VEI THAR NGAI RAMRI

- Bawihpuia Pa

Assam nen kan inrina chungchangah thil fel a awm thei lo reng a, ram zau tak kan inchuh reng. Assam lam chuan ngam takin an ram chin nia an ngaih an nek pawp pawp a, in an sa a, field an lai a, school te, police out post, biak in te bakah Bangladesh raltlante chentir nan khua an din hial bawk. Chutih lai chuan Mizote erawh chuan ram ri humhalh turin hma kan la ṭha hleithei meuh lova, hma kan la ngam lo ti pawhin a sawi theih thung ang. Kan ram chhung ngeiah tlawm zawkah kan ṭang reng a, zirlai pawisawi loten hliampui an tuar chung pawhin Sailo lal, ni leh thla kara lengte meuh pawhin an thlavang an hauh ngam lo a, meikhupin an tlawm chu a ni si. Fate thlavang hauh ngam lo, pa dawihzep Zoramin a lo nei reng chu niin.

Mizoram leh Assam hian ram zau tak 509sq.miles kan inchuh mek a, ram inchuh a nih vangin 'Status Quo' a puan a ni a, chu chu 'tu zawk zawk pawhin kut thlak a, hma lak rih loh tur' tihna a ni. He status quo hi Mizorama sorkar kan neih tawhte chuan an zawm ṭha em em vek a, ramri chungchang sawi apiang an sawi hmasak, an chhuanlam langsar tak a ni. He status quo vang hian Mizoram hian a ram chhung china a ngaihah pawh hma a la ngai lo a ni ber a. MZP ten LSC an neihna ngeiah pawh chawlhbuk tak ngial pawh an sa thei lo. Sak phalsak an nih loh vangin Assam Police ten silai hialin an kap ta hial reng a nih kha. Zirlaiten hliam pui an tawrh lai khan ram ram hruaituten engnge an tih...puan lukhupin an biru a ni lawm ni? Khami ṭuma Mizoram Chief Minister baka pawnfen feng tlak tu dang nge awm ang i?

Mizoram sorkar leh official ten 'Status Quo' an sawi vul chuk lai hian Assam lam erawh chuan engmah pawisa lovin an nek pawp pawp a, hma an la miah miah thung. Bairabi lui bul lawkah school te an sa a, Police out post te an din a, khuate an din hial a, huan lo ram an din bawk. Vairengte lamah lah Forrest deparment lamin office an sa a, Mizoram Police te mit hmuh laiin an sa a, zan laiah an luah lut zui bawk. Police hotu pakhat chuan Assam lam hian an ram chinah hna an thawk ni awmin chu sawi leh nghal a mawle...zahthlak chuan. Zoram hi kan hmangaih lova, pi leh puten lu chhum ban chhum huama an sah zau ram hi chan an pawi li lova, vai lak atan an chhan ngam ve lo a nih pawhin Mizo mipui leh Zirlaite rilru tina lo tura thil sawi tam loh a, ngawih chhuh thiam a ṭha ṭhin ngawt mai.

Ramri-ah buaina a awm a, boruak a lum deuh laih reng rengah Mizote dik lo zawk ang a kan lang a, dawih zawk anga kan lang ziah mai pawhi a tlawmthlak ngawt mai. 'Hnam huaisen' kan inti ve ṭhin tak nanga keini aia ralthuam nei chhe zawk, zei lo zawk, dawih zawk nia ngaih te aia kan sorkar leh Police te an dawih zawk anga kan ngai tlat maite hi a tlawmthlak ngawt mai. Kan lo zahpui ṭhinte hian zah nachangte hre ve tak ang maw le. An chezia hi Khuangchera te, Taitesen-a te hnampui chezia tura mawi a ni lul lo.

Mizo mipui ten kan hriat chian em em ngai chu ramri a buaina nia kan hriat zawng zawng hi ramri-a buaina ni lovin, Mizoram chhung, Mizoram chin zela buaina a ni tih hi. Assam khuan zuam takin min nek tawk tawk a, kan huan pal ṭhiat in, kan luhka bul lawkah ban an rawn phun a, an rawn inbeng bel a ni ber mai. Ramri tak tak, Mizoram chin tak tak chu khu tah, hla takah a ni daih zawk.  Kan ram china min rawn tihbuai changa hnam dang, hnam dangah pawh dik lo zawkte dem lova, kan Mizo puite emaw, kan zirlaite emaw lo dem vak vak hi kan tih tur a ni lovang. Hriat loh vanga kan lo ti palh hlauh tawh a nih pawhin sim a, tihnawn leh tawh ngai loh chi a ni.

Zophai-ah MZP ten Zofate chawlhbuk sak an tum a, Assam Police ten nunrawng taka an tihbuai ṭum March ni 8-10, 2018 chhung khan, khatih laia Sorkar lai MLA pakhat chuan, "Chawlhbuk hi kan dintir thei lo a nih chuan, kan tluk phah ang a, kan dingchhuak lovang...", a ti a. Chawlhbuk an dintir lo miau a, an tluchhe zui ta reng a ni. Tu sorkar pawh nise ramri hi veina tak tak an nei lova, kan ram chin humhalh duhna nei tak tak lova, party police leh therhlo te te an buaipui zawk a nih chuan rei an daihin a rinawm lova, an tlu chhe zui ve thei reng a ni. Ṭawngkam mai ni lo, midang dem ngawt ni lo, a tak taka ramri hi kan vei thar a ngai ta ngawt mai. 

Hnam huaisen Mizote i i harh teh ang u.