.

Jane chu a rawn thaw deuh hak a,"Pu Ruata te hnen aṭangin thu thar engmah a la awm lo tiraw?,"a rawn ti a.

"Aw awm lo, rinhlelh deuh erawh chu ka nei,"ka lo ti vat a. Jane chuan,"Tunge?,"a lo ti nghal vat a. 

"Liansangpuia hi ka ringhlel deuh a."

"Ani chu a ni dawn em ni? Melody lo ngaizawng ru ve deuhtu kha a ni lawm ni?"

"Ni e; mahse, he thil hi ama tih pawh a ni thei tho a sin."

"Ni e, a ni ve thei tho mai. Chuan, Liansangpuia chu kan target tur tihna?,"a mit ko a sân ûk a.

"Tunah chuan ni rih e. Kan Police ho hian Station lamah hruai se, chiang zawka thu zawh fiah a ṭha in ka hria."

Liansangpuia chu Melody rukbo a nih chung changah rinhlelh thu hlaah lak a ni ve ta. Police Station-ah chuan a hma aia chîk zawkin zawhna ka zawt leh ta a;

"Melody nen hian engtik aṭanginnge in in hriat tawh le?"

"Tun kum tir lam aṭang khan."

"A Phone number hi engtinnge i neih theih dan le?"

"Amah ka dil a."

"Phone a nei tih hi engtinnge i hriat?"

"A tirah chuan Phone a neih loh thu min hrilh a. Mahse, ka awih lova ka ṭhiannu ka dil tir leh a. Ka dil ka dil takah chuan min pe ve mai a; mahse, a number ka neih tirhin ka be nghal lo."

"Engtik hun velah nge in inbiak ṭhin tlangpui?"

"Zan dar 9:00pm hnu lam aṭangin kan inbe ṭhin. Zing leh chhunah erawh kan inbe ngai lo."

"Engvangin?"

"Zanah bak Phone a khawih hman loh thu leh chhunah chuan a buai ṭhin thu min hrilh a. Chuvang chuan, ka be lui ngai lo."

"I bialnu a ni lo takzet em?"

"Ka bialnu a ni chu ka ti ngam chiah lo. Mahse, biak erawh kan inbe ve nasa."

"Class ban hnu velah in 2 chauhin in chhuak dun tawh em? Emaw, chhun hunawl dangah School chawlh lai velin in chhuak dun tawh em?"

"Aih chhuak dun lo, chhuahpuiah chuan ka sawm ṭhin a. Mahse, a duh ngai lo."

"A ṭhianpa Max hi i hriat zawng a ni em?"

"Aw hria e, a best a nia."

"I ṭhianpa boral ta Lalrinpuia leh Melody te hi an inkawm ṭhin em?"

"Inkawm tih ah an inkawm tam lo."

"Lalrinpuia boral hnuah an Inah i kal leh tawh em?"

"Aih la kal miah lo."

"Awle, hetah hian i Phone number ziak rawh le."

A Phone number chu a ziak nghal mawlh mawlh a,"Melody hi ka rukbo a ni lo a nia aw,"a rawn ti sup a. 

"Ni e, kan hria a lawm. Melody kan hmuh hma chuan Mizoram mai ni lo, Aizawl khawpui hi i chhuahsan thei lo ang aw. Emergency-a chhuahna tur i nei a nihchuan Police 1 nen in kal thei ang."

"Eng a? Kidnapper pawh ka nih loh hi,"a âwki a san ve khang lang a. Ka thin in a tuar leh ta lo,"Ngawi hmak rawh, âw ki sângin min be reng reng suh. Tlanbo han tum vaih teh, tun ai hian i case a sang ang. Chuvang chuan thuawih deuh khan awm la, i tan a ṭha ni mai,"tih pah in  kawr awmah chuan ka ṭham nawk nawk a. Chutianga ka tih takah chuan min hlau ve deuh a ni ngei ang. Tlemin a zal deuh a,"Awle ka hria e, ka kal thei tawh ang em?,"a rawn ti zawi sup a. 

"Kal rawh, koh theih rengin awm ang che."

Jane chuan kut kuang kuah meuhin min lo thlir dauh dauh mai a,"I thin hi chu a chhe ve thlawt a lawm tiraw?,"tih pah chuan a nui zui har har a.

"Naupang te te si a âw ki a san ve khang lang a, ka hnek lo kha a vannei zawk a nihkha,"ka lo ti nghal bawrh bawrh a.