MNF leh HPC in SHC campaign kick-off; Hmar thimpui ni ṭhin a nih tawh loh nan hma kan la dawn - CM Zoramthanga

Aizawl | October 23, 2019: MNF leh HPC ṭangrual  chuan vawiin khan Sakawrdai Khelmualah Sinlung Hills Council inthlan lo awm tura MNF leh HPC ṭangrual campaign kick-off an nei a. He hun hi Pu Zoramthanga Chief Minister leh Pu Lalchhandama Ralte, Education Minister-in an hmanpui.


He hunah hian Chief Minister Pu Zoramthanga chuan thusawiin, "Hmar thimpui ni ṭhin a nih tawh loh nan hma kan la dawn a ni. HPC nena kan thawk ho thei hi lawmawm ka ti hle a ni," a ti a. Mizoram sorkar leh HPC inremna tihlawhtling tura nasa taka hmalak a nih tur thu Chief Minister chuan a sawi bawk.

 

Pu Zoramthanga chuan he inthlana an khingpui awmchhun Congress chu hlauh tur an awm tawh lo tih a sawi a. "Vawiinah hian Congress a hlauhawm tawh love tih ka sawi duh. Tunhmain India ram aṭangin Helicopter nen lal pui pui an rawn campaign ṭhin a. Tunah erawh chuan Congress hi a dintu vaiho pawhin an duh tawh lova, North East State 8-ah pawh sorkar-na State an nei tawh lo a ni," a ti a. "Tunhmaa Sakeibaknei nia in hriat ṭhin kha sabengtung, sakei vuna inthuamin a tihṭhaih mai mai che u a ni. Tun inthlana candidate an dah pawh hi 'chhan loh aiah Luka' tih ang chauh a ni," a ti.

 


MNF President chuan, "ZPM lamin candidate an siam lova, anni lakah pawh hian in rilru in lo kau hlauh ang e. Nimin maiah an Chief Ministerial Candidate-in Press Conference meuh neiin 'an mau sawi hi Delhi lama raw ziah tlar zingah a tel lo' a ti a. A sawi tur hriat loh thlak ngawt mai. Mipuiin chiang taka kan hriat tur chu Delhi khu Zoram context-ah chuan zirtir chawp an ngai. Vairam thilah chuan an thiam zawk mai thei. Mau project-pui hi min phurpui em em a, 'lo thawn thla teh u' an ti a, kan thawn thla mek a ni," a ti bawk.

Pu Lalchhandama Ralte pawhin thusawiin, "He Pu Zoramthanga kaihhruai sorkar hian Hmar hnam tana ngaihtuahna a sen dan hi chhut chiang ang u. Hmar Pawl hrang hrang a tam a, MNF-in interim Council sorkar a siam khan pawl hrang hrang aṭanga lakhawmin Council a siam a. Hmar hnam inpumkhatna leh zahawmna atan kha thutlukna kha siam a ni. Hmar Hnam Sipaiten Inpuia an neih HPC nena thawhho hi MNF chuan ṭha a ti a. Sorkar-in Council hi ding leh veia hnathawk tura a hman tur a ni a, ṭha taka sorkar thawhpui thei tur MNF leh HPC candidate-te hi party boruak dah ṭhain vote ṭheuh turin ka sawm che u a ni," a ti.

  

He hunah hian Pu Thanhliensung, HPC President pawhin thusawiin, "Sinlung Hills Council Election hmasa ber nei thei tura lei min dawhsak hi keini Hmar hnam tan lungphun pawimawh tak a ni," a ti.

He hunah hian Sinlung Hills Council-a Candidate-te puanna leh mipui hmaa tarchhuahna hun neih a ni a, MNF leh HPC Election Manifesto Chief Minister hian a tlangzarh nghal bawk a ni.

 

He inkhawm hi Tuivawl bialtu MLA leh Education Minister Pu Lalchhandama Ralte chuan a kaihruai a. He hunah hian voters 378 MNF party-ah an lawmlut.

Post a Comment

0 Comments