Kan hnam sipaite khan inphat miah lo, in surrender miah lovin ram tan an bei a, chawimawi an phu - Power Minister R Lalzirliana

Aizawl | October 23, 2019: Vawiin khan BRC Hall, Saitual-ah Mizo National Women Front Headquarters huaihawtin, 'Mizo Hmeichhia ram tana pen chhuakte chawimawina' hun an hmang a, P & E Minister R Lalzirliana chuan khuallian niin hun a hmanpui.



He huna khuallian Pu R. Lalzirliana, P & E Minister chuan thu sawiin, "Vawiina Mizo hmeichhia hnam tana pen chhuakte chawimawina hun kan nei thei hi a lawmawm hle a. Mihring nunah hian mite thatna aiin mite chhiatna lam sawi hi nuam kan ti zawk a, mi fakna leh chawimawina awka lo chhuak fo thin hi thinlung thatna atanga lo chhuak a ni. Helai Saitual hmunah ngei Mizo hnam tana inpe mi engemaw zat awm la dam leh damlote pawh an awm a, MNWF-ten helai hmun ngeiah District hrang hranga hun an hman zawh hnuah closing function neihna atan an hmang thei hi a inhmeh bik ka ti hle a ni. Helaiah hmeichhia 26 lai chawimawi tur kan nei hi inchhuanna tham a tling. A hun laia ram hnuaia kalte an fakawm em em rualin, in lama tangkai tak tak hmeichhiate kha an ngaihsan awm hle a ni. Dam lai ngeia inchawimawi hi a lawmawm a, an zar zo let theih tawh loh tur kan chawimawite hi a hlu a zual bik. Kan hnam sipaite khan inphat miah lo, in surrender miah lovin ram tan an bei a, chawimawi an phu takzet a ni. Zalenna famkim 'Sovereignty' tak tak la nei lo mah ila, kan ram leh hnam tana theihtawp kan chhuah phawt chuan kan ram leh hnam hian hma a la sawn zel ang. Zalenna sualtu tam takin kan vawiin hun hi hmu phalo mahse, an tan kan theih tawk kan ti zel ang. Independent sualtute tawrhna avang khan Mizote hi khawvel hriatin kan awm chhoh phah mek zel a. Kan hnampa Pu Denga leh a hote kha theihnghilh ngai lo ang u, kan chawimawi thiam poh leh kan sang chho zel ang. Hmeichhiate hian an hnampuite nun an chhan theih rualin, thiam loh min chantirtu an ni thei bawk a. Mizo hmeichhiate hi mipa aiin an kawlhrawng zawk emaw tih mai turin, hnam dang pasal nei an tam em em a. Mipa zingah hnam dang nupui nei chu kut zungtang thliaka chhiar tham lek an ni. Mizo mipate hian kan chawm zo tawk lo nge, kan duat thiam loh vang tih pawh nasa taka kan inenlet a ngai. Hmeichhiate hi kawng tam takah kan dem let nghal thin a, an tangkaina zawn pawh hriatsak a tul hle. Hmeichhiate pawhin inchhung khawsakna kawngah a chin tawk an hriat a ngai hle a ni, " a ti.

Pu Zira chuan, "Central chuan 'Look East Policy' tih thin kha 'Act East Policy' tiin a thlak tawh a, hmalakna a kal mup mup mek a, nakinah chuan Chhim lam saw kan chakkhai lakna kawtchhuah ropui a la ni ang. Defence kawngpui pawh lian leh zau taka laih mek a ni. Tin, kan natna tlanglawn ber hi cheng nuai hnih hnuai lama enkawl dam theih an ni tlangpui a, Chief Minister Pu Zoramthanga leh a hoten tha taka an duan chhuah, Health Care-ah hian lo in-register vek ang che u," a ti bawk.

Pi K. Lalrengpuii, President, MNWF Headquarters pawhin, "Mizo hmeichhia ram tana pen chhuakte chawimawina hi District hrang hrangah kan hmang tawh a. District ang chuan tun hun hi a tawpna a ni. Heng mite zawng chhuak tur hian hmeichhiaten tih theih kan nei tlem hle a, Block leh Unit-ten a zawn kual hna min thawhsak thin a, an chungah kan lawm hle a ni. Vawiina kan chawimawite nen hian hmeichhe awm nem zawk, ram tana pen chhuakte hi mi 310-na chiah an ni ta a ni. Heng mite hi Zofate hian kan hre reng a, kan chhuangin kan ngaisang hle a ni. Kan chawimawite hi vote zawn nan chauh an hmang thin min tih hi thudiklo a ni a. Harsatna leh hrehawm tinreng tuara beitute kan theih tawkin kan chawimawi che u a ni, chawimawi in phu angin kan chawimawi zo tawk lo che u a ni. He ram leh hnam tana nunna hlana pen chhuak tawhte hnung zui zelin ke i pen zel ang u. Nangni hian chona nasa tak min pe a ni, " a ti bawk.

He hunah hian mi 26- te chu chawimawina thuziak leh parthi hlan an ni a, an zingah hian boral tawh mi 4 an awm. Pi Vanlalrengpuii, Treasurer, MNWF Hqrs. chuan chawimawina hlanna hun hi a kaihruai a ni. Ex-MNA Hqrs. atang te, chawimawite atang leh Pu C. Zalawra, MNF, Tawi 'E' Block President-te atangin thusawi ngaihthlak a ni bawk a, Martar-te sun nan minute khat chhung ngawi renga din a ni.

Pi Lalthansangi, MNWF Saitual chuan inkhawm hi kaihruaiin, Pi Sangkimi, MNWF, Keifang chuan hunserh a hmang.

Post a Comment

0 Comments