Mizoramah sorkar middle school 570 a awm Zirtirtu pakhatin zirlai 7.39 zel an enkawl M/S pakhatah zirlai leh zirtirtu 7 ve ve an awm

Mizoram chhunga district pariat - Aizawl, Champhai, Kolasib, Lawngtlai, Lunglei, Mamit, Serchhip leh Siaha district-ahte sorkar middle school 570 a awm a, zirlai 29,885 leh zirtirtu 4,046 an awm. Zirtirtu pakhatin zirlai 7.39 zel enkawl ang an ni.

Selesih M/S-ah chuan zirlai leh zirtirtu pasarih ve ve an awm!

Vanglaini-in RTI Act hmanga a zawhna School Education department-in an chhan danin, Mizoram puma middle school zirlai 29,885 zingah hmeichhia aiin mipa 739-in an tam zawk a, zirtirtu zawng zawng 4,046 zingah hmeichhia aiin mipa 1,132-in an tam zawk.

District pariat zingah Lawngtlai district-ah M/S 18 leh Siaha district-ah M/S 27 a awm a, district dang nena khaikhinin an tlem fál. 

Mizoram sorkar M/S tlemna ber Lawngtlai district-ah chuan zirlai 881 chiah an awm a, zirlai 1,000 awm tlin lohna district awm chhun a ni.

Aizawl district bikah sorkar M/S 181 a awm a, Aizawl khawpui chhung bikah M/S 68 leh thingtlangah M/S 112 a awm. Aizawl district-ah hian zirtirtu pakhatin zirlai 6.96 zel an zirtir anga chhût a ni.

Zawhna chhannaa a lan danin thingtlang aiin Aizawl khawpui chhungah zirtirtu an tam.

Middle school zinga zirtirtu awm tlem berna Zohmun M/S-ah zirlai 47 awmin, zirtirtu pahnihin an enkawl. Aizawl khawpui chhunga M/S 68 zingah, zirlai 40 awm tlin lohna M/S 29 a awm a; zirlai 40 awm tlin lohna M/S 29-ah hian zirtirtu awm tlem bernaah sikulah zirtirtu pasarih an awm a, M/S dangah chuan zirtirtu 8-12 inkar an awm thung.

Aizawl khawpui chhung bikah hian M/S ṭhenkhatah chuan zirlai 60 awm tlin lohnaah zirtirtu 10-te an awm a, M/S pakhata zirlai 39 awmnaah chuan zirtirtu 12 an awm a; zirlai 20 awmnaa zirtirtu 10 awmna sikul pakhat a awm bawk. Zirtirtu 8-12 awmnaah zirlai a tlangpuiin 40-50 inkar vel an awm a, zirlai bukna deuh (zirlai 70-90 vel) awmna M/S a awm zauh zauh.

Combine M/S Zarkawt, Aizawlah M/S zirlai 15 chiah awmin, zirtirtu pasarihin an enkawl a; Aizawl Venglai M/S-ah pawh zirlai 11 awmte chu zirtirtu pariatin an enkawl. 

Aizawl aṭanga khaw hnâi têa M/S pakhatah chuan zirlai leh zirtirtu an inzat a, pasarih ve ve an awm a ni. 

Thingtlang khaw pahnih/pathuma M/S-ah zirlai 14/15 awmnaah zirtirtu 6-8 awmna a awm ve zauh a, thingtlang khaw lian deuh ṭhenkhatah zirlai 50-60 awmnaa zirtirtu 10-11 awmna a awm zauh bawk.

Middle school-ah hian thingtlang lam bikah, a tlangpuiin zirtirtu an rualkhai thawkhat a; chutih rualin zirtirtu leh zirlai inbûk tawk lohna pawh a awm. 

Aizawl district-a thingtlang M/S-ah zirtirtu pathum awmna M/S panga a awm a, chu’ng sikulahte chuan zirlai 26, 26, 38, 42 leh 62-te an awm a ni.

- Vanglaini.org July 1, 2019