TRC in freshers social hmang; H&TE minister Thangtea'n hmanpui; Lung Rangkachakah kan thlak - TRC principal

Aizawl | July 19, 2019: Government T. Romana College(GTRC) chuan vawiin khan Vanapa Hall, Aizawl-ah zirlai lut thar te leh zirlai kalchhuak tur te pualin Freshers' Social cum Graduation Day hmang a, Higher & Technical Education Minister Dr R. Lalthangliana'n khuallian niin hun a hmanpui.

Khuallian H&TE Minister Dr R.Lalthangliana chuan College Annual Magazine 'Raltiang' a tlangzarh a. Category 14 huanga Zirlai chawimawi phu thlanchhuahte hnenah chawimawina thilpek a hlan nghal bawk.

Thu sawiin, H&TE Minister Dr R.Lalthangliana chuan GTRC admission kalpui dan chu fakawm a tih thu a sawi a. Cutoff siam lova zirlai mark hmu chhe zawkte luh theih tura College Admission kalpui a ni chunga pawha Division sang ber nei theia zirlai tam tham tak kumtin  pass chhuah tir thei,  GTRC  hlawhtlinna chu thil chhuanawm tak a ni a ti. Tunhma angin harsa taka lehkhazir a ngaih tawh loh avangin khawvel hmundanga zirlaite ang thovin mi tu pawh, a tum ruh phawt chuan tunlai khawvelah chuan a hlawhtling thei tih kan hriat a ngai a. Khawvel hmachhawn kawngah leh hlawhtling tura ke kan pennaah te huphurhna nei miah lova thil thlir a ngai tawh a ni a ti a. Zirlai hlawhtling ni tur chuan a thiamber nih theih a tha a, a thiamber nih loh pawhin a nawlpui ai tala thiam zawk nih a ngai tawh a ni a ti. Mahni seilenna hmun leh chhungkaw dinhmun chhuanawm lo deuh te leh harsatna tenau te chu hlawhtlinna kawngah daltu an ni tur a ni lo tih a sawi a. Taihmak, huaisen leh tumruhna a awm phawt chuan zirna chuan mitin tan hlawhtlinna kawngka a hawn sak vek a ni a ti. Zirtirtute leh zirlaite fuihna thu sawiin, "Kerala tluk thuakin ziak leh chhiar thiam lamah kan sang a. Amaherawh chu kan thiamna hian kan mamawh tam tak min la phuhruk sak lova.  All India Services te, Department thenkhat bik atana doctor kan tlakchhamna te leh kan state chhunga hna sang tak tak thawk thei kan awm thin lohnaah te hian kan inbihchian chuan tanlak ngaihna tura mual hi kan la ngah hle a ni", a ti.

He huna thuswitu TRC principal Dr R Lalrintluanga chuan, "dik ula, rinawm ula, taima ang che u," tiin, "Mizoram hian nangni lo hi zirlai dang a nei chuang lo, in kut hi Mizoram kut, in ke hi Mizoram ke, In mit hi Mizoram mit, in thluak hi Mizoram thluak a ni. Pathian leh Mizoram tan theihtawpin thawk rawh u." tiin zirlaite a fuih bawk.

GTRC principal Dr R Lalrintluanga chuan, GTRC chu Cut Off Mark awm lohna college a nih thu sawiin, direct admission tih thin a ni a, Seat awm dan zirin zirlai an la hnemin an la tlem mai thin niin a sawi a. 

Kumina Zirlai chhuakte hi 2016 a admission an tih lai chuan, 4% chu 1st Division an ni a, 25% chu 2nd Division niin, zirlai 71% chu 3rd division a pawl 12 pass an ni a. Mahse, 2019 MZU UG result a lo chhuah meuh chuan, khang mite duh loh zirlaite kha 70% 1st division-ah an pass a, 30% chu 2nd division ah an pass thung. Top 10 - Mizo parukna leh 10na an kawl a,  Education bikah 10-na an kawl thu sawiin,  "We turned a Stone into Gold." a ti.

"Zirtirtute leh Zirlaite thawhrimna vangin result tha kan nei a, 'Nazareth atangin thil tha a chhuak ngai lo' an tihna hmunah Khawvel chhandamtu a chhuak a, Mite endawng leh thin GTRC aṭangin thil tha a chhuak," a ti.

Tun dinhmunah GTRC-ah hian zirlai 1233 an awm mek a. 1st Semester ah Zirlai 546 awmin, 3rd sem ah 397 an awm a, 5th Semester ah zirlai 290 an awm bawk.

Kumin MZU Result chhuak taah khan an college hian result tha tak neiin an zirlai pass chhuak ta zinga 70% chu First Division leh 30% chu Second Division-ah an pass a ni.