HMEICHHE NAUPANG KUM 6 MI CURRENT IN A MAN HLUM

Thenzawl | November 23, 2019:   Vawiin chawhnu dar 1 vel khan C.L. Remkimi, kum 6, Pu Biakremmawia fanu, Thenzawl Dinthar Veng chu an In a current kal khawihfuh palhin, a boral. ( A pa Biakremmawia hi Thenzawl Bazar Veng Branch YMA a Secretary nilai a ni).

      Vanduaina tawk ta CL. Remkimi hi an varanda a nu Puantahna bula a awm  laia chesual palh a ni a,  an In hmalam banga Cable TV, optical fibre node, signal semdarhna aṭanga thirzai (earth line?) kalna chu khawih palhin, chuta current kal chuan na takin a man a, (chapal/pheikhawk a bun lova) nikhaw hrelova awm zui nghalin, an in lamah reilo te bawihsawm a ni a, a ke te pawh tih pem (current man chu thisen chhuah a ṭha tih vangin) a ni a, rang taka Thenzawl damdawiin panpui nghal a niin, Thenzawl CHC Doctor leh staff ten theihtawp chhuah mahse, chhan hman a ni lova, dar 1:40 khan a boral thu hi nemngheh zui a ni ta a ni.

          CL. Remkimi hi nauang fel leh nungchang ṭha tak mai a nu a. U hmeichhia kum 13 mi leh nau hmeichhia kum 3 mi neiin, an unaua milai a ni a. Thenzawl Seventh Day Adventist School a KG-A zirlai a ni. Zaninah a ruang hi lumenpui a ni anga, naktukah Thenzawl thlanmualah vuiliam a ni ang. 

          Vanduaina an tawh hma kar khat vel kaltaah khan a pa hian helai Cable TV, Optical Fibre Node ah hian a changin Current a kal a, a changin a kallo tih hi a lo hre tawh a, siamṭhat an tum mek laiin vanduaina hi an tawk ta a ni. Lusun chhungte an lainatawm tak zet a, Lalpan thlamuan mawlh rawh se.

-- Liantluanga Renthlei

Editor, Vantawng & Stringer, DDK, Thenzawl