World Mental Health Day hmang; Second 40 dan zelah mi pakhatin mahni nunna la

Aizawl | October 10, 2019: Khawvel puma rilru hriselna kawnga inzirtirna hun bik, World Mental Health Day chu vawiin khan Mizoram College of Nursing, Falkawn-ah neih a ni a. H&FW Principal Director Dr F Lallianhlira, in Khuallian niin hun a hmanpui.

World Mental Health Day pual inkhawm hi Dr.Lalmalsawmi, Joint Director, DHME in a kaihruai a. hemi hnu hian Dr. Ruth Lalmuanpuii, Psychiatrist leh Dr. Robert L.Khawlhring, State Nodal Officer, National Mental health Programme ten Mental health Chungchang sawiin zirtirna an pe a ni.

He huna thusawitu Khuallian Dr F Lallianhlira chuan rilru hrisel neih pawimawhna leh rilru lam natna hrang hrangte enkawl hi nasa lehzuala kan kalpui a ngaih tawh thu a sawi a. "Kumin thupuia "Focus on suicide prevention" tih kan hman atang ringawt pawh hian mahni intihhlumna a tam thu a chiang a ni. Chuvangin hemi kawnga tan la tur hian mitin hian mahni zawnah theuh mawhphurhna lian tak kan nei a. A pawimawh berah chuan khawvelah hian enge kan pian chhan tih hi ngun taka kan ngaihtuah a ngai a ni" ti a kalkhawmte fuihin harsatna te hi harsatna a nih ang ngawta thlir lo va, Chona angin i hmachhawn zawk ang u a ti bawk.

World Mental Health day hi kum tin October ni 10-ah theme hran hran neia hman thin a ni a. Kumin 2019 theme chu ‘Focus on suicide prevention’ tih a ni. WHO-in a chhut danin kum tin mi 800,000 (nuai riat) chuang hian mahni nunna an la thin niin a chhut a, chumi awmzia chu second 40 danah mi pakhatin mahni nunna la zel ang an ni tihna a ni. Mahni intihlum zingah hian kum 20 atanga 40 inkar an tam ber a ni.

Kum 2019 April atanga September chhunga District hrang hranga Mental Health OPD leh IPD-a treatment la zat chu mi 7939 an ni a, chumi zingah chuan 1469 (18%) chu depression nei te an ni. Depression nei zinga 50% aia tam ten suicide ideation (mahni intih hlum duhna rilru) an pu tawh thin ani. Mahni nunna lak tum zingah ruihhlo khawih an tam ber bawk.

Depression hi natna hrehawm tak a nih rualin enkawla tih ziawm theih a ni a, he harsatna nei te chuan I harsatna te hrethiamtu mithiamte pan vat tur a ni. Rilru hriselna hi mitin neih theih a ni a, harsatna tawk te tanpui turin kan zavaiin mawh kan phur bawk a ni.

National Mental Health Programme (NMHP) hi sawrkar laipuiin kum 1982 khan alo din tan a, Mizoram ah pawh 2014 atanga kalpui tan a ni. Tunah chuan district 8-ah District Hospital hrang hrangah te kalpui mek a ni a, rilru lama harsatna nei hrang hrangte a inentir theih reng a ni a. Heng bakah hian Crisis/ Suicide Helpline hi 24x7 a kalpui mek a ni bawk. (Crisis Helpline Number te chu: 1 na. 9366181946, 2 na. 9366193094, 3 na. 9366191341) Depression ni kher lo pawh harsatna hrang hrang neite tan whatsapp,sms leh call hmang tea biak pawh theih reng an ni.