AN LUNGLENG VE NGEI ANG

        -    C. Lalthazuala

            Khai le,  Mizo lenglawng hla ropui ber te zinga mi, ' An lungleng ve ngei ang ' tih hla mawi tak mai chhung leh pawn velah hian i han inkawm ho leh teh ang u.

Kum 1994 lo in her chhuak chuan Mizo rimawi khawvel hmasawnna thar a rawn her chhuahpui a tihloh theih lovang. Engvangin maw? E le, ‘An Lungleng Ve Ngei Ang’ tih hla mawi dangdai tak mai All India Radio Aizawl station-a record kum leh Zohnahthlak hnam zawng zawng tana tihchhuah kum a ni tlat alawm.

Zaithiam leh hla phuah thiam hmingthang R.Vanrammawia chu Aizawl Radio Station lamin hla thar thun tura an koh tum chuan tuma la sak ngailoh hla, ruahthamloh hla thun ngei a duh avangin he hla ‘An Lungleng Ve Ngei Ang’ tih hla pawh hi radio-a hla an thun (record) hma hret ni chauh a la awm tiha a phuah ani a, a phuah lai vel pawn hetiang tak hian he hla hian mite rilru-ah bu a khuar nghet tlat ang tih a ring phak bik lo. He hla broadcast anih atanga hla thlan hlawh ber lawr lak a la nih tur thu te, All India Radio-Aizawl Top Ten Countdown-a  No. 1 kum 10 chhung zet hauh zing ber anih tur thu te, Doordharshan Kendra - Aizawl a kum 3 chhung zet chatlak awm miahlova hla thlan programme -a a tel mar pat zia te hi a phuahtu chu sawiloh, he hla lo record-tute, a remsaktu musician-te pawn an suangtuah pha hauh lovang. 

R Vanrammawia pian leh murna khua Sihphir khua hi, Zokhawsang lunglen changa khua han chuan vel nana hmun thengthaw nuam tak a ni ve hrim hrim a. R.Vanrammawia chuan chawp leh chilha a lunglen thut avanga he hla hi phuah a nih loh thu leh “Nu in naute a hrin laiin tuman fa engzat nge i pai tawh? tiin an inzawt ngailo ang hian, nun hlui ngaih leh khawtlang lunglen hi chu ka pai ve sa hrim hrima, ‘An Lungleng Ve Ngei Ang’ tih hla ah hian ka hring ta mai ani e” tiin a sawi nghe nghe ani.

Zokhaw mawi leh lunglen thlak, zo thlifim thaw heuh heuh te tuallenna leh thing hnah nem ten an hual vel Sihphir khuaah Rosiama leh Chhingpuii fa 8 zinga a laihawl, ami lai tak niin, an unau hi zaithiam vek anni a, R.Vanrammawia sawi dan phei chuan a nu leh a pa te hian ‘Kan fate zinga a aw chhe ber a lar ta ber teh tlat mai a’ an ti thin e' a ti. 

Kum 1994-a he hla Aizawl Radio Station-a thun a nih a, Zofate tana chhawpchhuah anih atanga kum 2013, kumin thleng hian a lar chhunzawm chho pat reng ta maia, fakna hla ani emaw, lengzem hla ani emaw, hla lenglawng a bik takin nunhlui ngaih hla ani emaw, hetiang taka hla lar chhunzawm mar rei hi zo rimawi history ah hian sawi tur a awm zeuh zeuh chauh ani. 

AIR version hi ‘live recording’ ani a, vai ho khuang tung, ‘tabla’ mawi dangdai tak maia lo beng ri tleng tlengtu hi KC Chhuana ani a, Rangoon lama music zir tawh niin a boral tawh nghe nghe ani. AIR version ‘live recording’ ngei mai hi a mawi dangdai ber chu ani a. Hemi tuma guitar mawi taka lo perh a, guitar solo te lo siamtu hi Lalengzauva ani a, perhkhuang hruithum lo perhtu hming hi R Vanrammawia ngei pawh hian a hre thei mai bik tawhlo, a lungleng lutuk ang a, a hrechhuak thei tawhlo pawh a ni mai thei!!! 

R.Vanrammawia hian hla 30 atanga 40 bawr vel a phuah tawh a, Pathian fakna hla mawi tak takte pawh phuah telin kum 1989-a AIR-Aizawl-a a thun, ‘Kir An Rello’ tih leh ‘A Reilo Em’ tih hlate pawh kha a larpui hle, fakna hla thlan hlawh ber zingah an tel phaka, ‘Kir An Rello’ tih hla phei hi chu RTC Lalduhawmi pawhin a lar pui hle thin anih kha.

‘An Lungleng Ve Ngei Ang’ tih hla, Radio hmanga zo-rimawi khawvel a nghawrnghin hnu lawkah Aizawl Doordharshan Kendra lamah han thun lehin, hemi tuma Music arrangement buaipuitu chu T Melody guitarist lo ni ta, Thanthawnga hi a ni a. He hla mawi tak mai music video-a nula hmeltha tak, R.Vanrammawia sira lo thu ve kha, Lucy Lalhmangaihi anih kha. Tunah Norway ramah a awm tawh. 

*** I Hun awlah website a fakna hi lo click ve rawh le. ***

AIR-Aizawl station leh Aizawl DDK kaltlanga Mizoram leh khawvel ram bung hrang hranga Zohnahthlak hnam chitinte hmuhtheih leh ngaihthlak theiha chhawp chhuah anih hnuah audio album ‘An Lungleng Ve Ngei Ang’ tih chu 1999 kumah tlangzarh a han ni zui leh a, Mizoram khaw kar zawnga tlan lirthei ah te an play nasat em avangin Zoram chhunga kawngpui pawimawh bikah te chuan, lirthei tlan reng reng hi ‘An Lungleng Ve Ngei Ang’ tih hla an tlanpui chuah chuah mai zunia mawle!! 

Ngaiteh u, he hla ti dangdai bik riautu chu a hla thupui ngei atana a phuahtuin a hman ‘An Lungleng Ve Ngei Ang’ tih Tuipui ral tawng, Tuipui ral hovina gramartically-a ‘third person’ a hmang hi a ni a, nunhlui liamhnu kohkir theih ni tawh silo te chu amah R Vanrammawia chauhin a ngai bik lovang, amah chauhin a dawn \hin bik lovang, a thian ngainat awm tak takte pawh khan an dawn ve thin anga, an hrechhuak ve \hin anga, ‘an lungleng ve ngei ang’ tia a \hiante rilru tur thiam taka a tarlan sak daih mai te hi dangdai ve tak ania aw! Nunhlui ngaihna hla rau rauah pawh a thu rem khawm dan hi a dangdai bik riau ania. Audio album-a tingtang perhsaktu Hmingpuia guitar solo mawi tak mai kha awmni kham meuha, ruaipui nena ngaihthlak tham mawle!!! 

Khawvel mawina leilung timawitu, khuanu kutchhuak, parmawi tin vul chûk mai te, tlangdung hmuhnawm tham, han inkham tawn vel diai duai mai, bawm veltu thal romei zam chiai maite leh thinghnahnem, virthli leng ten an chhem âwn tawh vel siau siau mai te, hramthiam va tin zai vawr ri te leh van dum pawl ruih cheimawitu, vanrang chhum chunglam van boruaka inphan mar pet put te, tlangdung ropui tak tak kara lamlian kal kawi ngiai nguai mai ten an paltlang, ralkhat hla taka zokhaw lian vaklo lo lang tle neuh neuh, rangva inchung lang tle neuh neuhte han thlir chang nite hian lung a lenga, kan lunglenna chuan suangtuahna khawvelah min zinpui vawng vawnga, mitkhap kar lek chhungin nun hlui liam hnu min chhui kir tir a, min dawn kir tira, nunhlui ngaihna hla kan sa a, kan auchhuahpui a kan ngaithla thin.

R.Vanrammawia hla ropui, lung  ti leng a phuahtu ngeiin lungleng taka a sak, khawvel tawp thleng pawha dai tawh ngailo tur, Zofate rilrua bu khuar tlat tawh tur, ‘An Lungleng Ve Ngei Ang’ tih hla thu mawi tak mai chu i han chhawpchhuak tel nghe nghe ang u hmiang.

'An Lungleng Ve Ngei Ang'

Phuahtu -R.Vanrammawia

Satu:   R.Vanrammawia,               

R.Lalhmangaiha,                

Ramhlun ‘N’ YMA Zaipawl

1. Awm khawhar changin ka dawn vel thin a,

 He hringnung pâr ang vullai ni te;

 Mual min liamsan thin kan hlim ni ten,

 Hmanlai an chang zo nghilh har ngei.

     Lenrual duh te nen hlim te in,

     Zaitin kan vawr lai kha;

     Ka ngai thin e thiante kha,

     Kan lenna a dang zo ta si,

     Ka hming an hriat chhuah changin;

     Kan nundan thin an dawn kir ve ang a,

     An lungleng ve ngei ang.

2.  Han hawi vel hian in tlangtin dam diai,

     Thal romei zing riai lenkawl eng leh;

     Chhemdam thlifim leh thinghnah nem te'n,

      Nungcha hram thiam te'n min ngaihtir thin.


*** I Hun awlah website a fakna hi lo click ve rawh le. ***