Ruihtheihthil in a tihbuai Police te tan training

Aizawl | November 23, 2019: Karhnih chhung awh Special Course cum Rehabilitation Programme chu PTS, Thenzawlah Mizoram Police te tan hman a ni a, unit hrang hrang atangin police 266 an kalkhawm.

He hun hi November 11 atang khan neih tan a ni a, Mizoram Police Department mi leh sa te zu leh ruihtheihthil in a tihbuaite chhanchhuahna leh lei rem an rah leh theihna tura buatsaih niin nimin khan kharna hun hman a ni. 

Kharna hun hi PTS Conference Hall-ah Pu HL.Thangzuala MPS, Principal PTS kaihruaia hman a ni a, Pu Saidingliana Sailo, Asst Principal chuan training report a pe bawk.

Kharna huna training te hmaa thusawitu Mizoram DGP Pu SBK.Singh, IPS chuan, Mizoram ka rawn awm tirh thla hnih lek chhungin police mi leh sa mi 18 vel an thi hman a, an thih chhan an sawi danin zu leh ruihtheihthil vang a ni a. Ka rilru a kalthui hle a, tih dan kawng dap tul in ka hria a, ka ngaihtuahnaah kawng hnih a rawn lang nghal a, pakhat zawk chu hna atanga ban a ni a, a dang leh chu chhanchhuah dan kawng zawn a ni. Sawrkar in dan leh dun mumal tak kan nei a, chung danah chuan ban tir theih in ni a, mahse hna atanga in ban tir chuan nangmahni leh in chhungte a nghawng ngei dawn a, chu chu ngai ngam lovin khawngaihna nen he hun hi kan buatsaih a ni, a ti.

Mizoram DGP chuan, training chhuak te chuan zu leh ruihhlo te do tawh zawk turin a ngen a, “a lei tawh thin tute in nih avangin tu nge zu leh ruihtheih thil zuar thin tih in hre vek dawn a, chuvangchuan nangmahni thawhna Police Station emaw, PHQ emaw keima hnen ngeiah pawh report turin ka duh che u a ni” a ti.

Pu SBK Singh-a chuan Police mi leh sa, zu leh ruihtheihthil sim duh tamtak a hmuh avanga a lawm thu sawiin training chhuak te chu an intiamna ang ngei a Police chhuanawm tak, ram leh chhungkaw tan chhenfakawm tak ni turin a fuih bawk.

He tarining chhung hian awmze nei taka hun hman a ni a, Pathian thu leh nunkawng dik inkawhhmuhna thu tha tak tak, Pastor leh damdawi lam thiam doctor te bakah Police senior officer te hnen atangin ngaihthlak a ni a, tisa tih chak nan infiamna leh insawizawina chi hrang hrang te neih pui thin an ni.

- Ramlai Post