BJP MIZORAM IN STATE EXECUTIVE MEETING NEI

Aizawl | October 9, 2019: BJP Mizoram chuan State Executive Meeting 2019 chu nimin leh vawiin khan an nei a,  Pu Ram Madhav National General Secretary,Pu Y Patton Nagaland Dy CM leh Pu Temjen  Imna I/C Higher & Technical Education, BJP Nagaland President ni bawk te, Pu Pawan Sharma Prabhari Mizoram te chuan he hunah hian khuallian leh khual zahawm niin an tel a ni.

Dt.8th October 2019 tlai dar 3:30 PM khan Gandhi Sankalp Yantra puala kawng zawhna neih niin, he hunah hian Pu Ram Madhav, Pu Y Patton leh midang ten India hnampa Mahatma Gandhi limah zahna pangpar an hlan a, hemi hnu dar 4: 30 PM ah Mizoram Chief Minister Pu Zoramthanga nen meeting an nei bawk.

Meeting hi Dt.8th October 2019 Thawhleh zanah OB, leh Core Committee te leh sawm bik ten neih niin, Dt 9th October 2019 Nilaini zing dar 9:00 AM ah State Executive Meeting Hotel Regency Conference Hall ah neih ani. 

He hun hi Pu Vanlalhmuaka GS Org I/C in kaihruaiin Prof JV Hluna BJP Mizoram State President in kal khawm te lawmna thu a sawi a ni. He meeting ah hian Report hrang hrang ngaihthlak niin, BJP Mizoram in resolution pahnih theh lutin, 1.Political Resolution Pi Judy Zohmingliani State Vice President in a nei a. 2. Economic Resolution Pu JB Rualchhinga State Core Group member ten an nei a, heng Resolution an thehluh te hi lungrualtaka pass a ni bawk. 

Tin, tun hnai a MADC a MDC mi 22(sawmhnih pahnih) te leh CADC a MDC 3(pathum) hnen ah Pu Ram Madhav in lawmpuina ahlan bawk.

Pu Temjen Imna Nagaland BJP President chuan BJP hmasawnna hmel a hmuhin lawm awm a tih thu a sawi a, Mizoram ah chuan BJP hmuhdan diklo a awm avanga harsatna awm ang chu Nagaland ah kan nei ve lova, chutih ahnekin tuna Membership Drive neih mek ah pawh Pastor tam tak leh Kohhran rawngbawltu tam tak ten BJP ah hming ziakin an inpe a, Nagaland ah hian Kristian 90% kan awm a, Kristianna leh BJP inhal anga sawi awm thin chu Party inchirh thehna mai ani a ti a, BJP kal tlanga mipui harsa tak tak ten malsawmna kan dawn thin te hi kan hmuh hmaih thin a ni a ti bawk.

Pu Y Patton Dy CM pawhin thu sawiin, BJP chu Mizoram ah naupiang tir ang ani a, thahtuma beihna tamtak awm mahse nakinah chuan ala parchhuak dawn tho a ni. BJP avanga hmasawnna kawng tam tak kan hmuh leh kan chan mek te hi a lawmawm em em a, Mizoram ah pawh hmasawnna tha zawk leh chak zawk a awm theih nan BJP Sorkar hi kan mamawh a ni a ti bawk.

Pu Ram Madhav National General Secretary pawhin thusawiin, NE ah Party dang leh NGO tam takin, Article 370 nuaibo anih avanga Article 371 khawih tel tur a ngaihdan piang hi a diklo hle a, Party inpuhmawhna mai ani a, Union Home Minister leh Prime Minister pawh in khawih anihloh tur thu asawi bakah 370 khawih anih vangin 369 khawih ahlauhawm tih nen a in ang reng a ni a ti. Pu Ram Madhav chuan BJP Mizoram ten Resolution an thehluh chu Mizoram hmangaihna leh tih awm tak anih avangin lawm thu a sawi a, Membership Drive neih kawngah BJP hi enge a nih tih midang la hrelo ten an hriat zel nan hrilhhriat hi BJP Member te bat a ni a, PM Scheme hrang hrang kal tlanga Mizoram chhungkua tamtakin an dawn te pawh PM Narendra Modi hmalakna ani tih hi mizo mipui te hian kan hriat a ngai ani a ti bawk.