MZP huaihawtin 'Ram Chhan Kawngzawh' neih; Mizoram Map hal;

Aizawl | July 19, 2019: Mizo Zirlai Pawl (MZP) huaihawtin vawiin khan zirlai sang telin Aizawl khawpui chhungah Ram chhan kawngzawh an nei. 

kawng zawh zirlaite hi, 'Sq. Miles 509 hi - Kan ram a ni,  Kan ram chhungah Assam in Office an siam hi - Ṭhiah ni rawh se, Ram humhalh ngam lo swrkar - Kan duh lo tih leh Mizoram humhalh turin -  Kan bei zel dawn' tiin an au rual.

Khatla kawn leh Zarkawt atangin thuang hnihin zawh a ni a, Vanapa Hall kawtah intawkkhawmin hetah hian a kharna hun hman  ani a, Mizoram Map hal a ni bawk.

He huna thusawitu MZP president L Ramdinliana chuan, "Ramri chungchanga MZP hian nasa takin hma kan la thin a, vuak leh Silaia kah hial te kan tawk thin a ni. Hetih laia kan Sorkar hrawn tawh ten zirlaite hmalakna an bawhzui ngam lo thin leh zirlaite thlavang an hauh ngam lo thin hi vawiin hian zirlaite rilru a na a ni." a ti a.

 

"Engvanga kawng zawh ngai leh thin nge a nih kan tih chuan, Zirlai ten thisen chhuak hial a kan beih, nunna chan huam chunga kan beih chung pawhin Mizoram Sorkar in hmalakna a neih thin loh avangin kan  Sorkar karna atan leh kan Sorkar auh eih nan kawng hi zawh a ngai leh thin a ni. Kan Sorkar hian a ram mipuite duh dan hian hma la se chuan Kawngzawh leh thin hi a ngai lo tur a ni. Assam lamin kawng an zawh ve thin em? tih zawhna a awm thin a, Assam state chu an Sorkar a huaisen a, an Sorkar auh eih chawp an ngai ve lo a, an Sorkarin an vei a ni. Assam Sorkar ang hian Mizoram Sorkar hian vei ve se, huaisen ve se zirlaiten kawng kan zawh hi a ngai bik lo ang. Ramri chungchangah hi chuan Mizoram hian Sorkar huaisen kan mamawh hle a ni. Mizoram kan chan belh zel loh nan leh kan pi leh pu te luahchin ram Mizoram chin humhalh a, kan neih let leh ngei theih nan Mizo zirlai ten hma kan lak chhunzawm zel dawn a ni." a ti bawk.

Zirlaite hian resolution an pass a. chungte chu;

1. Mizoram leh Assam ramri Assam state in min lo chuhpui thin hi chinfel a nih theih nan Mizoram Sorkar in chak takin hma la rawh se.

2. Mizoram Sorkar Council of Minister Meeting in Bengal Eastern Fontier Regulation 1873 hmanga 1875 notification a chhuah, Mizoram leh Assam ramri atan a pawm hi lawmawm kan ti hle a. Hei hi a taka a hlawhtlin theih nan Mizoram Sorkar in chak takin hma la se la, Inner Line Reserve Forest Area 509 Assam Forest Department in a enkawl mek hi Mizoram Forest Department in a enkawl letleh theih nan Mizoram Sorkar in hma la rawh se.

3. Mizoram MAP kan hman lai hi MAP dik lo a ni a, 1875 ramri anga MAP dik tak hman a nih theih nan Mizoram Sorkar hian official in Mizoram a hman turin a rang lamin siam tha rawh se.

4. Mizoram Sorkar hian kan ramchhung a, a bik in Inner Line Reserved Forest Area 509 Sq. Miles chhunga dan lo anga in bengbel te leh Assam Forest Department lakah hian Schedule Cast and Schedule Tribe Prevention of Attrocities Act hnuaiah dan angin hma la rawh se.

5. Mizoram kan chan belh zel loh nan leh kan pi leh pu te luahchin ram Mizoram chin humhalh a, kan neih let leh ngei theih nan Mizo zirlai ten hma kan lak chhunzawm zel dawn a ni.