REIEK KHUAAH ZOFEST 2018 A HLAWHTLING

- Samuel Lalrinsanga

(Kum hial vei tawh mahse, a lawmawm em a, ka han tarlang ve hrim hrim e.)

Zofate nghet lehzuala kan insuihkhawm theihna tur kawnga hma la nasa ber chu "Mizo Zirlai Pawl(MZP) hi a ni" ti ila kan sawi sualin ka ring lo. MZP thil tum Pakhatna aṭanga chhiara Sawmnaah pawh a inziak nghe nghe.

Heti'ang hian: 10) "Zohnahthlak hnam hrang hrang te inpumkhatna neih" tiin.

  

Ni e, MZP hi a thil tumah a chiang a, hlawhtling nghal vut vut lem lo mahse...a hlawhtlin ngei theih na'n hma ala chho bek bek a, a par zû pawh khamkhawp lutuk hmuh tur chu la awm lem lo mahse...kan dâwn ṭan mek e. (MZP thil tum pawh hrechiang hlei lova sawisel kan hrat lutuk hi chu kan sim atan a ṭha hle mai.)

Kar hmasa Inrinni tlai, thim thet thet tawhah khan Aizawl aṭanga khaw hla lo te Reiek khuaah ka zuk zin ve a.

Motor han tamzia mai chu a, an tam chhan pawh Festival pakhat an hmang a, an hmang zo lo haw chho lam hi an lo nia, ka rilrua thu pakhat lo lut mai mai chu "Reiek khua hi khaw nuam tak mai, Khawpui mite pawhina an tlawh tam, Programme lian tham kan hmanna hmun pawimawh tak pakhat a ni a, motor kawng tê lutuk erawh chuan kawngpui zau zawk neih a ti chakawm mang e aw" tih te mai hi a nia. Ṭhi beh ve lo thu erawh chuan tu beng mah a va thleng chuang lo'ng e. Duhthusam thamral mai a ni.

Ni e....chutia kawng chêp tak kara kan inhnawh ve ṭang ṭang hnuah chuan Reiek khua chu kan lut ve ta hlawl mai. Programme pawimawh tak nei tura kal kan ni bawk a, a hman hmanin min lo hmuak a, ṭhenkhatin eirawng an lo bawl a, ṭhenkhatte lah hahipin kan lo titi siam siam hlawm a.

Tui taka kan titi hona karah chuan Reiek khuaa kan hruaitu pakhat kawr eng ha hian kan thupui chu a rawn thlak ta thut mai a, chu kan thupui khel tur chu"Reiek khuaah Zofest 2018 a hlawhtling" hle mai tih a ni. Kan ngawi ṭhuap a, thupui thawhtu ber chuan report a pe ta zung zung a, thil lawmawm tak a nihzia leh tih chhunzawm zel tlak a nihzia te kan 

sawi chho ta zel a. Report petu hnen 

aṭanga kan thudawn 

te chu chîk tak a zawhna siam chung zelin a theih ang ang ka chhinchhiah zel a. Ka hlawkpui kher mai.

Mizo Zirlai Pawl (MZP) te hian Zofest hi kan lo huaihawt ve fo tawh a, hmun hrang hrangah kan hmang kual a. Zohnahthlak chi peng hrang hrang kan kal khawm a, he hunah hian a chi péng ang a hlawkpui leh a mimal ang a hlawkpuite chu kan awm a, hriat lah kan hre sil ṭhem ṭhum bawk a. Mahse..a khaw bil ang a"Tun ṭum Zofest chu kan khawtlangin kan chhawr a, kan khawtlangin kan hlawkpui hle mai" ti hi chu kan vang pharh awm e.  Chutih lai chuan "Tun ṭum  Zofest zet chu kan khawtlangin kan chhawr a, kan khawtlangin kan hlawkpui hle mai" ti thei khua kan nei a,chu khua chu eng khaw dang mah ni lovin Reiek khawtlang ngei mai khu an ni. 

  

Reiek khawtlang an fakawm hle mai, an thikawm hle bawk. Reiek khuaah khuan Ram buai kuma Mizoram aṭanga Manipur lama chhukthlaa Mizoram a lo let leh kan zohnahthlak hnam pakhat an awm a. An ni khu kan sawi tawh angin Ram buai kum khan an sahimna tur zawngin Manipuir lamah an chhuk a. An lo chen tawhna ram Mizoram chuan an lung te pawh a tileng thar leh  a ni ngei ang. Kum 2000-2007 inkar vel khan an ram Mizoramah an lo haw leh a, Tunah hian Reiek khuaa veng pakhat Gosen veng an tihah In 20 vel zet dingin an khawsa mek a ni.

Reiek khuaa kan unaute khuan, Zofest neih a nih hma kha chuan Eng hnam nge an nih an inhrechiang hlawm lova, zohnahthlak an ni tih pawh an inhre miah lo aniang chu, inkiltawih takin hun an lo hmang a, Reiek khawtlang lam pawhin Hnam mumal pawh nei lovah an lo ngai ve mai bawk a. Mahse....an demawm hran lo, Reiek khuaah Zofest kan neih kha a lo ngai hle a nih dawn kha. Pathian remruatte pawh a ni zawk mai thei asin. 

Zofest ah khan Zohnahthlak chi peng zing a mi hnam pakhat an lokal a, chu'ng ho nen chuan hnam khat an lo ni ngei a,an ni ho nena an han inhmu chiah chu danglamnain a pâwl chiang kher mai.

 Reiek lama kan unau awm te pawh hnamah an chiang a, Reiek khawtlang ngei mai pawhin an unaute an ni tih an hrechhuak thar a. Khawtlang a hamṭhatna awm thei zawng zawng an dawng/pe ve vek tawh a. Kohhran leh Khawtlang lamah pawh  nise....chanvo pawimawh tak tak an chang a, Tunah chuan inngeihtlang tak leh inhmangaih tlang takin Reiek khuaah hun an hmang mek a ni. Hmangaih tak a tuam hlawmtu Reiek khawtlang an fakawm hle mai.

Zofest hi Zo hnam khawmpui lian leh pawimawh tak mai a nih ang hian chhunzawm zel ni thei se.....hei aia nasa leh ropui zawk hian Zofate hian inpumkhatna thuk zawk hi kan nei ngei ang.

Reiek khuaah Zofest 2018 a hlawtling e.

🙏🏻🙏🏻🙏🏻🙏🏻🙏🏻🙏🏻

October 9, 2019 | Aizawl