UN General Meetingah Zoram Thar tel

Aizawl | October 13, 2019: Zoram Thar hruaitu Rev. Dr. Zaichhawna Hlawndo chuan Zoram Thar in Zofate Adviser atana a lo ruat tawh Joshua Cooper ruahmanna vangin September 22 - 27 a UN General Meeting New York khawpuia neih chu a tel ve.

September 22-27 chhunga UN General Meeting New York a awm chu Zofate Advisor Joshua Cooper a lo ruahman sakna avangin a chhim a. Zofate chanchin ziak copy 150 vel kengin khawvel ram hrang aṭanga palai lo kalte hnenah a sem a. Antitipui theih apiangte hnenah pawh Zofate chanchinte hrilhin kan nihna leh chanvo dik tak kan chan theihna tura min lo thlawp tur leh thurawn te pawh min pe turin a ngen. 

Hemi chhung hian Rev Dr Zaichhawna Hlawndo hian UN Headquarter lama thawkte pawh hmuin a kawm nual.

Rev Dr Zaichhawna Hlawndo chuan nimin khan Aizawl Press Club ah chanchinbu mite kawmin he thu hi a sawi a, "Zoram Thar ten India ram Prime Minister hnena kan lehkha ziah leh UN Secretary General hnena memorandum kan thehluh pawh chhuizui dan kawng kan han dap viau a. UN General Inkhawmpui lai a nih avangin duh angin kan chhuizui thei rih lova pawi kan ti hle." a ti a.

"Nakum 2020 hian UN General meeting chuan INDIA ram dinhmun a thlir let dawn a. He hun hi kan tan hun rangkachak a nih ngei kan beisei." a ti bawk.

Inkhawmpui laia inkawmkhawmna leh thu hrang hrang zirhona 10 chuangah a tel a. Heng zirhona leh sawihona te hi UN Sustainable Development Goals (SDG's) point 17 behchhanin a ni hlawm a. Khawvel sik leh sa her dang lam mek (Global Climate) chungchang te, Khawvela Ṭhalaite dinhmun chawikan, Khawvela retheihna umbo, Khawvela Media ṭhang chak lutuk zirchianna, Helho (Terrorist) chungchang, Hnam tlem zawkte dinhmun zirhona, Khawvela muanna awm theihna tur leh dikna a rorelna ṭha tak a awm theihna tur leh Thawhona leh inpumkhatna chungchang zirhona ah te a tel bawk.

Zoram Thar hruaitu Rev. Dr. Zaichhawna Hlawndo chu Tualṭo hnam puala thusawina hun (side event) an buatsaih ah thusawiin, "Zofate rahbeh leh awpbeh an nih dan te, khawvel pumpui tieng tura hnam thlan an nih ve thute leh UN in muanna leh dikna kenkawh thupuia a neih hlawhtlinna tur awm chhun chu Lal Isua Krista chauh a nih thute a sawi a. UN ah ZORO  te pawhin Zofate hnam nihna dinhmun kum tam tak an lo auhpui tawh leh, mahse vawiinni thlenga UN in Zofate tana a hmalakna mumal sawi tur kan la neihloh thute a sawi tel bawk a. UN in dan mumal tak a neih hrang hrang tlawh chhanin Zofate hnama kan din chhuah a, mahni ke a ding a, mahni a ro kan in rel theihna tura a rang lama hma la tura ngenna thute a sawi bawk ni.