MSU in Gen. Conf hmang; Ramri ah check post bakah ramri vengtu tur Mizo hlang awmna battalion din a nih theih nan MSU in hma lak tum

Aizawl | October 10, 2019: Mizo Students' Union General Conference vawi 18-na zankhatna chu Tourism Minister Pu Robert Romawia Royte chuan khuallian niin a hmanpui a, Tv. Lalramhluna Financial Secretary in a kaihruai a. Pu Roberta chuan "Ramri leh Hnam thil Mizo tawh phawt chu Political party nihna dahtha a tanrual a pawimawh a ni." a ti a. Zirlai kalkhawmte chu hriatna leh thiamna hi thiltihtheihna a ni tih hrereng a inzir zel turin a fuih a, retheih leh hausak hi finna a zir a ni ti bawk. Vawiin October ni 9 hian rorel palai inkhawm chu Community Hall, Bairabi ah neih a ni a. President Tv. Vanlalliana Khiangte in a kaihruai a, Nula Gospel Lalzaipuii'n hunserh a hmangin, Nl. Mafaki'n Ro min rel sak ang che tih hla hmangin rorel hlanna a nei bawk a ni. Rorel palai hi tlang hrang hranga MSU hruaitute, Hnampual zirlai pawl leh College SU atangin mi 105 an ni.



Agenda hrang hrang zing ah rorel palaite chuan hengte hi lungrual takin an pawm.
I. Sawrkar khawih thil
a) Mizoram thalaite enkawltu ber Mizoram Youth Commission Grand in Aid a awm reng chu Budget head hran siam sak a nih theih nan MSU in hma la rawh se.
b) Sawrkar school zirna in tinah physical instructor mumal taka dah vek a nih theih nan MSU in hma la rawh se.
c) Mizoram ramri ah border check post changtlung kan nih theih nan leh border a duty tur mizo hlang awmna battalion thar din a nih theih nan MSU in hma la rawh se.
d) Mizoram chhimthlang lam Mizo awmna khuate hi Zofate chenna tlaka sawrkarin a enkawl theih nan MSU in hma la rawh se.

II. Zirna kawihhnawih
a) College hrang hrangte'n zirlai admission fee atanga revenue a chhun thin chu tih tawp a nih theih nan leh college development fund atan hman a nih theih nan MSU in hma la rawh se.
b) Mizoram University hnuaia institution hrang hrangte hman tura duan Choice Based Credit System (CBCS) chu tun session semester tan hman ve a nih loh nan MSU in hma a lak mek chu chak zawk a bawhzui ni rawh se.
c) Computer base online Central Entrance leh Competitive exam centre changtlung zawk kan neih theih nan MSU in hma la rawh se.
d) Zirtirtu aikal late zawn chhuah leh hrem annih theih nan MSU in hma la rawh se.
e) Zirna in hrang hrangah Hnam lam leh zai inzirtirna hun mumal tak siam a nih theih nan MSU in hma la rawh se.

Rorel inkhawm lai hian Conference palai te tan Pandal lamah programme hman a ni a, Nl. Zualbawihi, Women Polytechnic Aizawl in a kaihruai a. Zaihona, hnam lam leh zai bakah live band te hmangin intihhlimna neih a ni bawk a ni.

MSU General Conference vawi 18-na zan hnihna hi School Education Department Minister Pu Lalchhandama Ralte in khuallian niin a hmanpui dawn a. Pu Lalrinsanga Ralte, Vice Chairman Rubber & Allied Crop Development Board chu Khualzahawm a ni dawn a ni. Conference ah hian palai 1075 an kal a ni.

Post a Comment

0 Comments