 |
Mizo ṭhalaite'n a lemziah vanga an ngainat leh lawm em em, amah tak hrechiang si lova a lemziah zuna an uai, hriatchian an châk em em PC Hras tia kan hriat ngei mai chuan a hun chêp tak karah inkawmna hun min siamsak a, Exploremizoram.com kan lawm tak zet a. A kal zelna turah duhsakna hlan bawk e.
(He inkawmna hi 2018 kum tir lam a ni tawh a, tunah chuan lemziah bakah Youtube lamah a hun a hmang tawh.)
Hming : PC. Vanlalhruaia (Hras)
Koh dan : Hruaia/ Hras
Pian ni : 25th September
Pianna : Bualpui ‘V’
Nu Hming : C. Lalènpuii
Pa Hming : PC. Rochhûma
Khua : Bualpui ‘V’
Tuna awmna : Aizawl Venglai
Tuna tih mek/ Eizawnna : Freelancer Illustrator
Zirna lam : MCA
Formal Education ni lo zir dang : Nil
Hobby : Drawing, Playing football, Watching Movies, reading
Favourite :
Books – Fairy Tales and Stories by Hans Christian Andersen, Khelmual nunchan – S. Malsâwmtluanga (Mizo \halaiten chhiar vek thei ila ka ti khawp mai..)
Artists – Walt Disney, Albert Uderzo, Sergio Aragones, Ram Waeerkar, Arijit Dutta Chowdhury, Lal\anpuia Chhangtê.
Leaders – M.K. Gandhi, Aung San Suu Kyi
Singer – Lalrindiki Khiangtê (Daduhi)
Dish – Sangha, Mautuai/Rawtuai
Song – ‘Imanuela thi zâman’
Place – Paris
Writers – Brothers Grimm, Hans Christian Andersen
*** I Hun awlah website a fakna hi lo click ve rawh le. ***
Tuna I thil tih meka I luh dan leh bul tan dan :
- Tunah hian Milem (comic leh illustration) ziakin kum 1 leh a chanve ka hmang ve mêk. Mahni in lum aṭangin ka ziak a, e-mail in ka thawn mai ṭhin.
Milem ziah hi ka zir lo a, mahni tui tuia tui chho ve ka ni. 2008 thleng khan lem ziah ka tui em em a, 2009 te pawh khan Mizoram magazine ṭhenkhatah lem ziakin Pu Ṭpa ka pui ve ṭhin.
*** I Hun awlah website a fakna hi lo click ve rawh le. ***
Amaherawhchu, Chhungte’n lehkha zira insawrbing tura min tih avang leh Lem ziah hi Mizoramah chuan hlâwk lova ka hriat avangin, 2010 aṭang kha chuan lem ziah hi ka chawlhsan hmiah. Kum 5 chuang zet ka chawlh san a, tun hnu hian ka inchhir ṭhin khawp mai.
Khuaah Sikul zirtirtuah ka awm ve a, sikul naupanghoin milem min ziahtir zeuh zeuh avangin, 2016 aṭang khan ka ziak leh ṭan ta a. Comic te ka han ziak chho leh ta a, Internet te a awm tawh avangin Mizoram pâwna ‘try’ ka châk ta tlat a! Tinkle comic-ah ka lem ziahte ka thawn tâ a, mahse, beisei ang a lo ni hauh lo mai. Vawi tam tak ka thawn hnu pawhin, an pawm thei lo, thawn nasa tak ka ni ringawt! “Ka skill a lo \ha lo hle aniang” “Mizote tan chuan a lo harsa a nih hi” etc.. ka rilru-ah hnualna chi hrang hrang a lo lut chho a, ka beidawng titih ta der mai. Mahse, vanneihthlak deuh maiin, Tinkle former Artist, Arijit Dutta Chowdhury nen fb-ah kan inbe fuh hlauh mai! (Ani hi Bengali mi niin, freelancer illustrator a ni.) Kawng engkimah min pui a, magazine hrang hranga try turin min hrilh ta a, ani min hrilh ang chuan ka try leh ta hlawm a, mahse, an reh vang vang hlawm.
Beiseina eng mah ka neih tawh loh hnu-ah November 15, 2016 khan Mumbai magazine pakhatin min lo pawm hlauh mai a, tichuan ka inziak chho ve ta a ni. Mizoramah state pawn Comic/magazine vela ziak hi an la awm lo maithei, han biak râwn tur pawh ka nei lo, Risk ka la ve tawp mai a ni. Tunah hian India ram children’s magazine ah ka thawk ve nual mêk a ni. Tinkle-ah hian ka thawk lo a, vawi 1 min ziahtir tawh. Tin, magazine ni lêm lo; comic i-lo ziah ve neuh neuh ka nei fo bawk.
Hetiang dinhmuna ka din ve theih chhana ka hriat ṭhin chu, ka ziah peih hrim hrimna hi Lapa’n mal min sâwm ve niin ka hria.
Lem ziah/ziak hi Mizo ṭhalaite tana eizawnna tlak niin I hria em?
- Lem ziak hi chi hrang hrang a awm a, kei chu cartoon, comic leh illustrations lam ti mi ka ni. Line dang - Painting, animation tih vel hi chu ka hre lem lo.
Keima line bik angah hian, kan thiamna in a tlin a, thawhna kan hmuh chuan eizawnna a tling. Mahse, freelancer illustrator ai chuan a hmun ngeia thawh chilh tluk a awm lo. Freelancer hlawhtling ni tur chuan intah hriama, mahni inpho lan peih/thiam fo a ṭul bawk. Lem ziah line dang pawh hi a eizawnna a tlin tho ka ring, mahse ṭhahnem ngaih a ngai a, inthlahdah leh dêl dûl nun nen chuan a harsa deuh ang.
Lem ziakah hian mahni inpho lan (Expose) tam a pawimawh hlein ka hria, keipawh, mahni ka inpho lan tam avangin India ram state pakhat a an text book ka illustrate ve tawh.
*** I Hun awlah website a fakna hi lo click ve rawh le. ***
Tui ve chi niin I hria em?
- Tui ve chî ni e, duhthusâm phei chuan a zirna school-ah ngei zir nise. Kum naupan laia zir ni thei se a duhawm leh zual ang. A zira zir nge nge chu, a thiam rau rauah pawh an kuthnu a mawi bik a, chu chu magazine lâr deuh phei chuan an enna a ni fo. Tin, phone leh thil dang ṭangkai lutuk lo ai chuan Tablet pen te nen te inzir chho thei se a ṭha leh zual ang. Animation te hi zir tlak lutuk a ni, nakin zelah a la hlawk chho tawlh tawlhin ka ring. Neihin a tlin phei chuan Mizoram pâwnah zir te hi a ṭha hlei hlei.Tin, Art line dangte pawh.
Mahse, zirna school-a kal thei lo leh hmanraw ṭha nei lo pawh hnual lova, ṭan phah sauh sauh zawk tur. Keipawh têt lain milem leh cartoon kan hmu meuh lo, kan zirlaibua mi te entawnin, ball-pen leh Mikado exercise book-a zir mai mai ka ni! Tin, a theih chuan zirnaah pawl 12 emaw Bachelor degree emaw tal thlen tum tur. Khawi kawng pawh zawh dawn ila, Lehkhathiam leh English thiam hi a lo ṭangkai em em a ni.
I idol/icon/I ngaihsan ber ?
- Pahnih ka tarlang hrâm te’ng. A hmasa zâwk chu Mother Teresa, ka nunah; phâk ang tâwka midangte ṭanpui duhna nasa takin min neihtir.
A pahnihnaah, Walt Disney (Mickey Mouse siam tu); ani hi beidawnna ruama ka tân lai pawha, beiseina min neih thartir fotu a ni.
Ṭhalaite tana chah duh i nei em?
- Mizote’n kan tlakchham ṭhin- ‘tih tak takna’ hi hlawhtlinna rahbi pawimawh berte zinga mi a ni, chu chu neih I tum thar leh ang u. Thil ṭangkai lo leh ruihhlo te hi kan in-eichhiattir nasa tawh mah mah, hetiang lakah hian fihlim thei khawpin I huaisen ang u. Tin, tunlai thiamna sáng tawh takin a ken tel thil te hi a ṭangkai zâwnga hman thiam I tum ang u, ṭangkai tura an siam hi keini’n kan lo chhiatpui hlauh zel hi a pawi \hin. Internet (Social Media, YouTube etc.) te hi midangte pawi khawih leh pawi sawi nan hmang lo va, sum siam nan te, kan hmasawn nan te hman I tum tlat ang u.
Exploremizoram.com I hmuh dan ?
- Exploremizoram.com Zoram ṭhalaite tan hetiang a lo awm hi a va ṭha tak! Hmuhnawm leh ngaihnawm satliah mai a ni lo a, kan hma lam hun atana kan hmasawnna tur awmkhawmna a ni. Hetiang ang website siam a ni hi Mizoram ṭhalaite tan vanneihna a ni, I tlawh fo ṭhin ang u. Tin, ṭha tak leh hlawhtling taka kalpui a nih zel theih nan duhsakna sang ber ka hlan e, ka lawm e.
*** I Hun awlah website a fakna hi lo click ve rawh le. ***
EXPLORE MIZORAM
© WWW.EXPLOREMIZORAM.COM ©
Made With ❤ In Mizoram!
Post a Comment
He post chungchanga i ngaihdan lo sawi ve rawh: