Myanmar ráltlânte thawn haw an ni

Aizawl | July 4, 2019: Myanmar sipai leh Arakan Army inkah vanga Myanmar ram aṭanga Mizorama rawn ráltlân,  Hmawngbuchhuah khuaa awmte chu July 2, Thawhlehni khan an ram lamah thawn haw an ni a; heti hian kum 2017-a Mizoram rawn ráltlân Zakhai  (Rakhine) hnamte chu an ramah an thawn haw kim. Raltlante chenna inte chu ṭhiah nghal vek a ni.

November 2017 vel khan sipai leh helho inkahna avangin Myanmar aṭangin sahimna zawngin mi eng emaw zat chu Lawngtlai district-a chhim lam, ramri bula khaw pali-ah an tlân lut a, an vaiin mi 1,200 vel an ni.

Raltlante chu Mizoram sorkar leh sipaite'n an lo chhawmdawl a, ei leh in tur leh chenna tur inte an lo ngaihtuahsak.

Myanmar lam a râlmuan deuh hnuah ráltlân zinga a tam zawk chu an khaw hlui lamah an lêt leh a; Hmawngbuchhuahah erawh chuan Myanmar rama let duh tawh loa awm ngheh tum chhungkaw 54 an awm a, an vaiin mi 219 an tling.

Hmawngbuchhuaha ráltlante chu sorkar laipui (Ministry of Home Affairs) chuan Myanmar lama thawn kîr vek turin a ti a; thawn haw hun atana ruatah 

ṭum hnih ṭhulh a nih hnuah, July 2 khan Lawngtlaia Deputy Commissioner, Police leh Assam Rifles-te hmalaknain boruak muanawm tak hnuaiah an khaw lamah thawn kîr an ni.

Raltlante thawn kîr tur hian July 1, 2019 khan mamawh hrang hrang buatsaih a ni a, July 2 khan zing aṭangin Lawngtlai DC Shashanka Ala leh SP Amit Goel te, Assam Rifles hotute chu Hmawngbuchhuahah kalin, raltlante thawn kîrna tur an buaipui a ni.

A tirah chuan Sekulh lui leh Varang luiah lawngléng hmanga thawn kîr tura ruahman ni mah se, Myanmar sipai lamin lawng tir tura an insawi anga an tirh leh si loh avangin motor (Gypsy) awm ang ang hmangin Laitlang khuaah phurh chhoh an ni a; Laitlang aṭang chuan sipai venna hnuaiah kein ramri lungphun pariatna (border pillar - BP-8) thleng kalpui an ni. BP-8 ah Myanmar sipaite'n lo dawngsawngin, an khaw lamah an hruai zui thung.

*** I Hun awlah website a fakna hi lo click ve rawh le. ***

Raltlante chu thawmhnaw leh bungrua an ken theih ang ang kentir an ni a, an ken theih bak chu lawngléng hmangin thiarsak an ni. Chawlhkar hnih chhunga an ei tur pawh chhêk khawlsak an ni a, chu'ngte chu an awmna khuaah dahsak vek an ni.

Hmawngbuchhuaha awm ngheh tum Myanmar raltlante hi MHA thupek angin June 15, 2019 khan an ramah thawn let tum a ni a, mahse, ruahsur duh lai leh khaw nawm loh lai a nih avangin ṭhulh a ni. Thawn let hun atan June 25 ruahman a ni leh a, mahse, remchan lohna avangin thawn let an ni lo leh bawk.

Lawngtlai district-a sorkar hotute leh Assam Rifles hotute chuan June 30 khan Myanmar sipai hotute Indo-Myanmar Flag Meeting an neihpui a; chutah chuan Myanmar sipaite chuan an ram mi, Mizorama ráltlânte chu an ram lama let turin an pawm a, lo buaipui zui an inhuam thu leh anmahni phurtu tur lawngleng pawh tirh an tum thu an sawi.

Zakhai hnam raltlante hian an rama lêt an châk tawh loh avangin Mizoramah awm ngheh an tum a, "Chhungkaw khawsakna tur leh dam khaw­chhuahna khawpa hna thawh tur a awm lo," tiin an lo sawi tawh a ni.

- Vanglaini.org