JNV Kolasib ah Cluster Wise Science Exhibition 2019

Kolasib | July 31, 2019: Navodaya Vidyalaya Samiti bultumin state pathum - Assam, Tripura leh Mizoram chhunga Jawahar Navodaya Vidyalaya school hrang hrangte chuan vawiin Kolasib JNV School, Thingdawl-ah 'Cluster Wise Science Exhibition 2019 For JNV School' neih a ni a, Pu V Laldinsanga, SDO(S) chuan khuallian niin a hmanpui.

Exhibition hawnna inkhawmah hian Pu V Laldinsanga chuan thu a sawi a, "District administration lam chuan hetianga science tih hmasawnna tura hma in la hi kan hlutpui hle. Tunlai science thiamna sang zelah science-ah hian tan lak kan ngai a, chumi atan chuan zirlai naupangte leh zirtirtute pawhin theihtawp chhuah a tul," a ti a, exhibition-a lokalte chu duhsakna thu a hlan a ni.

Science Exhibition hi nikhat chauh neih tur niin Govt Kolasib College atangin Asst Professor pathum - Dr Tracy Lalduhawmi, Miss Lalrinpuii leh Mr C Vanlalhruaia te chu endik tura ruat an ni a, kan palaiin phone hmanga JNV principal SK Rai a biaknaah exhibition chu Science hmasawnna zelah JNV school ten an hmalakna pholanna tura buatsaih a nih thu a sawi a, tunah hian Mizoram chhunga district tinah JNV school hi awmin heng school te pawh hi tun tumah hian an rawn tel kim tih a sawi.

Exhibition-ah hian Tripura leh Assam atanga zirlai lokalte nen zirlai 70 chuang zet an kalkhawm a ni.

- Kolasib Aw

*** I Hun awlah website a fakna hi lo click ve rawh le. ***