MSU Inkhawmpui lian chhunzawm; Ramri humhalhna kawngah hian kan chet a ngai a, kan ta kan hauh ngam hi a tul - Minister K Lalrinliana

Aizawl  | October 10, 2019: Mizo Students' Union (MSU) General Conference hman mek  chu Vawiin khan Vantlang inkhawm neih a ni a, LAD Minister Pu K Lalrinliana,  chu khuallian a ni a. MSU Vice President Pu J Lalmuanzuala'n a kaihruai a, MSU Regional Headquarters, Lunglei president  Lalramnghinglova   in hunserh a hmang a, Kulva Choir te'n hnam hla hmangin inkhawm inhlanna an nei a ni. MSU General Secretary Pu Samuel Zoramthanpuia'n inhmelhriattirna leh report a pek zawhin Conference vawi 18-na puala souvenir tlangzarhna neih nghal a ni a. MSU Information Secretary Lalhmangzuala, kaihhruaina hnuaiah Pawl thiltum sawirualna neih a ni bawk a ni.

 LAD Minister Pu K Lalrinliana

 Khuallian Pu K Lalrinliana chuan zirlaite chu intodelhna kawngah rual el turin a chah a. "Eng hi nge kan ram in a mamawh tih hre turin ngaihtuahna hmang ula, kan ram chhung ngeia kan intodelhna tur khawp Pathianin min pekte hi i hai chhuak teh ang u. Ramhmul damdawi atanga kan ranvulhte ei tur tha zawk siam chhuah theihna thlengin kan nei a, kan hnimhnah te thleng hian Ram hmangaihna rilru nen zirchiang ila. Kan leilung hausakna dap chhuah dan tur ngaihtuahna seng rawh u." a ti a. Pu Rintea chuan, "Kan ram hian khawdin belh hi a mamawh tawh lova, dan lova khua an lo din ngawt thin te hi a pawi in, hmasawnna tithuanawp tu a ni a. Tin, kan ramri ah te hian kan awm peihlo hle a, kan rahchin apiang kan ram a nih tur thu Bible ah kan hmu a. Ramri hrul a awm peih turte tan hma kan la mek a, mihring an chen chuan ramri venhimnan pawh a tangkai dawn a ni. Leilet nawr an phalloh kan police te nen kan let mai a, an police te chuan min lo thlir ve mai mai. Ramri humhalhna kawngah hian kan chet a ngai a, kan ta kan hauh ngam hi a tul a, kan ram kan luahloh te pawh veng turin a tulna ah chuan kan police te pawh kan tir zel ang." a ti.

President Pu Vanlalliana Khiangte chuan "MSU memberte chu kristian tha tak ni turin ka beisei che u a. Kristian ram intihna ni si ah hian naupang khuaikhemna a nasa lutuk hi thil zahthlak tak a ni. Kan thenawm hnaite te ah hnamdang mi kristian a siam tur an tam em em a, chuvangin ram pawn aiin mahni ramah missionary hna i thawk ang u." a ti a. Pu Vla chuan "Zirna kawngah kan thatchhiat em em na chhan hi chu nawm chen kan hmasak nasa lutuk a, thawhchhuah nei si lovin thil changkang kan duh a. Heng kawngah hian kan hmeichhiate in pawimawh takzet a, nu leh pa thawhchhuahsa hmanga inla lian thinte aiin mahni inrintawkna nen a dinchhuah tum tlatte hi ngaisangin ngaizawng zawk ula kan Hnam kal dik theih nan a pawimawh a, in hmalam hunah retheihna in pumpelh bawk ang." tiin kalkhawmte a chah a ni. 

Zanin hi General Conference tiak zan a ni a, Minister Pu R. Lalzirliana chu Khuallian tura beisei a ni a. Pu K. Lalrinliana Minister of State chu Uaptu a ni ang a, Tv. B. Lalkhawngaihzuala, Treasurer in a kaihruai ang.

Mizo Students' Union (MSU) General Conference hman mek ah,a zanhnihna ni October  9 ah ZO THAT ZAN inkhawmna hun hman a ni a. He inkhawmah hian School Education Minister Pu Lalchhandama Ralte chu khuallian a ni a, Pu Lalrinsanga Ralte, MLA & Vice Chairman, Rubber and Allied Crop Development Board chu Khualzahawm a ni. Zothuam inbel zan hi Pu Lalthawhsaka Fanai Asst. General Secretary in a kaihruai a, Tv. Malsawmkima, President, District Headquarters, Hnahthial in hunserh a hmang bawk a ni.

School Education minister Lalchhandama Ralte

Pu Lalchhandama Ralte chuan zirlai kalkhawm te chu zirna kawngah tan la nasa turin a chah a, Mizo zirlaite'n UPSC kan paltlang tam loh chuan hnamdang awpna hnuaiah kan awm mai a hlauhawm a ti. Khuallian chuan, "Mizote hi zirna kawngah kan thanharh a ngai hle a, hnamdang pawhin an tih theih chuan kan ti ve thei a. Taimakna leh tumruhna nen kan in zir thar a tul takzet a ni. Tin, zirna kalphung siamthatnan Mizoram Education Service te pawh siam a tul a ni. Ram leh Hnam hmangaihna nen lehkha kan zir theihnan zirlaibu ah Hnam chungchanga inzirtirna kan telh a tul hle a ni." a ti. Pu Chhantea chuan Mizo zirlaite dinhmun diktak hre turin zirna inah inspection neih a tul thu a sawi bawk a ni. Khualzahawm Pu Lalrinsanga Ralte chuan, "Ramri humhalh nan Bûkte sak ringawtin awmzia a nei lova, mumal taka chinfel ngai a ni a, tunah hian official levelah hmalak mek a ni bawk." a ti a. Pu Rsa chuan "Kan Ram leh Hnam damlohna chinfelna tha ber chu zirna leh thiamna kawngah hma kan sawn a, keimahni kan intodelh a ngai a ni." a ti a. Zirlai kalkhawmte chu mahni inrintawkna nen zirna kawngah khawvel zau zawk cho turin a fuih bawk a ni.

With Report from Bairabi by MSU General Secretary Pu Samuel Zoramthanpuia