Aizawl | July 4, 2019: Mizoram Youth Commission (MYC) chairman atan Lunglei North bialtu MLA Dr Vanlalṭanpuia ruat a ni. MYC chairman atana ruat hmasak Zothantluanga, Aizawl West-I bialtu MLA-in a phat avangin a ai a awh dawn. MYC hi Sports & Youth Services department hnuaiah a awm tawh dawn.
MYC nodal department Labour, Emlpoyment, Skill Development & Entre-preneurship (LESDE) department minister Lalchhandama Ralte hnen aṭanga Vanglaini thu dawn danin, Zothan-tluanga hi a educational certifcate-ah chuan kum 65 a la tling lo a, MYC chairman leh member a la ni theia ngaih a ni a; mahse, a kum dik takah 65 a tling tawh thung.
Zothantluanga chuan, a kum dik anga MYC chairman a nih theih tawh loh avangin, harsatna a awm lohna atan MYC chairman aṭanga bânna a thehlut. Hei vang hian MYC chairman ruat thar leh tura ngenna Chief Minister hnenah thehluh a ni a; MYC chairman atana Dr Vanlalṭanpuia ruatna chu July 2, Thawhlehni khan LESDE Special Secretary-in a ti chhuak a ni.
LESDE minister Lalchhandama Ralte chuan, Mizoram sorkarin ṭhalaite hmasawnna an ngaih pawimawh thu sawiin, "MYC-a awm sa bakah hian sorkar chuan ṭhalaite'n hma an sawn theihna atan Man Power Development Board a din a ni. He Board hian MYC nen inhne remin hna an thawk ang," a ti a; sorkarin ṭhalaite tan theihtawp chhuah a tum thu a sawi.
Lalchhandama Ralte sawi danin, Allocation of Business Rules thar berah chuan MYC hi Sports & Youth Services department hnuaiah dah a ni tawh a, chairman thar ruat a nih aṭangin Sports & Youth Services hnuaiah an awm tawh dawn. MNF sorkar hmasak khan MYC hi Sports & Youth Services department hnuaiah a awm a ni.
Post a Comment
He post chungchanga i ngaihdan lo sawi ve rawh: