Thingsai Lal Lalbuana lung phun

Aizawl | November 20, 2019: Vawiin khan Thingsai khawtlang chuan an  Lal, Lalbuana Fanai (Lalthanghrima) Lung ropui takin an phun.

Lalbuana Lunglei Ramthar Thlanmuala kum 1989 a phum tawh chu a ruh Thingsai khuaah la chhoin a nupui Pi Lianchami Ralte nen hmun khatah phumin, a lungphunna hun khawtlang huapin an hmang.

Pu Lalbuana Fanai te nupa lung hi Pi Saikuti, Pi Lalsangzuali Sailo, Thingsai khaw kum 125 na Lung leh Thingsaia Harhna Thlen kum 100 na lungphun dah khawmna  "Saitlang Romualah" mawi takin an phun a ni.


Pu Lalbuana Fanai hi Khawnglung Run hmingthang taka tel Fanai lal Khawtindala Tupa niin Lalbuana Fanai hi Fanai Lal thlahtu hriat hlat ber Ṭhatinkuala aṭanga tuchhuan 12 na a ni.

Pu Lalbuana hi kum 1909 ah piangin, kum 4 chauh anih laiin a pa Lal Hleibawra chu a boral a, lal thei a la nih loh avangin Lalbuana Ni leh a pasal Pu Thangbawnga ten a aiawhin Thingsai khua an enkawl a. Pu Lalbuana chu kum 22 a tlin chuan a koah Lal nihna chu nghah a ni ta a. Sorkar in kum 1954 a Lal a ban  thleng khan Pu Lalbuana hi Thingsai Lal a ni a. Kum 1989 khan Aizawlah a borala, a ruang hi Lunglei Ramthara a fapa F.Lallura te inah lakluh niin  November 5, 1989 khan Lunglei Ramthar thlanmualah vuiliam a ni. 


Kum 30 a ral hnuah Thingsai mipuite chuan an Lal, an hmangaih em em ruh hi Thingsai hmunah ngei phum a nih theih nan hma an la a. A rual hian Thingsai Pemveng thlanmuala kum 1974 a phum tak Lalnu Pi Lianchami Ralte ruh pawh phawrh nghal niin Saitlang Romualah hian a pasal Pu Lalbuana ruhro nen hmun khatah an phum ta a ni.

Thingsai Lal Lalbuana lungphun pual hian khawtlang huapin ruaiṭheh  a ni a, ruai siam nan Vawk 5 leh  Bawng 2 talh   ni. Pu Lalbuana Lungphun hi feet 9 a sang niin, killi a nei.

Source: Thingsai Insta














Post a Comment

He post chungchanga i ngaihdan lo sawi ve rawh:

Previous Post Next Post