MZP in hna lakah Zofate induhsak phut; Caroline Malsawmtluangi leh Johny Laltlanmawia chawimawi dawn

Aizawl | July 9, 2019: MZP chuan nimin khan meeting neiin, hna lak ah a ram leilungfa te duhsak an phut thu an tarlang a. Mizo hmeichhe rukbo chhantu hmeichhe naupang huaisen Caroline Malsawmtluangi leh Everester Johny Laltlanmawia te chawimawina hlan an tum.

MZP chuan, College zirna in hrang hranga zirtirtu indaihlohna phuhruk tura Asst. Professor, Rashtriya Uchattar Shiksha Abhiyan(RUSA) hnuaia Mizoram Public Service Commission(MPSC) kal tlanga hnalak tur kalpui mek chu an lawm hle a. 

Hetihlai hian Interview tura koh zingah hnamdang an tam hle tih MZP chuan an hria a, interview tura koh tawh hrim hrim chu hnathawk thei tura thiamna nei an ni tih hi MZP chuan a ngaihdan a ni. Kan tlin leh theihna chinah chuan ram leilung fa ngei la turin MZP chuan Sawrkar leh MPSC thuneitute an ngen bawk.

 Tin, tunlai hian Mizoram University hnuaiah hna chi hrang hrang lak mek a ni a,  Mizoram University (MZU) hnuaiah hian hnamdang thahnem tak an thawk tih MZP chuan a hria a, thiamna sang zawk leh ril zawk nei an nih chuan pawi a ti lo a, amaherawh chu thiamna inang leh nihna inangah chuan a ram leilung fate duhsak thin turin MZP chuan Mizoram University(MZU) thuneitute an ngen.

MZP chuan kum danga an lo tih thin angin zirlaite tan an zirna mai piah lamah hriselna leh mi talent nei thate tan kawng hrang hrangin ruahmanna a nei thin a, kum 2019 chhungin Mizoram chhunga College zirlaite tan inelna thianghlim, an zirna a tana tangkai tur Inter-College Quiz Competition leh talent nei tha te tan Mizoram Football Association(MFA) nen tang kawpin Inter College Futsal Tournament ropui tak buatsaih nise tih rel a ni.

MZP chhungkua, College Students' Union Leader, Hnampual hruaitu kum 2019 chhunga zirna a degree nei tharte leh hnamdang laka Zofate min ti hmingthatu leh min pholangtu te chawimawina hun a lo hman tawh thin angin, July 27 hian Degree nei tharte leh June 12 a naupang rukbo, huaisen taka chhanchhuak tu Carolyn Malsawmtluangi kum 11 leh khawvel tlangsang ber Mt. Everest lawn chhuak tu Johny Laltlanmawia te chu chawimawina hun hman nise tih rel a ni bawk.

Vawiin khan MZP hruaitute chuan RUSA hnuaia MPSC kaltlanga Asst. Professor hnalak chungchangah MPSC chairman chu a office-ah hmuh niin thil pawimawh hrang hrang sawipui bawk.


*** I Hun awlah website a fakna hi lo click ve rawh le. ***