Vawi sarih matric a exam-naah a hlawhtling

Vawi sarih matric a exam-naah a hlawhtling ve hram. Chanchinbu sem aṭangin bus conductor, ar sa a sêr hnuah lu a mêt. Tuichawia inhlawh pahin lirthei a kharchhawng a, KT Enterprise a din.

Tunlai ṭhalai zingah kum 39 mi Pu Chawngthankhuma chanchin hi ngaihnawm danglam tak a ni hrim hrim mai. LPS Pro Fight, Mizoram Super League (basketball), Pro Volleyball-ahte sum thawhtu ṭangkai niin sponsorship titu zingah a tel tawh a, kum 20 chhunga a tawn hriat leh a thiltih hi i tan leh ka tan chona min siamsak thei a ni ngei ang.

Thawh tur tamzia a sawi a : "Thawh tur a tam lutuk; a tirin a hlawk lo va, hmasawnna hi a tahtawlin a thleng ṭhin."

1993 - Kawlbem aṭangin Aizawlah an pem.

1997 - Zingkarah 'Hnehtu' chanchinbu semin a inhlawh.

1998 - Thla 3 chhung pawl 10 zirin sikul a kal a, hnathawh a duh zawk vangin a bang. 'Hnehtu' chanchinbu a sem chhunzawm zel bakah chhunah hna awm apiang thawkin a inhlawh.

1999 - Zingah open school-ah kalin Matric a zir zawm. Kum chanveah bus conductor hna a thawk ṭan a, class kal zawm thei lo mah se fee pein a exam ve thei.

2000 - Kum thar ni-ah pawh awl lovin ṭhahnem ngai takin a bei a, kum chanve thleng bus conductor-ah a ṭang. Kum chanve hnu lamah inhlawhin a rem rem a thawk.

2001 - Ar sa sêrin phur takin hna thar a zuan.

2002 - Ar sa a sêr zui zel a, kum chanve aṭangin lu mêtin hna dang a thawhsan leh.

2003 - A vawi sarih nan open school aṭangin matric a exam a (kum khatah vawi hnih a exam ṭhin), a hlawhtling ve ta hram. A patêa'n Sumo a nei a, enkawlin a khalh thiam nghal.

2004 - A inhlawhna pawisa a khawl nen ṭangkawpin loan a la a, 407 truck leiin tui chawi nan a hmang a, risk a la.

2005 - A che fuh hle a, loan hmang bawkin 407 truck a lak belh leh a, tuichawiin huang a zauh a, theihpatawpin a bei a, a hlawkpui.

2007 - Ama motor khalhin mi dang a chhawr tel a, tuichawiin a inhlawh zui zel a, motor hlui leiin a chei ṭha a, man to zawkin a hralh tel nghal bawk.

2008 - Motor khalh lovin driver a chhawr tawh a, enkawl hna a thawk. A thawhchhuah a khawl aṭangin Ramhlun North-a an inhmunah concrete building sak hna a ṭan bawk. Sorkar hna aṭangin a pa a pension a, Rs 3,50,00 pein bus hlui lei nan a hmang. He bus hi kum 10 a kawl hnuah Rs 3,00,000-in a hralh.

2010 - In a sa zo. Amah ngeiin ti hian min hrilh a : "Concrete building chhungah ka cheng ve hrim hrim tur a ni ka ti a, a malsawmna ka dawn ka ngaihtuah hian 'Pathian hnenah lawmthu ka sawi nasa em em a ni.'"

2015 - Sumdawnna lian zawk a ngaihtuah a, April-ah KT Enterprise a din a, home appliance company Sharp nen indawrin a che fuh lo. Mahse, June-ah Japanese home appliance company Panasonic nen inremna siamin distributor (Mizorama pe chhuaktu) a ni zui a, hma lam panin ke a pen.

2018 - A sumdawnna a ṭhang zel a, Ramhlun North-ah an chenna aia inhmun ualau zawk Rs nuai 75-in a lei.

2019 - Zau zawka sumdawnna kawng a zawng a, March-ah Panasonic distributor a nihna nena kawp turin Samsung home appliance-ah direct dealer-in a awm zui leh a, hma a sawn zel.

- Source unknown


*** I Hun awlah website a fakna hi lo click ve rawh le. ***