Fur Khat pawh daih lo kawngpui MZP in lungchhiatthlak ti

Aizawl | October 23, 2019: Mizo Zirlai Pawl (MZP) Sub - Hqrs Tlabung chuan thu chhuah siam  in national highway 302 Tlabung to Lunglei kawngpui chu fur khat em pawh a ral hmain a chhe leh tawh hle tih an tarlang.

 

MZP thuchhuah chuan, kum 2019 May thla vel a siam zawh National highway 302 Tlabung leh Lunglei inkal pawhna kawngpui chu siam zawh a nih aṭang kum chanve pawh a tlin hmain a chhe leh tawh hle a, hmun ṭhenkhatah phei chuan motor  kal fimkhur ngai khawpin kawng a chhe leh tawh a, kawng metal hmuh tur awm lo leh alkatra pawh bo vek khawpin  a chhe hial tawh a, he tianga kawngpui ṭha Krismas hmaa a chhe leh vek hi  mak an ti hle tih an tarlang.

 

Contractor te  fur khat pawh daih lo leh an siam aṭang a kum chan ve pawh tling lo kawngpui an siam danah MZP Tlabung chuan pawi an tiin a lung chhiat thlak an tih thu sawiin, Zin mite him theih nan kawng siam tawh chhia leh vek chu, a rang lama siam ṭhat leh thuai turin PWD Highway thuneitu te MZP Sub-Hqrs Tlabung chuan an ngen a ni.