KS KAN NI VE SI LO - 2

CHAPTER--2

BY:- Rs Thangluah✍🏼

081917

®LALREMSANGA®

Rempuii chuan min lo call tlut tlut tawh a, ka la chhang hman lo. Chhungkaw enkawltu nih hi chuan a buai theih kher mai. Vawi 3 min rawn call tawh, ka la chhang hman lo, a thin a rim tawh viau ang. Thinrim viau pawh nise, ka hrethiam tho mai. Ka insuk chu ka zar nghal zung zung a, ka nu hnenah ka kalna tur ka hrilh a. Insiam mawlh mawlh pahin Rempuii chu ka call nghal a;

"Awiii i van rei ṭhin tak."

"Ka insu a, ka tihpalh lutuk aw. Hei ka insiam mek e aw."

"Awle ka ṭhiannu nen kan lo nghak reng tawh che nia aw."

"Awle ka insiam zo ang a, ka lo kal nghal a ni mai. Phone hi ka dah rih aw."

"Awle, hmanhmawh over  kher suh aw."

"Aw awle awle."

Ka lei thuam nalh ber ber te chu inbelin Rempuii te ṭhian dunin min lo nghahna lam pan chuan ka kawh chhuak nghal a. Ka pheikhai chu rang vut vut tak hi a ni ringawt, thlen khalh hlau ni awm fahranin ban vai lawp lawpin ka kal vuk vuk a. Ral khat aṭanga min lo hmu tu te chuan,"Khulai tlangval chu Suangpuilawn a ban tlang dawn a ni maw?,"an tih hial ka ring a ni.

Rempuii te ṭhian dunin min lo nghahna hmun chu ka va thleng ta. Rempuii chuan hlim hmel takin min lo nuih sâng a,"I va rawn thleng hma leh si ve, i chau em?,"a lo ti nghal luam a.

"Aih chau love, min lo nghak rei tawh awm si a. In lo ning viau tawh zawk lo maw?,"a bulah chuan ṭhut hmun ka rem ve nghal a.

"Aih rei lutuk love, e chuan, hei ka ṭhiannu Mami ka tih kha ka sawi ve ziah kha a nia,"tiin a ṭhiannu nen chuan min in hmelhriat tir nghal a. Mami nen chuan kan in chibai lawp lawp a,"I hming hi chu ka hre ngun teh a nia. I hmel erawh tun hi ka vawikhat hmuhna a ni, ka ṭhiannu hian a sawi sual love,"a nui zui har har a. Rempuii'n a sawi sual loh chu eng thil nge ni ta ang le? tia ka ngaihtuah mek lai chuan,"I hmelṭhat zia leh i fel zia hi nitin a ka hriat ṭhin a ni. Chuan, ka ṭhiannu hian a thlang sual lo khawp mai che, a hriat loh hlanin ruk mai che ka duh,"a la ti ham ham zui a, ka rin aiin fiamthu a duh zek a. Rempuii chuan,"Awiii a zah theih loh zia hi, ani hi chu i phû ve hlawl lo. I bialpa lukira nen te khan i lo tehkhin reu reu ang e aw, ka phal teuh lo a nia,"a lo ti ve bawrh bawrh bawk a. An ṭhian dun chu an inpawhin an in kawm ngeih/ngaih(a dik zawk ka hre leh ta lo. A dik zawk hria chuan khawngaihin comment lamah min lo hrilh dawn nia aw) hle a ni tih hai rual a ni lo. 

Kan kalna hmun tur hi min la hrilh duh miah lova. Rempuii chuan Taxi lo kal hmasa ber chu a lo phar a, Bazar lam panin kan tlan chhuak phei nghal a. 

"Khawnge kan kal dawn a?,"Rempuii chu ka zawt a. A lo nui var var a,"Kan thlen hunah i hre mai ang,"tih chauhin min chhang a, ka zawt zui tawh lem lo. Mahse, kan kalna tur chu rin ka nei deuh tho.

Bazar ah chuan min kalpui zel a, rin ang ngei ngeiin Sanpiau hawp turin min hruai lut leh ta. Ṭhutna awlah chuan kan ṭhu lut ve nghal a, Sanpiau 3 leh Lassi 3 kan order nghal a. Mami chuan,"Rempuii nena chhuah dun tawh chuan, Sanpiau ei lovin kan haw ngai lo,"tih pahin a rawn nui vur vur a. Rempuii lah chuan,"A tui êm a lawm, ka bialpa aipawh hian ka duh,"an ti kher a, ka van ngei reuh tak. Nuih pawh ka nui duh lova, ngawi rengin ka Phone ka khawihsan daih a.

"Eeeh Sanpiau te i thîk dawn ta ni maw? A fair lo e,"ka nak nemah chuan min rawn piai zauh a. 

"Zorempui, ka chhuahpui tawh miah lo ang che,"ka ti deuh hmuk a. Mami lah chu a lo phûr em em mai si,"Awiii ka duh thei e, Sanpiau te a thîk ta. Bawih, in pa hi a van cute tak,"a la rawn ti ham ham zui a. Min ti zak lutuk, ei tur an rawn dah chu ngawi rengin ka ei nghal mawlh mawlh a.

An ei zawh hma in ka ei zo hman a, ka tho nghal vat a,"Hmanhmawh su aw, pawnah sawn ka lo nghak ang che u. Bill chu ka lo pe mai ang,"tih pahin min chhanna pawh ngaithla zui lem lo chuan ka chhuak nghal daih a.

Rei vak lo pawna ka din hnu chuan an rawn chhuak ve deuh nghal mai a. Mami chuan,"Min treat ve ringawt a, vawiin chu kan inhmuh vawikhatna te a ni sia. Min treat ve rih lo mai rawh, kha ka lo pe leh ang che,"a thil ei man chu min pek let leh a tum a. Mahse, ka la duh bik lova,"In hmuh vawikhatnaah hian a lawm in treat tur zawk. Bakah mipa ka ni a, hmeichhe in treat tir ka duh reng reng lo,"ka ti ve tlat a. Pawisa pawh chu ka la duh ta bik lova.

"Tunah chuan kan kalna tur takah kan kal tawh ang,"Rempuii chuan min rawn kai nghal chat a. Khawiah tak min kalpui leh ang maw? Mami chuan,"In kai bik lo u la, rual awh a na thei bik e,"tih pah chuan kan inkarah chuan a rawn tlazep nghal a,"Ka bialpa a zin vang maiin min ti duhdah bik lutuk. A fair lo, ka lungawi hlawl lo tikhan in si lovin kal ru,"Rempuii chu a melh rum nasa mai, kei lah ka lo nui kiah kiah thung a,"In pa chu ka hmuh ve ngei a ngai ang aw,"ka lo ti ve vat a. A nui var var,"Yes tehreng mai, kar leh inrinniah a lo haw dawn a lawm,"a lo ti nghal vat a.

Mami te In chu a zau in a nuam hle mai. Mami chuan,"Tikhan lo awm lawk ru aw, dawrah ka nu in min ko a ka han chho lawk ang aw,"a ti a, min chhuahsan daih bakah pawn lamah Tala in min la khalh hnan zui a. 

"I ṭhiannu khan tinge pawnah min kalh hnan daih a?"

Rempuii chu a lo nui vur vur a,"Kan chhuah a hlau a niang,"a lo ti mai a.

"Hmmm khawiah mah kan chhuak awm lo e."

"Nia, chhuak dawn lo e,"a mit meng mawi em em mai chuan min rawn melh leh ta a, ka tuiral leh zo dawn. A duh chu ka hria, ka kuah a, a hmui sen vam ham maiah chuan ka fawp nghal vawng vawng a,"Ka hmangaih che,"ka ti sap a. Ka mitah tak min en a,"Sawiṭha leh lawk teh ka hre chiang thei lo,"a nui sen sen a, a van duhawm ṭhin tak êm!

A mitah tak chuan ka en a,"Ka hmangaih lutuk che,"ka ti leh a, a nui a ka hmuiah chuan zawite in min lo fawp a. Min kuah vawng vawng a,"Kei pawn ka hmangaih lutuk che, ka tan awm reng ang che aw,"a ti mawlh mawlh a.

"Tehreng mai, engtik hunah pawh i tan ka awm reng ang. Ka hmangaih che."

Rempuii pa hi Kohhran Upa a ni a, duhthusamin a ham strick a. An Inah pawh hian vawikhat chiah ka la leng lut, ka vawikhat len luhnaah ka sim nghal. Rempuiin leng tura min sawm leh pawn ka leng duh tawh ngai lo. Nitin inhmu reng thei lo mah ila, zan lamah chuan online in kan inbe reng thei tho a. Chuvang chuan pawi ka ti hran lo, chhun lamah ka hunawlah kan chhuak duh thei tho bawk a, a zia tho mai.

"Sikret(Sap ṭawngin ka ziak kher peih lo, tihian a chiang nge nge😁)i nei em?"

"Ka nghei daih tawh lawm,"ka lo ti vat a, a nui hawk hawk a,"I nghei tak tak maw?,"ka kekawr ipte chu a rawn zen nghal bawrh bawrh a. 

"I nghei tak tak maw?,"a ti leh a.

"Aww nangman nghei turin min ti sia, ka nghei mai loh chuan,"ka nui suk a.

"I van fel tak, ka hmangaih tlawrh tlawrh che,"tih pah chuan ka biangah chuan a rawn fawp zauh a. He hmeichhia hi nupuiah ka nei lo a nihchuan a mak ang,"Nang hi nupuiah ka nei lo che a nihchuan ka lengtar a ni mai. Pasal atan min nei duh ang em?,"ka ti thawr mai a. Fiamthu deuh thutak deuh tho siin ka zawt a, a nui har har a,"Min nei duh ve tak tak ang maw?,"tiin min zawt leh hlauh thung a.

"Duh e, min nei duh lo pawh ni la ka nei duh tho che. Nupuiah nang hi ka nei lo che a nihchuan, ka leng tar mai ang,"ka ti leh a. A nui a, min kuah a,"Nang bak baka neih châk leh mipa duhthusam kimna hi ka nei lo a sin. Ka tan chuan i hlu a, ka engkim i ni ka hmangai che Remsang."

Tlai dar 3:00pm a ri dawn tak ngial, Mami lah chu a la rawn haw si lo. Rempuii ber chu ka ngaihtuah a, a chhungten haw har an ti ang tih ka hlau si a. Sana ka bih chhen tawh mai,"I ṭhiannu chu a van rei ta ve, call chhin la,"ka ti ta nge nge a. A call ve nghal mai a, a call hnu rei vak lovah a rawn haw ve nghal mai bawk a.

"Haw in duh tawh em ni? A la hma em hi,"a rawn ti lut nghal bawrh bawrh a. Rempuii chuan,"Hei dar 3:00pm a pel mai dawn, 3:30pm hmaa In ka thlen loh chuan apa a thinrim dawn lutuk,"a lo ti ve nghal vat a. Mami chu a ner nghal nûng a,"Huihammm i pa lah hi a ham strick thei si, ninawm. Kohhran Upa tih takah a ham strick mah mah ka ti,"a âng buan buan a. Rempuii erawh chuan a ṭhiannu thusawi chu a ngai pawimawh lem lo,"Khawi kawngpui thleng min thlah rawh,"a ti nghal zat a. Mami chuan,"I hawna tur a hnaih tehreng nen, thlah lah hi i phût ve ziah zel a,"tih nuah nuah pah chuan kan in zui chhuak hnak hnak hlawm a. 

Mami te In aṭang chuan Rempuii te In chu a lo hnai hle tak mai a. Mami chuan kawngpui thleng min thlah chho a, kawngpui aṭang chuan kan 2 in kan kal thung a. 

"Tikhan Mami te In i hre tawh bawk a, i hunawl neih apiangin an In kha kan hmang ṭangkai ziah tawh ang,"Rempuii chuan a rawn ti a. Mahse, ka ngaihdan a ni vak lova,"Mi Ina inhmuh ringawt te chu, a In neitu te pawh an zahawm a lawm maw le,"ka lo ti vat a. A ngaihdan a ni lo nasa mai si,"Ninawm, hetianga kan tih lohvin kan Inah i rawn leng duh bawk si lo a nihkha. Kan inhmu khat thei si, ka ngai ve tho che lawm"a ti hluk hluk a.

"Ngai lo bik che ka ni bik lo, i pa ka hlau a lawm."

"Hmmp, a seh lo ang che ka pa hi pawng paw hlauh ngawt ṭhin suh."

"Awle, nihchuan naktuk zanah ka lo leng dawn nia."

"Zaninah pawh lo leng rawh."

"Zanin chu ka hman ka ring lo, kan Inah Kristian Chhungkaw Campaign an nei dawn a."

"Nihchuan, naktuk zanah chuan lo leng ngei ngei tawh ang che."

"Awle, leng ngei ngei ang."

Kan ti ti tui bawk a, an In peng pawh duh aiin kan thleng hma in ka hria,"Helai thleng hi min thlah mai rawh."

"Aw nihchuan, kal la ka lo en liam ang che."

"Aih kal hmasa zawk rawh,"a ding char char a. Mahse, ka kal hmasa duh bik lova,"Kal rawh ka lo thlir liam ang che."

"Awle nih ka kal, bye aw,"nui sen sen chungin a kut chu a rawn vai a.

"Imm bye."

An gate bul a thlen thleng chuan ka thlir reng a, an Gate a luh hma chuan a rawh hawi let leh a. A ban a rawn vai lauh lauh a, rang lutukin ka lo vai let ve nghal a. An In lam panin a kal liam ta, kei pawh kan In lam panin ka kal phei ve leh nghal a.

Haw kawngah chuan thil ka ngaihtuah nasa khawp mai. Rempuii nen hian kan dinhmun hi a inthlau takzet a; mahse, hmangaihna kawngah erawh kan inmil viau lawi si. Ani chu kawng engkimah a khawsak pawh a nuam a, sumah a buai lo bawk. An chhungkua chu chhungkaw awmthei tak an nih bakah an hung hle bawk a. Keini erawh ka nu nen chauh a khawsa kan ni a. Ka nu hian nepnawi dawr lian vak lo a siam hi kan ei hmuhna ber chu a ni ve mai a. Kei lah Class ka kal tawh si lova, inhlawhna ka hmuh loh chuan In lama ka nu puih a ni leh tawp a. Hmangaihna tih lohvah chuan kan kar chu a zau viau a ni. Mahse, khawvel hmeichhia zawng zawnga hmeichhe ṭha ber leh fel ber mai a nihna hian ka dinhmun leh ka nihna te hi min theihnghilh tir ṭhin si a. A bulah chuan miṭha ber leh mi famkim ka ni ṭhin, ka ṭhat lohna leh tlin lohna te min hmuh kân sak a, ka ṭhatna lai chauh min hmuh sak ṭhin. A tel lo chuan nun hi a famkim lo a ni ber e, kei ang mihring lak tlak loh zet min lo hmangaih te hi ka mumang emaw ka ti hial zawk ṭhin.

In ka thlen chuan ka nu in eirawng a lo bawl mek a. Duh aiin ka haw tlai tih ka hre chhuak chiah, ka inthlahrung viau mai. Ka inthlak sawk sawk a,"Nu, thuamhnaw pho i seng tawh em?,"ka ti nghal vat a.

"Aih la seng lo, han seng la chawhmeh hi lo kang ta che aw. Kuhva kheh tur a lo thleng a, chaw ei hmaa ka tih zawh loh chuan zanah ka kheh hman hmel si lohva."

Thuamhnaw pho chu ka han seng nghal zung zung a, ka Phone pawh ka khawih hman meuh tawh lo. Ka nu Alu vel sa chu ka kang nghal a, chaw chu a lo chhum tawh a. Alu vil pah chuan ka thuamhnaw seng ho chu ka thlep fel leh nghal sawk sawk a. Ka nu chuan,"Bawiha, chawhmeh kha i kan zawhah i Nu Zuali te Inah puan man va dil lawk ang che aw. Ka Phone vek tawh a, ka la kal hman si lova ₹2000 a nia i hman hunah i va la mai dawn nia aw."

Ka nu lah hi Nu Zuali te Ina ka kal hreh zia lah hi a hre der si lo, huiham ṭhenawmte naute pawm chungin ka kal leh mai ang. Alu chu hmin thei lo se, Nu Zuali te Inah chuan kal hman lo ila ka van ti tak. Mahse, Alu hi a hmin ṭep tawh, duh aiin a hmin tawh mah mah zawk a ni. 

"Nu, Nu Zuali te Inah chuan ka kal dawn aw. Chawhmeh chu ka suan tawh aw,"tih pahin ka chhuak nghal a. Ṭhenawm te Inah ka lut leh nghal zat a,"Khawnge in naute?,"ka ti lut nghal a. Naute nu chuan,"A pa nen an lo chhuak hman chiah a, i lo nang lo chiah chiah a nih hi,"a lo la ti zui. Engtinnge ka tih ang le? 

"An lo haw har dawn em?,"ka ti leh a.

"Aw an lo haw hma ka ring lo,"a ti bawk si, a van buaithlak tak. 

Ummm, a pawi love kal phei ṭhuai mai ang. Ka Phone ka la keng lo zui a, a pawi lutuk. Phûr lo zetin Nu Zuali te In lam pan chuan ka kal phei hnak hnak a.

An In ka thlen chuan a tihdan ngai te bawkin nui sângin min lo be leh a,"I nu in a rawn tir che ni maw?,"a lo ti vat a.

"Aw ka hmanhmawh deuh a,"ka ti zawi sup a. An T.V bulah chuan ka ding zum reng a.

"Aw, min lo nghak lawk aw. Lo ṭhu la, ka rawn pe ang che,"a ti a, room-ah min luhsan daih zui a. Ṭhut pawh ka tum lem lova, ka dinna ngaiah chuan ka ding ngar a. Rei vak lo hnuah a rawn chhuak leh a, Aw Lalpa le(h)! Engtia awm thei nge mihringah?